ആര്യാടന് സരിത പണം നല്കിയത് ഔദ്യോഗിക വസതിയില് വച്ച്?
കൊച്ചി: മന്ത്രി ആര്യാടന് മുഹമ്മദിന് ഔദ്യോഗിക വസതിയില് വച്ചാണ് പണം നല്കിയതെന്ന് സരിത എസ് നായര്. ആര്യാടന് മുഹമ്മദിനു രണ്ട് തവണയായി 40 ലക്ഷം രൂപ നല്കിയെന്ന് നേരത്തെ മൊഴി നല്കിയിരുന്നു. ആവശ്യപെട്ട 75 ലക്ഷത്തില് 25 ലക്ഷം ആദ്യം നല്കി. ഇതിന് ഡിജിറ്റല് തെളിവുകള് ഉണ്ടെന്നും പണം ബാങ്കില് നിന്ന് എടുത്ത് നല്കിയത് ബിജു രാധാകൃഷ്ണനാണെന്നും സരിത പറഞ്ഞു.
മന്ത്രിക്ക് വേണ്ടി 2011ല് പിഎ കോശവനാണ് കോഴ ആവശ്യപെട്ടത്. ഡിസംബര് ആറിന് വൈകിട്ട് ആര്യാടന് മുഹമ്മദിന്റെ ഔദ്യോഗിക വസതിയായ മന്മോഹന് ബംഗ്ലാവിലെത്തി 25 ലക്ഷം നല്കുകയായിരുന്നു. മന്ത്രിക്ക് നേരിട്ടാണ് പണം കൈമാറിയത് പണം എണ്ണിതിട്ടപെടുത്തിയതും താനാണെന്നും സരിത പറഞ്ഞു.
പിന്നീട് 15 ലക്ഷം കൊടുത്തത് കോട്ടയത്ത് നടന്ന റിന്യൂവബിള് എനര്ജി സെമിനാറിലാണെന്നും സരിത വ്യക്തമാക്കി. അനര്ട്ടുമായി ബന്ധപ്പെട്ട് വേണ്ട നടപടിയെടുക്കാമെന്ന് ഉറപ്പു നല്കിയെങ്കിലും ഒരു സഹായവും ചെയ്തു തന്നില്ല. പണം തിരികെ ആവശ്യപെട്ടെങ്കിലും കിട്ടിയില്ലെന്നും സരിത കമ്മീഷനു മുന്നില് മൊഴി നല്കി.
അതോടൊപ്പം ചില ഡിജിറ്റല് തെളിവുകളും സരിത കമ്മീഷനു നല്കി. 12 ഫയലുകള് അടങ്ങിയ ഒരു പെന്ഡ്രൈവാണ് സരിത നല്കിയത്. നേരത്തെ മുദ്രവച്ച കവറില് സരിത ചില തെളിവുകള് നല്കിയിരുന്നു. അതിനു പുറമെയാണ് ബുധനാഴ്ച ഡിജിറ്റല് തെളിവുകള് നല്കിയത്.