പഴനിയില്‍ വാഹനാപകടത്തില്‍ 7 മലയാളികള്‍ മരിച്ചു

പഴനി: തീര്‍ഥാടനകേന്ദ്രമായ പഴനിക്കടുത്തുണ്ടായ വാഹനാപകടത്തില്‍ ഏഴ് മലയാളികള്‍ കൊല്ലപ്പെട്ടു. കാറും ലോറിയും തമ്മില്‍ കൂട്ടിയിടിച്ചാണ് അപകടം ഉണ്ടായത്. തൃശ്ശൂര്‍ സ്വദേശികളായ ബന്ധുക്കളാണ് അപകടത്തില്‍പ്പെട്ടത്. മരിച്ചവരില്‍ രണ്ടുപേര്‍ കുട്ടികളാണ്. ഇടിയുടെ ആഘാതത്തില്‍ പൂര്‍ണമായും തകര്‍ന്ന കാര്‍ വെട്ടിപ്പൊളിച്ചാണ് മൃതദേഹങ്ങള്‍ പുറത്തെടുത്തത്.

ഏഴുപേരും സംഭവസ്ഥലത്ത് വെച്ച് തന്നെ മരിച്ചു. രണ്ട് കാറുകളിലായി വേളാങ്കണ്ണിക്ക് പോകുകയായിരുന്നു സംഘം. ഇതില്‍ ഒരു കാറാണ് അപകടത്തില്‍പ്പെട്ടത്. മുന്നിലുണ്ടായിരുന്ന ലോറിയെ ഓവര്‍ടേക്ക് ചെയ്യാനുള്ള ശ്രമത്തിനിടെയായിരുന്നു അപകടം. എതിരെ വന്ന മറ്റൊരു ലോറി കാറില്‍ ഇടിക്കുകയായിരുന്നു. ലോറിയുമായി കൂട്ടിയിടിച്ച കാര്‍ തകര്‍ന്നുതരിപ്പണമായ നിലയിലാണ്.

വേളാങ്കണ്ണിക്ക് തീര്‍ഥയാത്ര പോയ സംഘം രാവിലെ പത്ത് മണിയോടെയാണ് അപകടത്തില്‍പ്പെട്ടത്. പഴനി - ഡിണ്ടിഗല്‍ റൂട്ടിലെ സത്രപ്പെട്ടിയില്‍വെച്ചാണ് അപകടം ഉണ്ടായത്. മധുരയില്‍ നിന്നും പൊള്ളാച്ചിയിലേക്ക് പോകുകയായിരുന്ന ലോറിയാണ് കാറിലിടിച്ചത്.

തൃശൂര്‍ സ്വദേശികളായ ഷിജോയും ഭാര്യ ജുനോയും മക്കളായ എസക്കിയേലും ഡാനിയേലും മരിച്ചവരില്‍പ്പെടുന്നു. ഷിജോയുടെ ബന്ധുവായ ജോണ്‍സണ്‍, ഭാര്യ ലിസി, മകന്‍ അലക്‌സ് എന്നിവര്‍ക്കും അപകടത്തില്‍ ജീവന്‍ നഷ്ടപ്പെട്ടു.

English summary

7 Malayalees killed in road accident in Palani.