വിവാദത്തില്‍ വായടപ്പിക്കുന്ന മറുപടിയുമായി ഷംന കാസിം; കട്ട സപ്പോര്‍ട്ടുമായി കൂടെയുണ്ടെന്ന് ആരാധകര്‍

കൊച്ചി: ഡാന്‍സ് റിയാലിറ്റി ഷോയില്‍ മികച്ച പ്രകടനം കാഴ്ചവച്ച മത്സരാര്‍ത്ഥികളുടെ കവിളില്‍ ആഹ്ലാദ പ്രകടനത്തിന്റെ ഭാഗമായി നടി ഷംന കാസിം കടിച്ച സംഭവം വലിയ വിമര്‍ശനങ്ങളാണ് ഉയര്‍ന്നത്. താരത്തിന്റെ പെരുമാറ്റം അതിര് കടന്നുപോയെന്ന വിമര്‍ശനമാണ് ഉയര്‍ന്നത്.

സോഷ്യല്‍ മീഡിയയില്‍ ഇതിന്റെ വീഡിയോ വൈറലായതോടെ നിരവധി പേര്‍ ഇതിനെതിരെ രംഗത്തെത്തുകയായിരുന്നു. എന്നാല്‍ ഇപ്പോഴിതാ ഈ വിഷയത്തില്‍ പ്രതികരിച്ച് രംഗത്തെത്തിയിരിക്കുകയാണ് താരം. ഫേസ്ബുക്ക് പോസ്റ്റില്‍ ഒരു ചിത്രം സഹിതം പങ്കുവച്ചായിരുന്നു താരത്തിന്റെ പ്രതികരണം. വിശദാംശങ്ങളിലേക്ക്....

ഇ ടിവി തെലുങ്കില്‍ സംപ്രേക്ഷണം ചെയ്യുന്ന ധീ ചാമ്പ്യന്‍സ് എന്ന റിയാലിറ്റി ഷോയ്ക്കിടെയാണ് സംഭവം. വലിയ പ്രേക്ഷക പിന്തുണയും റേറ്റിംഗില്‍ ഉയര്‍ന്നു നില്‍ക്കുന്നതുമായ ഷോയാണ് ധീ ചാമ്പ്യന്‍സ്. പ്രിയ മണി അടക്കമുള്ള താരങ്ങള്‍ ഈ പരിപാടിയുടെ വിധി കര്‍ത്താവായി എത്താറുണ്ട്. ഈ ഷോയില്‍ മികച്ച പ്രകടനം കാഴ്ച വച്ച മത്സരാര്‍ത്ഥികളെയായിരുന്നു ഷംന കാസിം കവിളില്‍ കടിച്ചത്.

ഷംനയുടെ വികാര പ്രകടനം അതിര് കടന്നുപോയെന്നാണ് വിമര്‍ശകര്‍ ഉന്നയിച്ചത്. ഒരു വിധികര്‍ത്താവ് പരിപാടിക്കിടെ ഇങ്ങനെ പെരുമാറരുത് എന്നായിരുന്നു സോഷ്യല്‍ മീഡിയയില്‍ വിമര്‍ശകര്‍ ചൂണ്ടിക്കാണിച്ചത്. എന്നാല്‍ ഷംനയെ പിന്തുണച്ച് ഒരു വിഭാഗം രംഗത്തെത്തുന്നുണ്ട്. ഉഭയസമ്മത പ്രകാരമുള്ള സ്‌നേഹ പ്രകടനത്തെ കുറ്റപ്പെടുത്തുന്നത് കപട സദാചാരമാണെന്നാണ് ഷംനയെ അനുകൂലിച്ച് കൊണ്ട് അവര്‍ പറയുന്നത്.

കൂടാതെ ചാനലിന്റെ റേറ്റിംഗ് കൂട്ടാന്‍ വേണ്ടി ചാനല്‍ അധികൃതര്‍ ആസൂത്രണം ചെയ്ത കച്ചവട തന്ത്രമാണിതെന്നും അഭിപ്രായപ്പെടുന്നവരുണ്ട്. എന്താലായലും ഇതിന്റെ ദൃശ്യങ്ങള്‍ ഇപ്പോള്‍ സോഷ്യല്‍ മീഡിയയില്‍ വലിയ ചര്‍ച്ചയായിരുന്നു. ഈ സാഹചര്യത്തിലായിരുന്നു ഷംന ഇക്കാര്യത്തില്‍ മറുപടിയുമായി രംഗത്തെത്തിയത്.

അമ്മയുടെ കവിളില്‍ കടിക്കുന്ന ചിത്രം പങ്കുവച്ചായിരുന്നു ഷംന ഈ വിമര്‍ശനങ്ങള്‍ക്ക് മറുപടി നല്‍കിയത്. നമ്മളെ ആരെങ്കിലും വിധിക്കുന്നുണ്ടെങ്കില്‍ അത് അവരുടെ മാത്രം പ്രശ്‌നമാണെന്ന് ചിത്രത്തിന് അടിക്കുറിപ്പായി ഷംന കുറിച്ചു. അതേസമയം, ഷംന ഫേസ്ബുക്കില്‍ പങ്കുവച്ച പോസ്റ്റ് വൈറലായിരിക്കുകയാണ്. നിരവധി പേരാണ് താരത്തെ പിന്തുണച്ചും എതിര്‍ത്തും കമന്റുകള്‍ രേഖപ്പെടുത്തുന്നത്.

ഷംനയെ പിന്തുണച്ച് ഒരാള്‍ പങ്കുവച്ച കമന്റ് ഇങ്ങനെയായിരുന്നു, നിങ്ങളെ ജഡ്ജ് ചെയ്യാനുള്ള അവകാശം ആര്‍ക്കുമില്ല, കാരണം നിങ്ങള്‍ യതാര്‍ത്ഥത്തില്‍ എങ്ങനെയാണെന്ന് അവര്‍ക്ക് അറിയില്ല. സോഷ്യല്‍ മീഡിയ വഴി പ്രചരിക്കുന്ന ചിത്രങ്ങളാണ് പലരും കണ്ടിട്ടുള്ളത്. മറ്റുള്ളവരോട് സ്‌നേഹം പ്രകടിപ്പിക്കുന്ന രീതിയാണിതെന്ന് അവര്‍ക്ക് അറിയില്ല. നീ ഇങ്ങനെയാണ്, മറ്റുള്ളവര്‍ക്ക് വേണ്ടി അത് മാറ്റേണ്ട ആവശ്യമില്ല. മറുപടി അര്‍ഹിക്കാത്തവരോട് പ്രതികരിക്കുന്നതില്‍ കാര്യമില്ലെന്നും ടെസി എന്ന പേരുള്ള ഒരാള്‍ കമന്റായി കുറിച്ചു.

മറ്റ് ചില കമന്റുകള്‍ ഇങ്ങനെയായിരുന്നു, ഷംനക്ക് കട്ട സപ്പോര്‍ട്ട്, കണ്ണൂരുകാര്‍ ഒന്നിനെയും പേടിക്കാന്‍ പാടില്ല, സ്‌നേഹം കൂടുമ്പോള്‍ ഉള്ള വികാരം മാത്രം ആണ്കടി. കാണുന്ന കണ്ണുകള്‍ക്ക് മൊത്തം തോന്നുക മറ്റേ കടി ആയിട്ടാണ്. കാര്യം ആക്കേണ്ട ബഹുജനം പല വിധം. കടി കിട്ടിയവര്‍ക്കും കൊടുത്തവര്‍ക്കും ഒന്നും ഇല്ല പിന്നെ ആര്‍കാ ഇത്ര കൃമി കടി എന്നിങ്ങനെയുള്ള കമന്റുകളാണ് ഷംനയെ പിന്തുണച്ച് ആരാധകര്‍ രേഖപ്പെടുത്തിയത്.

എന്നാല്‍ ചിലര്‍ താരത്തിനെ വിമര്‍ശിച്ചുകൊണ്ടാണ് കമന്റുകള്‍ രേഖപ്പെടുത്തിയത്. പല്ലുകള്‍കൊണ്ട് ഉമ്മവെക്കുന്ന ശീലംമാറ്റി ചുണ്ടുകള്‍ കൊണ്ട് ഉമ്മവെക്കുവാന്‍ ശ്രമിക്കു എന്നായിരുന്നു ഒരാള്‍ കുറിച്ചത്. മ്യൂച്ചല്‍ കണ്‍സന്റ് ഉണ്ട് എങ്കില്‍ ഇതൊന്നും ഒരു പ്രശ്‌നമല്ല. പക്ഷേ, കൊറോണ ടൈമില്‍ ഒരു പ്രശ്‌നമല്ലേ. എന്നൊക്കെയായിരുന്നു മറ്റ് ചില കമന്റുകള്‍.

അതേസമയം, ഷംന ഇതാദ്യമായല്ല ഇത്തരത്തിലുള്ള സ്നേഹ പ്രകടനം നടത്തുന്നത്. ഇതേ റിയാലിറ്റി ഷോയില്‍ താരം കഴിഞ്ഞ വര്‍ഷവും സമാനമായ സന്തോഷ പ്രകടനം നടത്തിയിരുന്നു. എന്നാല്‍ അന്ന് ഇത്തരം വിവാദങ്ങളിലേക്കും വിമര്‍ശനങ്ങളിലേക്കും കാര്യങ്ങള്‍ കടന്നിരുന്നില്ല. ഇപ്പോഴത്തെ വിവാദത്തിന് കാരണമായ വീഡിയോ ലക്ഷക്കണക്കിന് പേരാണ് സോഷ്യല്‍ മീഡിയയിലൂടെ കണ്ടിട്ടുള്ളത്. എന്തായാലും താരം ഇപ്പോള്‍ വിവാദത്തില്‍ മറുപടിയുമായി രംഗത്തെത്തിയതോടെ വിഷയം കൂടുതല്‍ ചര്‍ച്ചകളിലേക്ക് കടക്കാനാണ് സാധ്യത.

English summary

Shamna Kasim Befitting Reply To Those Moke Her Goes Viral And Trending, Here's how