സോളാര്‍ വീണ്ടും സജീവമാകുന്നു, ശാലു എവിടെ?

കോട്ടയം: സരിത എസ് നായരുടെ ജയില്‍ മോചനത്തിലൂടെ സോളാര്‍ തട്ടിപ്പ് കേസ് വീണ്ടും സജീവമാകുയാണ്. ശാലു മേനോന്‍ ജാമ്യം ലഭിച്ച് പുറത്തിറങ്ങിയപ്പോള്‍ തന്നെ വൈകാതെ സരിയും ഇതുപോലെ ജാമ്യത്തിലിറങ്ങുമെന്ന് പലരും പറഞ്ഞിരുന്നു. അല്ല, ഈ ശാലു മേനോന്‍ എവിടെപ്പോയി.

സോളാര്‍ കേസ് വീണ്ടും സജീവമാകുമ്പോള്‍ ശാലു മേനോന്‍ അഭിനയത്തിലും നൃത്തത്തിലും സജീവമാകുകയാണ്. വിവാദങ്ങളില്‍ നിന്നെല്ലാം വിട്ടു നില്‍ക്കാനാണ് താന്‍ ആഗ്രഹിക്കുന്നതെന്ന് ശാലു പറയുന്നു. സോളാറിലൂടെ നഷ്ടപ്പെട്ട പ്രതിച്ഛായ തിരിച്ചുപിടിക്കാനുള്ള തിരക്കിലാണ് ശാലു.

സരിതയുടെ ജയില്‍ മോചനത്തെ കുറിച്ചും സോളാര്‍ കേസിനെ കുറിച്ചും ചോദിക്കുമ്പോള്‍ തനിക്കതിനെ കുറിച്ച് സംസാരിക്കാന്‍ താത്പര്യമില്ലെന്നായിരുന്നു ശാലുവിന്റെ പ്രതികരണം. ഇപ്പോള്‍ സ്ത്രീകള്‍ക്കെതിരെയുള്ള അതിക്രമങ്ങളോട് പ്രതികരിക്കുന്ന ദ്രൗപതി എന്ന നൃത്തശില്പം ഒരുക്കുന്ന തയ്യാറെടുപ്പിലാണ് നടി.

സ്ത്രീകള്‍ക്കെതിരെയുള്ള അതിക്രമങ്ങള്‍ വര്‍ധിക്കുകയാണെമന്നും അതിനോട് പ്രതികരിക്കണമെന്നും തോന്നി. അതിനുള്ള മാധ്യമമാണ് ഈ നൃത്ത ശില്‍പമെന്നും അധികം വൈകാതെ ദ്രൗപതി അരങ്ങിലെത്തുമെന്നും ശാലു മേനോന്‍ പറഞ്ഞു.

സോളാര്‍ തട്ടിപ്പുകേസില്‍ ഒന്നാം പ്രതി ബിജു രാധാകൃഷ്ണനെ രക്ഷപ്പെടാന്‍ സഹായിച്ചു എന്ന കേസിലാണ് ശാലുവിനെ ആദ്യം അറസ്റ്റ് ചെയ്തത്. എന്നാല്‍ പിന്നീട് തട്ടിപ്പില്‍ ശാലുവിനും പങ്കുണ്ടെന്ന് കണ്ടെത്തുകയായിരുന്നു. തിരുവനന്തപുരം സ്വദേശി റാസിഖ് അലിയെന്നയാള്‍ നല്‍കിയ പരാതിയെ തുടര്‍ന്നാണ് ശാലുമേനോന്‍ അറസ്റ്റിലാവുന്നത്. ശാലുവിനെതിരെയുള്ള കേസുകള്‍ ഇപ്പോള്‍ കോടതിയുടെ പരിഗണനയിലാണ്.

English summary

Solar scam became hot again, where is Shalu Menon.