കൊവിഡ് വാക്‌സിന്‍ മുന്‍ഗണനാ പട്ടിക പുതുക്കി, ചേർത്തത് 11 വിഭാഗങ്ങളെ കൂടി

തിരുവനന്തപുരം: സംസ്ഥാനത്ത് കൊവിഡ് വാക്‌സിന്‍ മുന്‍ഗണനാ പട്ടിക പുതുക്കി.
ഹജ്ജ് തീര്‍ത്ഥാടകര്‍, കിടപ്പ് രോഗികള്‍, ബാങ്ക് ജീവനക്കാര്‍, ആദിവാസി കോളനികളിലെ 18ന് മുകളില്‍ പ്രായമുളളവര്‍ എന്നിവരെ കൊവിഡ് വാക്‌സിന്‍ മുന്‍ഗണനാ പട്ടികയിൽ ഉൾപ്പെടുത്തി. പുതിയ 11 വിഭാഗങ്ങളെ കൂടിയാണ് പട്ടികയിൽ ചേർത്തിരിക്കുന്നത്. നേരത്തെ 32 വിഭാഗങ്ങളെ കൊവിഡ് വാക്‌സിന്‍ മുന്‍ഗണനാ പട്ടികയിൽ ഉൾപ്പെടുത്തിയിരുന്നു.

ഫീല്‍ഡില്‍ ജോലി ചെയ്യുന്ന വളണ്ടിയര്‍മാര്‍, മെട്രോ ട്രെയിന്‍, വാട്ടര്‍ മെട്രോ ഫീല്‍ഡ് ജീവനക്കാര്‍, പോലീസ് ട്രെയിനി, ബാങ്ക് ജീവനക്കാര്‍, മെഡിക്കല്‍ റെപ്രസെന്റേറ്റീവുകള്‍, എന്നിവരും പുതുക്കിയ പട്ടികയിലുണ്ട്.

അതിനിടെ സംസ്ഥാനത്ത് ഇന്ന് ഇന്ന് 19,661 പേര്‍ക്ക് കോവിഡ്-19 സ്ഥിരീകരിച്ചു. തിരുവനന്തപുരം 2380, മലപ്പുറം 2346, എറണാകുളം 2325, പാലക്കാട് 2117, കൊല്ലം 1906, ആലപ്പുഴ 1758, കോഴിക്കോട് 1513, തൃശൂര്‍ 1401, ഇടുക്കി 917, കോട്ടയം 846, കണ്ണൂര്‍ 746, പത്തനംതിട്ട 638, കാസര്‍ഗോഡ് 461, വയനാട് 307 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്.

കഴിഞ്ഞ ദിവസങ്ങളിലുണ്ടായ 213 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 9222 ആയി. ഇന്ന് രോഗം സ്ഥിരീകരിച്ചവരില്‍ 156 പേര്‍ സംസ്ഥാനത്തിന് പുറത്ത് നിന്നും വന്നവരാണ്. 18,340 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. 1081 പേരുടെ സമ്പര്‍ക്ക ഉറവിടം വ്യക്തമല്ല. രോഗം സ്ഥിരീകരിച്ച് ചികിത്സയിലായിരുന്ന 29,708 പേര്‍ രോഗമുക്തി നേടി. ഇതോടെ 1,92,165 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 23,64,210 പേര്‍ ഇതുവരെ കോവിഡില്‍ നിന്നും മുക്തി നേടി.

English summary

State Government updated Covid vaccine priority list