ശശികലയുടെ അറസ്റ്റിന്റെ പേരില് പോലീസില് പ്രശ്നം!!! എസ്പിയ്ക്കെതിരെ ഐജിയുടെ റിപ്പോര്ട്ട്
തിരുവനന്തപുരം ശബരിമല ദര്ശനത്തിനെത്തിയ കെപി ശശികലയെ അറസ്റ്റ് ചെയ്തത് സംബന്ധിച്ച് പോലീസിനുള്ളില് പുതിയ വിവാദം. ശശികലയെ അറസ്റ്റ് ചെയ്യാന് വൈകി എന്നാണ് ആരോപണം. ഇക്കാര്യത്തില് ഡ്യൂട്ടിയിലുണ്ടായിരുന്ന എസ്പിയ്ക്കെതിരെ ഐജി റിപ്പോര്ട്ട് സമര്പ്പിച്ചിരിക്കുകയാണ് ഇപ്പോള്.
നവംബര് 14 ന് ആയിരുന്നു കെപി ശശികലയെ പോലീസ് അറസ്റ്റ് ചെയ്തത്. ആ സമയം മരക്കൂട്ടം മേഖലയുടെ ചുമതല വഹിച്ചിരുന്നത് എസ്പി സുദര്ശന് ആയിരുന്നു. എന്നാല് ശശികലയെ അറസ്റ്റ് ചെയ്യുമ്പോള് ചുമതലയുള്ള എസ്പിയോ ഡിവൈഎസ്പിയോ സ്ഥലത്തുണ്ടായിരുന്നില്ല.
ശബരിമലയിലെ സംഘര്ഷ സാധ്യത പരിഗണിച്ചായിരുന്നു ശശികലയെ അറസ്റ്റ് ചെയ്ത് കരുതല് തടങ്കലില് വച്ചത്. വനിത പോലീസ് എത്തിയായിരുന്നു അറസ്റ്റ്. സ്റ്റേഷന് ചുമതലയുള്ള പോലീസ് ഉദ്യോഗസ്ഥന് അറസ്റ്റ് രേഖപ്പെടുത്തിയാല് മതി എന്നതായിരുന്നു എസ്പി അടക്കമുള്ളവരുടെ നിലപാട്. എന്തായാലും അന്ന് ശശികലയെ അറസ്റ്റ് ചെയ്തത് പുലര്ച്ചെ രണ്ട് മണിയോടെ ആയിരുന്നു.
അറസ്റ്റില് കാലതാമസം ഉണ്ടായി എന്നാണ് ഐജി വിജയ് സാഖറെ ഡിജിപിയ്ക്ക് നല്കിയിട്ടുള്ള റിപ്പോര്ട്ടില് പറയുന്നത്. ഈ റിപ്പോര്ട്ടിന്റെ അടിസ്ഥാനത്തില് എസ്പിയോട് ഡിജിപി വിശദീകരണം ചോദിക്കും എന്നാണ് റിപ്പോര്ട്ടുകള്.