ലോറി കരക്കെത്തിച്ചു; മൃതദേഹഭാ​ഗങ്ങൾ തുടർനടപടികൾക്ക് കൊണ്ടുപോയി, ഡിഎൻഎ പരിശോധന നടത്തും

ഷീരൂർ: ഷിരൂരിൽ മണ്ണിടിച്ചിലിൽ കാണാതായ അർജുന്റെ ലോറിക്കകത്ത് ഉണ്ടായിരുന്ന മൃതദേഹ ഭാ​ഗങ്ങൾ പുറത്തെടുത്ത് തുടർനടപടികൾക്ക് കൊണ്ടുപോയി. ഡി എൻ എ പരിശോധന നടത്തും. പരിശോധന ഫലം സ്ഥിരീകരിച്ച ശേഷമാകും മൃതദേഹം ബന്ധുക്കൾക്ക് വിട്ടുകൊടുക്കുക. ലോറിയുടെ കാബിനകത്ത് കണ്ടെത്തിയ മൃതദേഹം എസ് ഡി ആർ എഫ് ഉദ്യോ​ഗസ്ഥന്ഡ പരിശോധന നടത്തിയ ശേഷമാണ് പുറത്തെടുത്തത്.

ക്രെയിൻ അടക്കമുള്ള യന്ത്ര സഹായത്തോടെയായിരുന്നു ലോറിയുടെ ഭാ​ഗങ്ങൾ കരയ്ക്കെത്തിച്ചത്. കരയിൽ നിന്ന് 65 മിറ്റർ അകലെയാണ് ലോറി കണ്ടെത്തിയത്. ലോഹ ഭാ​ഗത്തിന്റെ സി​​ഗ്നൽ ലഭിച്ച സി പി രണ്ട് പോയിന്റിൽ നടത്തിയ തിരച്ചിലിലാണ് 12 മീറ്റർ ആഴത്തിൽ നിന്നും ലോറിയുയർത്തിയത്. അപകടം നടന്ന് 71 ാം ദിവസമാണ് ലോറി കണ്ടെത്തിയത്.

റിട്ട. മേജർ ജനറൽ ഇന്ദ്രബാലൻ അടയാളപ്പെടുത്തിയ മേഖലയിലാണ് ഡ്രഡ്ജർ ഉപയോ​ഗിച്ചുള്ള തിരച്ചിൽ ഇന്ന് നടത്തിയത്. ഐ ബോഡ് പരിശോധനയിൽ ജി പി എസ് സംവിധാനം ഉപയോ​ഗിച്ച് അടയാളപ്പെടുത്തിയ ഭാ​ഗമാണ്. നാവിക സേനയുടെ സംഘം അടക്കമാണ് തിരച്ചിലിന് ഉണ്ടായിരുന്നത്.

രാവിലെ മുങ്ങൽ വിദ​​ഗ്ധർ പുഴയിൽ പരിശോധന നടത്തിയപ്പോൾ‌ വലിയ വാഹന ഭാ​ഗം കണ്ടെത്തിയിരുന്നു. പിന്നാലെ അണ്ടർ വാട്ടർ കാമറയുടെ സഹായത്തോടെ ചിത്രം പകർത്തി ലോറി ആണെന്ന് ഉറപ്പ് വരുത്തി. വീണ്ടും കൂടുതൽ മുങ്ങൽ വിദ​ഗ്ധർ ഇവിടം പരിശോധിച്ചു. പിന്നാലെയാണ് ലോറി ഉയർത്താനുള്ള നടപടികൾ ആരംഭിച്ചത്.

ജൂലായ് 16 നാണ് രാവിലെയാണ് ഉത്തര കർണാടകയിലെ ഷിരൂരിൽ മണ്ണ് ഇടിഞ്ഞത് അർജുൻ ഉൾപ്പെടെ ഉള്ള 11 പേരെ കാണാതായി. 8 പേരുടെ മൃതദേഹം ലഭിച്ചു. എന്നാൽ അർജുന്റേയും ഷിരൂർ സ്വദേശി ജ​ഗന്നാഥ്, ​ഗം​ഗേകൊല്ല സ്വദേശി ലോകേഷ് എന്നിവരെയും കണ്ടെത്താനായില്ല. പ്രതികൂല കാലാവസ്ഥയായിരുന്നു രക്ഷാപ്രവർത്തനത്തിന് തടസമായത്. മഴ കാരണം രക്ഷാദൗത്യം തടസ്സപ്പെട്ടും ദിവസങ്ങളോളം തിരച്ചിൽ നിർത്തി വെച്ചു. ‌

ഓ​ഗസ്റ്റ് 16 നാണ് തിരച്ചിൽ നിർത്തിയത്. പിന്നീട് അർജുന്റെ കുടുംബം കർടാക മുഖ്യമന്ത്രിയെ കണ്ട് അഭ്യർത്ഥിച്ചതിന് പിന്നാലെയാണ് വീണ്ടും തിരച്ചിൽ തുടർന്നത്. ഡ്രഡ്ജറെത്തിച്ചാണ് തിരച്ചിൽ വീണ്ടും ആരംഭിച്ചത്. അതേ സമയം, കാണാതായ കർണാടക സ്വദേശികൾക്കായുള്ള തിരച്ചിൽ തുടരും എന്ന് എം എൽ എ അറിയിച്ചു.