ശമ്പള വർധന; ഗ്രൂപ്പ് ഡി, ബി, സി, എ വിഭാഗങ്ങളിലെ ജീവനക്കാർക്ക് എത്ര ശമ്പളം കൂടും? അറിയാം

എട്ടാം ശമ്പള കമ്മീഷൻ്റെ രൂപീകരണത്തിന് പിന്നാലെ എത്ര ശമ്പളം കൂടുമെന്നാണ് കേന്ദ്രസർക്കാർ ജീവനക്കാർ ഉറ്റുനോക്കുന്നത്. പുതിയ ശമ്പള പരിഷ്കരണം ലെവൽ 1 മുതൽ 18 വരെയുള്ള എല്ലാ ജീവനക്കാർക്കും ബാധകമാകും. ഇതിൽ ഗ്രൂപ്പ് ഡി, ബി, സി, എ വിഭാഗങ്ങളിലെ ജീവനക്കാരും വിരമിച്ചവരും ഉൾപ്പെടും. ഓരോ വിഭാഗത്തിലുള്ളവർക്കും എത്ര ശമ്പളം കൂടുമെന്ന് വിശദമായി അറിയാം

ഏഴാം ശമ്പള കമ്മീഷനിൽ ഫിറ്റ്മെൻ്റ് ഘടകം 2.57 ആയിരുന്നു.ഇതോടെ ജീവനക്കാരുടെ അടിസ്ഥാന ശമ്പളം 7,440 ൽ നിന്ന് 18,000 ആയി ഉയർത്തി. എട്ടാം ശമ്പള കമ്മീഷനിൽ ഫിറ്റ്മെൻ്റ് ഘടകം എത്രയായിരിക്കുമെന്നതിനെക്കുറിച്ച് വിവിധ അഭിപ്രായങ്ങളുണ്ട്.ഇത് 1.83-നും 2.46-നും ഇടയിലായിരിക്കാനാണ് സാധ്യതയെന്ന് പറയുകയാണ് കർമ്മ മാനേജ്മെൻ്റ് ഗ്ലോബൽ കൺസൾട്ടിംഗ് സൊല്യൂഷൻസ് പ്രൈവറ്റ് ലിമിറ്റഡിൻ്റെ മാനേജിംഗ് ഡയറക്ടറും ചീഫ് വിഷൻ ഓഫീസറുമായ പ്രതീക് വൈദ്യ. അതേസമയം 2.57 എന്ന ഫിറ്റ്മെൻ്റ് ഘടകം പരിഗണിക്കാനുള്ള സാധ്യത അദ്ദേഹം തള്ളിക്കളയുന്നില്ല.

2.15 ആണ് ഫിറ്റ്മെൻ്റ് ഘടകം ആയി പരിഗണിക്കുന്നതെങ്കിൽ ലെവൽ 1 (എൻട്രി): 18,000 എന്നത് 38,700 ആയി ഉയരും, ഏകദേശം 20,700 വർധന. ലെവൽ 10 (മിഡ്/സീനിയർ ലെവൽ): 56,100 എന്നത് 1,20,615 ആയിമാറും, ഏകദേശം 64,515 വർധന. ലെവൽ 18 (ഉന്നത ഉദ്യോഗസ്ഥർ): 2,50,000 എന്നത് 5,37,500 ആയി വർധിക്കും, ഏകദേശം 2,87,500 വർധന.

ഇനി 2.86 എന്ന ഫിറ്റ്മെൻ്റ് ഘടകം ആണ് നടപ്പാക്കുന്നതെങ്കിൽ ലെവൽ 1 (പ്യൂൺ, അറ്റൻഡൻ്റ്സ്) ജീവനക്കാരുടെ നിലവിലെ അടിസ്ഥാന ശമ്പളം 18,000 ആണെങ്കിൽ, എട്ടാം ശമ്പള കമ്മീഷനിൽ 51,480 ആയി ഉയരും, ഏകദേശം 33,480-യുടെ വർദ്ധനവ്. ലെവൽ 2 (എൽഡിസി) ജീവനക്കാർക്ക് 19,900 എന്നത് 56,914 ആയി വർദ്ധിക്കും, ഏകദേശം 37,014 വർദ്ധനവ്.

ലെവൽ 3 (കോൺസ്റ്റബിൾസ്, സ്റ്റാഫ്) ജീവനക്കാരുടെ 21,700 അടിസ്ഥാന ശമ്പളം 62,062 ആയി മാറും, ഇത് ഏകദേശം 40,362-യുടെ വർദ്ധനവാണ്. ലെവൽ 4 (ജൂനിയർ ക്ലർക്ക്സ്) ജീവനക്കാർക്ക് 25,500 എന്നത് 72,930 ആയി വർദ്ധിക്കുകയും ഏകദേശം 47,430-യുടെ അധിക വരുമാനം ലഭിക്കുകയും ചെയ്യും.

ലെവൽ 5 (സീനിയർ ക്ലർക്ക്സ്) ജീവനക്കാരുടെ 29,200 അടിസ്ഥാന ശമ്പളം 83,512 ആയി മാറും, ഇത് 54,312-യുടെ വർധനവാണ്. ലെവൽ 6 ( ഇൻസ്പെക്ടർമാർ ) ജീവനക്കാർക്ക് 35,400 എന്നത് 1,01,244 ആയി ഉയരുമ്പോൾ 65,844-യുടെ വർദ്ധനവ് ലഭിക്കും.

ലെവൽ 7 (സൂപ്രണ്ടുമാർ) ജീവനക്കാരുടെ 44,900 അടിസ്ഥാന ശമ്പളം 1,28,414 ആയി ഉയരും, ഏകദേശം 83,514 വർദ്ധനവ്. ലെവൽ 8 (സീനിയർ ഓഫീസർമാർക്ക്) 47,600 എന്നത് 1,36,136 ആയി മാറും, 88,536-യുടെ വർദ്ധനവ്.

ലെവൽ 9 (ഡെപ്യൂട്ടി സൂപ്രണ്ട്/അക്കൗണ്ട്സ്) ജീവനക്കാർക്ക് 53,100 അടിസ്ഥാന ശമ്പളം 1,51,866 ആയി ഉയരും, ഇത് 98,766-യുടെ വർദ്ധനവാണ്. ലെവൽ 10 (ഗ്രൂപ്പ് എ ഓഫീസർമാർക്ക്) 56,100 എന്നത് 1,60,446 ആയി വർദ്ധിക്കുകയും ഏകദേശം 1,04,346-യുടെ അധിക വരുമാനം ലഭിക്കുകയും ചെയ്യും. എന്തായാലും വലിയ ശമ്പള വർധനവ് തന്നെ ഉണ്ടാകുമെന്ന പ്രതീക്ഷയിലാണ് ജീവനക്കാർ. ശമ്പള കമ്മീഷൻ റിപ്പോർട്ട് സമർപ്പിച്ചതിന് ശേഷം കേന്ദ്ര സർക്കാർ അത് അവലോകനം ചെയ്യുകയും തുടർന്ന് അംഗീകാരം നൽകുകയും ചെയ്യും. ഈ നടപടിക്രമങ്ങൾ 2027-ൻ്റെ രണ്ടാം പകുതിയോടെ പൂർത്തിയാകുമെന്നാണ് വിലയിരുത്തപ്പെടുന്നത്.