വിഎസ് സരിതയുടെ വക്താവ് ചമയുകയാണെന്ന് ഡീന് കുര്യാക്കോസ്
തിരുവനന്തപുരം: സോളാര് പ്രതി സരിത എസ് നായരുടെ കത്തുമായി ബന്ധപ്പെട്ട് കോണ്ഗ്രസ് യുവ നേതാക്കള്ക്കെതിരെ അന്വേഷണം വേണമെന്ന് ആവശ്യപ്പെട്ട പ്രതിപക്ഷ നേതാവ് വിഎസ് അച്യുതാനന്ദന് യൂത്ത് കോണ്ഗ്രസ് സംസ്ഥാന പ്രസിഡന്റ് ഡീന് കുര്യാക്കോസിന്റെ വിമര്ശനം. വിഎസ് സരിതയുടെ വക്താവ് ചമയുകയാണെന്ന് ഡീന് ആരോപിച്ചു.
പീഡനത്തിന് ഇരയായ ശാരിക്ക് നീതി ലഭ്യമാക്കുമെന്ന് പ്രഖ്യാപിച്ചെങ്കിലും അതിന് കഴിയാത്ത വിഎസ് ആണ് സരിതയുടെ വക്താവ് ചമയുന്നത്. കോണ്ഗ്രസ് യുവ നേതാക്കള്ക്കെതിരെ ആരോപണം ഉന്നയിച്ച് സംശയത്തിന്റെ പുകമറ സൃഷ്ടിക്കാനാണ് വിഎസ്സിന്റെ ശ്രമെന്നും ഡീന് കുര്യാക്കോസ് പറഞ്ഞു.
കോണ്ഗ്രസ് യുവ നേതാക്കളായ വിഷ്ണുനാഥും ഹൈബി ഈഡനും ലൈംഗിക ചൂഷണം നടത്തിയതായി സരിതയുടെ കത്തില് വ്യക്തമാക്കിയിട്ടുണ്ടായിരുന്നു. സരിത വാര്ത്താ സമ്മേളനത്തില് ഉയര്ത്തിക്കാട്ടിയ കത്തിലാണ് നേതാക്കളുടെ പേര് വെളിപ്പെട്ടത്. ഇതേ തുടര്ന്നാണ് ഇവര്ക്കെതിരെ അന്വേഷണം വേണമെന്ന് വിഎസ് ആവശ്യപ്പെട്ടത്.
ഇവരെക്കൂടാതെ കോണ്ഗ്രസ് നേതാവും മന്ത്രിയുമായ ആര്യാടന് മുഹമ്മദ്, ലീഗ് നേതാവ് ബഷീറലി തങ്ങള്, നടന് മോഹന്ലാല്, ജോസ് കെ മാണി തുടങ്ങിയ പ്രമുഖരുടെ പേരുകള് സരിതയുടെ കത്തിലുണ്ടായിരുന്നു. എന്നാല് കത്ത് മാധ്യമങ്ങള്ക്ക് കൈമാറാന് സരിത ഒരുക്കമായിരുന്നില്ല. കത്തിനെക്കുറിച്ച് ക്രൈംബ്രാഞ്ച് അന്വേഷണം തുടങ്ങിയിട്ടുണ്ട്.