ഇടത് ഉപരോധത്തിനെതിരെ പൊട്ടിത്തെറിച്ച സന്ധ്യ കോണ്‍ഗ്രസ് വേദികളില്‍

തിരുവനന്തപുരം: ക്ളിഫ് ഹൗസിന് മുന്നില്‍ എല്‍ഡിഎഫ് നടത്തിയ ഉപരോധ സമരത്തിന് നേരെ പൊട്ടിത്തെറിച്ച് വാര്‍ത്തകളില്‍ ഇടം നേടിയ ആളാണ് സന്ധ്യ എന്ന വീട്ടമ്മ. സന്ധ്യ കോണ്‍ഗ്രസിന്റെ ആളാണെന്നും അതാണ് ഉപരോധ സമരത്തിനെതിരെ പ്രതികരിച്ചതെന്നുമാണ് അന്ന് ഇടത് നേതാക്കള്‍ ആരോപിച്ചത്. ഈ ആരോപണത്തെ ശരിവയ്ക്കുന്ന തരത്തില്‍ കോണ്‍ഗ്രസ് വേദികളില്‍ സജീവമാവുകയാണ് ഈ വീട്ടമ്മ.

കെപിസിസി പ്രസിഡന്റ് വിഎം സുധീരന്‍ പങ്കെടുത്ത വേദിയിലാണ് സന്ധ്യ ഏറ്റവും ഒടുവില്‍ എത്തിയത്. സുധീരന്‍ നടത്തുന്ന ജനപക്ഷയാത്രയുടെ സിഡി പ്രകാശന ചടങ്ങിലാണ് സന്ധ്യ പങ്കെടുത്തത്. ഇന്ദിരാഭവനില്‍ നടന്ന ചടങ്ങില്‍ സംവിധായകന്‍ റോഷന്‍ ആന്‍ഡ്രൂസാണ് സിഡി പ്രകാശനം ചെയ്തത്.

മുന്‍പ് കോണ്‍ഗ്രസ് നേതാവ് എംഎം ഹസന്റെ ഉപവാസ സമരപ്പന്തലിലും സന്ധ്യ ഒപ്പമുണ്ടായിരുന്നു. സോളാര്‍ തട്ടിപ്പ് കേസുമായി ബന്ധപ്പെട്ട് മുഖ്യമന്ത്രിയുടെ രാജി ആവശ്യപ്പെട്ട് ഇടതു മുന്നണി നടത്തിയ ക്ളിഫ് ഹൗസ് ഉപരോധത്തിന് നേരെയാണ് അന്ന് സന്ധ്യ പൊട്ടിത്തെറിച്ചത്.

ജനങ്ങളുടെ സഞ്ചാര സ്വാതന്ത്ര്യം തടയുന്നു എന്നാരോപിച്ചാണ് സന്ധ്യ പ്രതികരിച്ചത്. സാധാരണക്കാരിയായ വീട്ടമ്മയുടെ പ്രതികരണം എന്ന നിലയ്ക്ക് ദൃശ്യമാധ്യമങ്ങള്‍ സംഭവം വലിയ വാര്‍ത്തയാക്കി. സന്ധ്യയ്ക്ക് പ്രമുഖ വ്യവസായി കൊച്ചൗസേപ്പ് ചിറ്റിലപ്പള്ളി അഞ്ച് ലക്ഷം രൂപ നല്‍കിയിരുന്നു.

English summary

Sandhya is active in congress programs. who is a house wife from thiruvananthapuram she protect against LDF's strike.