പേരില്ലെങ്കിൽ വോട്ടില്ല! SIR അന്തിമ പട്ടികയിൽ പേര് ഉറപ്പാക്കാം; അപ്പീൽ നൽകേണ്ടത് ഇങ്ങനെ

കേരളത്തിൽ സ്പെഷ്യൽ ഇന്റൻസീവ് റിവിഷൻ (SIR) നടപടികൾ പൂർത്തിയാക്കി അന്തിമ വോട്ടർ പട്ടിക പ്രസിദ്ധീകരിച്ചു. എന്നാൽ, ഹിയറിംഗ് നടപടികൾക്ക് ശേഷവും വോട്ടർ പട്ടികയിൽ പേര് ഉൾപ്പെടാത്തവർക്കും, അർഹതയുണ്ടായിട്ടും ഒഴിവാക്കപ്പെട്ടവർക്കും നിയമപരമായ അപ്പീൽ നൽകാൻ അവസരമുണ്ടെന്ന് തിരഞ്ഞെടുപ്പ് കമ്മീഷൻ വ്യക്തമാക്കി. വോട്ടർ പട്ടികയിൽ പേര് ചേർക്കുന്നതിനോ ഒഴിവാക്കുന്നതിനോ എതിരെ പരാതിയുള്ളവർക്ക് ഈ അവസരം പ്രയോജനപ്പെടുത്താം.

അപ്പീൽ നൽകേണ്ടത് എങ്ങനെ?

രണ്ട് ഘട്ടങ്ങളിലായാണ് അപ്പീൽ സമർപ്പിക്കാൻ സാധിക്കുന്നത്:

*ഒന്നാം അപ്പീൽ: ഇലക്ടറൽ രജിസ്ട്രേഷൻ ഓഫീസറുടെ (ERO) തീരുമാനത്തിനെതിരെ ജില്ലാ തിരഞ്ഞെടുപ്പ് ഓഫീസർക്ക് (ജില്ലാ കളക്ടർ) അപ്പീൽ നൽകാം. തീരുമാനം അറിഞ്ഞ് 15 ദിവസത്തിനകം വേണം ഈ അപ്പീൽ സമർപ്പിക്കാൻ. 1950-ലെ ജനപ്രാതിനിധ്യ നിയമത്തിലെ സെക്ഷൻ 24(a) പ്രകാരമാണ് ഈ നടപടി.

*രണ്ടാം അപ്പീൽ: ജില്ലാ തിരഞ്ഞെടുപ്പ് ഓഫീസറുടെ ഉത്തരവിൽ തൃപ്തരല്ലെങ്കിൽ, സെക്ഷൻ 24(b) പ്രകാരം സംസ്ഥാന മുഖ്യ തിരഞ്ഞെടുപ്പ് ഓഫീസർക്ക് (CEO) രണ്ടാം അപ്പീൽ നൽകാം. ഒന്നാം അപ്പീലിലെ ഉത്തരവ് ലഭിച്ച് 30 ദിവസത്തിനകം ഇതിനായി അപേക്ഷിക്കണം.

ഓൺലൈനായി പേര് പരിശോധിക്കാം

അന്തിമ വോട്ടർ പട്ടികയിൽ നിങ്ങളുടെ പേരുണ്ടോ എന്ന് പരിശോധിക്കാൻ താഴെ പറയുന്ന വഴികൾ ഉപയോഗിക്കാം:

ECI വെബ്സൈറ്റ്: https://electoralsearch.eci.gov.in എന്ന സൈറ്റിൽ വോട്ടർ ഐഡി നമ്പറോ, പേരോ, മൊബൈൽ നമ്പറോ ഉപയോഗിച്ച് പരിശോധിക്കാം.

CEO കേരള വെബ്സൈറ്റ്: https://www.ceo.kerala.gov.in എന്ന വെബ്സൈറ്റിലെ 'Kerala SIR Final Electoral Roll 2026' എന്ന ലിങ്കിലൂടെ ബൂത്ത് തല പട്ടിക പരിശോധിക്കാം.

ECI പോർട്ടൽ: https://voters.eci.gov.in/downloaderoll?stateCode=S11 എന്ന ലിങ്ക് വഴിയും പട്ടിക ഡൗൺലോഡ് ചെയ്യാം.

പുതിയ പേര് ചേർക്കാൻ ഇനിയും അവസരം
അന്തിമ പട്ടിക പ്രസിദ്ധീകരിച്ചെങ്കിലും പുതിയതായി പേര് ചേർക്കാനുള്ള അവസരം അവസാനിച്ചിട്ടില്ല. നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കാനുള്ള അവസാന തീയതി വരെ വോട്ടർ പട്ടികയിൽ പേര് ചേർക്കാൻ അപേക്ഷിക്കാമെന്ന് അധികൃതർ അറിയിച്ചു.

ജനാധിപത്യ പ്രക്രിയയിൽ നിങ്ങളുടെ പങ്കാളിത്തം ഉറപ്പാക്കാൻ വോട്ടർ പട്ടികയിൽ പേരുണ്ടെന്ന് ഉറപ്പുവരുത്തുക. ഇനിയും പേര് ചേർക്കാത്തവർ ഉടൻ തന്നെ ഓൺലൈൻ വഴിയോ അക്ഷയ കേന്ദ്രങ്ങൾ വഴിയോ അപേക്ഷ സമർപ്പിക്കുക.