റിപ്പോര്‍ട്ട് നിഷ്പക്ഷമെങ്കില്‍ ഉമ്മന്‍ചാണ്ടിയും പ്രതി; പറഞ്ഞതിലുറച്ച് തന്നെയെന്ന് സരിത

By Gowthamy

Updated: Wednesday, September 27, 2017, 17:19 [IST]

കൊച്ചി: സോളാര്‍ കേസില്‍ മുന്‍ മുഖ്യമന്ത്രി ഉമ്മന്‍ചാണ്ടിക്കെതിരായ ആരോപണങ്ങളില്‍ ഉറച്ചു നില്‍ക്കുകയാണെന്ന് കേസിലെ രണ്ടാം പ്രതി സരിത എസ് നായര്‍. സോളാര്‍ കമ്മീഷന്‍ സര്‍ക്കാരിന് സമര്‍പ്പിച്ച റിപ്പോര്‍ട്ട് നിഷ്പക്ഷമെങ്കില്‍ പ്രതിസ്ഥാനത്ത് ഉമ്മന്‍ചാണ്ടിയുടെ പേരും ഉണ്ടാകുമെന്നും സരിത പറയുന്നു.

സോളാര്‍ കേസുമായി ബന്ധപ്പെട്ട് ജയിലില്‍ വച്ചെഴുതിയ കത്തില്‍ പറയുന്ന കാര്യങ്ങള്‍ സത്യസന്ധമാണെന്ന് സരിത പറയുന്നു. കമ്മീഷനില്‍ വിശ്വാസമുണ്ടെന്നും കമ്മീഷനില്‍ നിന്ന് നീതി ലഭിക്കുമെന്നാണ് പ്രതീക്ഷയെന്നും സരിത പറയുന്നു.

ആരോപണങ്ങളില്‍ ഉറച്ച്

സോളാര്‍ കേസുമായി ബന്ധപ്പെട്ട് ഉമ്മന്‍ ചാണ്ടിക്കെതിരെ ഉന്നയിച്ച ആരോപണങ്ങളില്‍ ഉറച്ചു നില്‍ക്കുകയാണെന്നാണ് സരിത പറയുന്നത്. ലൈംഗിക ആരോപണങ്ങളക്കം സരിത ഉമ്മന്‍ചാണ്ടിക്കെതിരെ ഉയര്‍ത്തിയിരുന്നു.

കത്ത് സത്യസന്ധം

സോളാര്‍ കേസുമായി ബന്ധപ്പെട്ട് ജയിലില്‍ വച്ച് താനെഴുതിയ കത്തില്‍ പറയുന്ന കാര്യങ്ങള്‍ സത്യസന്ധമാണെന്നാണ് സരിത പറയുന്നത്. ഈ കത്തും അന്വേഷണ കമ്മീഷന് മുന്നിലെത്തിയിരുന്നതായി സരിത.

നിഷ്പക്ഷമെങ്കില്‍ ഉമ്മന്‍ചാണ്ടിയും

സോളാര്‍ കമ്മീഷന്‍ സര്‍ക്കാരിന് സമര്‍പ്പിച്ച റിപ്പോര്‍ട്ട് നിഷ്പക്ഷമെങ്കില്‍ പ്രതിസ്ഥാനത്ത് ഉമ്മന്‍ചാണ്ടിയും ഉണ്ടാകുമെന്ന് സരിത പറയുന്നു. സോളാര്‍ തട്ടിപ്പില്‍ ഉമ്മന്‍ചാണ്ടിക്ക് വ്യക്തിപരമായ പങ്കുണ്ടെന്നും സരിത ആരോപിക്കുന്നു.

മുഖ്യമന്ത്രിയുടെ ഉറപ്പിന്‍മേല്‍

കാറ്റാടിപ്പാടം എന്ന പദ്ധതി തന്നെ ഇതിനുവേണ്ട സ്ഥലം സര്‍ക്കാര്‍ ലീസിനു കൊടുക്കാമെന്ന ഉമ്മന്‍ചാണ്ടിയുടെ ഉറപ്പിന്മേല്‍ ആരംഭിച്ചതാണെന്ന് സരിത പറയുന്നു. ഉമ്മന്‍ചാണ്ടിയെ ഒഴിവാക്കിയാണ് മറ്റുള്ളവരെ പ്രതിയാക്കിയതെന്ന് സരിത.

കള്ളന്റെ കൈയ്യില്‍ താക്കോല്‍

തങ്ങളെ കരുവാക്കി ഒരു മാസ്റ്റര്‍ ബ്രെയിന്‍ ഇതിനു പിന്നില്‍ ഉണ്ടായിരുന്നതായി സരിത ആരോപിക്കുന്നു. അത് ചൂണ്ടിക്കാണിച്ച് യുഡിഎഫ് ഭരണകാലത്ത് പരാതി നല്‍കിയെങ്കിലും അന്നത് കള്ളന്റെ കൈയ്യില്‍ താക്കോല്‍ കൊടുകകുന്നത് പോലെയായിരുന്നുവെന്ന് സരിത.