സരിതയ്ക്ക് വിശ്വാസം എല്ഡിഎഫ് സര്ക്കാരിനെ; താന് പറഞ്ഞതെല്ലാം സത്യമെന്ന് സരിത വിഎസിനോട്
താന് പറഞ്ഞതെല്ലാം സത്യമെന്ന് തെളിയിക്കുന്നതാണ് ഉമ്മന്ചാണ്ടിക്കെതിരായ കോടതി വിധിയെന്നും സരിത വ്യക്തമാക്കി.
തിരുവനന്തപുരം: പുതിയ സര്ക്കാരിനെ തനിക്ക് വിശ്വാസമുണ്ടെന്ന് സരിത എസ് നായര്. ഭരണ പരിഷ്കാര ചെയര്മാന് വിഎസ് അച്യുതാനന്ദനുമായുള്ള കൂടിക്കാഴ്ചയിലാണ് സരിത ഇക്കാര്യം പറഞ്ഞത്. താന് പറഞ്ഞതെല്ലാം സത്യമെന്ന് തെളിയിക്കുന്നതാണ് ഉമ്മന്ചാണ്ടിക്കെതിരായ കോടതി വിധിയെന്നും സരിത വ്യക്തമാക്കി.
ഔദ്യോഗിക വസതിയായ കവടിയാര് ഹൗസിലെത്തിയാണ് സരിത വിഎസിനെ കണ്ടത്. ബെംഗളൂരു കോടതിയില് വിചാരണ നടത്തിയത് കൊണ്ടാണ് ശിക്ഷ വന്നതെന്നും പറഞ്ഞ സരിത പുതിയ സര്ക്കാരില് വിശ്വാസമുണ്ടെന്നും കൂട്ടിച്ചേര്ത്തു. സോളാര് പവര് പ്രൊജക്ട് തരപ്പെടുത്തി നല്കാം എന്ന് പറഞ്ഞ് പണം തട്ടിയ കേസില് ബെംഗളൂരു കോടതിയാണ് ഉമ്മന്ചാണ്ടിക്ക് പിഴശിക്ഷ വിധിച്ചത്.
ഉമ്മന്ചാണ്ടിയടക്കം കേസില് പ്രതികളായ ആറുപേര് തട്ടിപ്പ് നടത്തിയ പണം തിരിച്ചുനല്കണമെന്നാണ് കോടതിയുടെ വിധി. ഉമ്മന്ചാണ്ടിയും അടുപ്പക്കാരും ചേര്ന്ന് ദക്ഷിണ കൊറിയയില്നിന്ന് സോളാര് സാങ്കേതിക വിദ്യ ഇറക്കുമതി ചെയ്യുന്നതിനും കേന്ദ്ര സംസ്ഥാന സര്ക്കാരുകളുടെ ക്ലിയറന്സ് സബ്സിഡി ലഭ്യമാക്കുന്നതിനുമായി ഒന്നരക്കോടിയോളം രൂപ കൈപ്പറ്റിയെന്നായിരുന്നു പരാതി. തിങ്കളാഴ്ചയായിരുന്നു ബെംഗളൂരു കോടതിയില് നിന്നും ഉമ്മന്ചാണ്ടിക്കെതിരായി വിധി പ്രഖ്യാപിച്ചത്.