അപവാദ പരാമര്ശമുള്ള വീഡിയോ: ഭാഗ്യലക്ഷ്മിയുടെ പരാതിയില് ശാന്തിവിള ദിനേഷ് അറസ്റ്റില്!!
തിരുവനന്തപുരം: ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മിയുടെ പരാതിയില് സംവിധായകന് ശാന്തിവിള ദിനേശ് അറസ്റ്റില്. ഭാഗ്യലക്ഷ്മി നല്കിയ രണ്ടാം പരാതിയിലാണ് അറസ്റ്റുണ്ടായിരിക്കുന്നത്. സോഷ്യല് മീഡിയ വഴി നടത്തിയ പരാമര്ശത്തിലാണ് പോലീസിന്റെ നടപടി. ശാന്തിവിള ദിനേശ് ഈ കേസില് മുന്കൂര് ജാമ്യം നേരത്തെ തേടിയിരുന്നു. ഇന്നലെയാണ് ദിനേശിനെ അറസ്റ്റ് ചെയ്തത്. പിന്നീട് ജാമ്യത്തില് വിടുകയും ചെയ്തിരുന്നു.
ശാന്തിവിള ദിനേശ് തന്നെ പറ്റി അപവാദ പരാമര്ശമുള്ള വീഡിയോ യുട്യൂബില് അപ്ലോഡ് ചെയ്തെന്നാണ് മുഖ്യമന്ത്രിക്കും ഡിജിപിക്കും ഭാഗ്യലക്ഷ്മി നല്കി പരാതിയില് പറഞ്ഞിരുന്നത്. ഭാഗ്യലക്ഷ്മിയുടെ മൊഴിയെടുത്ത പോലീസ് ശാന്തിവിള ദിനേശിനെ വിളിച്ചുവരുത്തി താക്കീത് നല്കിയിരുന്നു. തന്റെ സ്വകാര്യ ജീവിതത്തെ അപമാനിക്കുന്ന പരാമര്ശങ്ങള് ദിനേഷ് സോഷ്യല് മീഡിയയില് നടത്തിയെന്നായിരുന്നു ഭാഗ്യക്ഷ്മിയുടെ പരാതി. തുടര്ന്ന് ഈ വീഡിയോ നീക്കം ചെയ്തിരുന്നു.
രമേശ് ചെന്നിത്തല നയിക്കുന്ന ഐശ്വര്യ കേരള യാത്രയുടെ പുതിയ ചിത്രങ്ങള് കാണാം
നേരത്തെ ഭാഗ്യലക്ഷ്മി നല്കിയ പരാതിയില് മ്യൂസിയം പോലീസാണ് ശാന്തിവിള ദിനേശിനെതിരെ കേസെടുത്തത്. നേരത്തെ യുട്യൂബിലൂടെ അശ്ലീലം പറഞ്ഞ വിജയ് പി നായരെ കൈയ്യേറ്റം ചെയ്ത കേസില് ഭാഗ്യലക്ഷ്മിക്ക് കോടതി മുന്കൂര് ജാമ്യം അനുവദിച്ചിരുന്നു. ഇതിന്റെ വാദം കേള്ക്കുമ്പോള് ഭാഗ്യലക്ഷ്മിയുടെയും മറ്റ് പ്രതികളുടെയും നടപടിയെ ഹൈക്കോടതി രൂക്ഷമായി വിമര്ശിക്കുകയും ചെയ്തിരുന്നു. നിയമം കൈയ്യിലെടുക്കുമ്പോള് അതിന്റെ പ്രത്യാഘാതം അനുഭവിക്കാന് തയ്യാറാകണം എന്ന് കോടതി പറയുകയും ചെയ്തു. വിജയ് പി നായരും ഇവര്ക്കെതിരെ ഹൈക്കോടതിയില് ഹര്ജി നല്കിയിരുന്നു.