വാര്‍ത്ത അവതാരകയായി സിന്ധു ജോയ്

തിരുവനന്തപുരം: രാഷ്ട്രീയ നേതാവായ സിന്ധു ജോയിയ്ക്ക് ഇനി പുതിയ വേഷം. വാര്‍ത്ത അവതാരകയുടെ വേഷത്തിലാണ് പ്രേക്ഷകര്‍ക്ക് ഇനി സിന്ധുവിനെ കാണാന്‍ കഴിയുക. എസ്എഫ്‌ഐയുടെ കരുത്തയായ നേതാവെന്ന നിലയ്ക്ക് ശ്രദ്ധനേടിയ സിന്ധു പിന്നീട് സിപിഎമ്മിലെ അവഗണനയില്‍ മനംമടുത്ത് കോണ്‍ഗ്രസില്‍ ചേരുകയായിരുന്നു. എന്നാല്‍ നിയമസഭാ തിരഞ്ഞെടുപ്പ് കഴിഞ്ഞതോടെ കോണ്‍ഗ്രസിലും കാര്യമായ റോളൊന്നുമില്ലാതിരുന്ന സിന്ധു വീണ്ടും സജീവമായിരിക്കുന്നത് മലയാളി ഹൗസ് എന്ന റിയാലിറ്റി ഷോയിലൂടെയാണ്.

സൂര്യ ടിവിയില്‍ സംപ്രേഷണം ചെയ്ത പരിപാടിയില്‍ സിന്ധു ഫൈനല്‍ വരെ എത്തിയിരുന്നു. പരിപാടിയുടെ വിജയത്തിന് പിന്നാലെ ഇപ്പോള്‍ സിന്ധു ജോയ് സൂര്യ ടിവിയില്‍ത്തന്നെ വാര്‍ത്ത അവതാരകയുടെ വേഷമണിയുകയാണ്. വാര്‍ത്ത അവതാരകയെന്ന നിലയില്‍ സിന്ധുവിന്റെ അരങ്ങേറ്റം നടന്നുകഴിഞ്ഞു.

റിയാലിറ്റിഷോയില്‍ പങ്കെടുക്കുന്ന സമയത്ത് തനിയ്ക്ക് സിപിഎമ്മിലേയ്ക്കുതന്നെ തിരിച്ചെത്താന്‍ താല്‍പര്യമുണ്ടെന്ന് സിന്ധു വ്യക്തമാക്കിയിരുന്നു. എന്നാല്‍ സിപിഎമ്മിന്റെ ഭാഗത്തുനിന്നും ഇതിന് അനൂകൂലമായ നീക്കങ്ങളൊന്നും ഇതുവരെയുണ്ടായിട്ടില്ല. അതുകൊണ്ടാണ് രാഷ്ട്രീയമെന്ന സ്വപ്‌നം മാറ്റിവച്ച് തല്‍ക്കാലം സിന്ധു വാര്‍ത്ത അവതാരകയായിരിക്കുകയാണ്.

കേരള സര്‍വ്വകലാശാലയില്‍ നിന്നും പിഎച്ച്ഡി നേടിയ സിന്ധു ജേര്‍ണലിസത്തില്‍ പിജി ഡിപ്ലോമ ചെയ്തിട്ടുണ്ട്.

English summary

Politician Sindhu Joy is now in a new role, she is joined Surya TV as a news presenter.