സ്കൂള് കായികോത്സവം;അജ്മലും വിനിയും വേഗമേറിയ താരങ്ങള്...പാലക്കാടിന് ഇരട്ട സ്വര്ണ്ണം...
സംസ്ഥാന സ്കൂള് കായികോത്സവത്തില് പാലക്കാടിന്റെ അജ്മലും വിനിയും വേഗമേറിയ താരങ്ങളായി
തേഞ്ഞിപ്പലം: സംസ്ഥാന സ്കൂള് കായികോത്സവത്തില് പാലക്കാടിന്റെ അജ്മലും വിനിയും വേഗമേറിയ താരങ്ങളായി. സീനിയര് ആണ്കുട്ടികളുടെ 100 മീറ്ററില് 10.96 സെക്കന്റിലാണ് പാലക്കാട് കല്ലടി സ്കൂളിലെ അജ്മല് ഫിനിഷ് ചെയ്തത്. സീനിയര് പെണ്കുട്ടികളുടെ 100 മീറ്ററില് 12.63 സെക്കന്റിലാണ് പാലക്കാട് മുണ്ടൂര് സ്കൂളിലെ വിനി പി വി ഒന്നാമതെത്തിയത്. ഈ രണ്ടു വിജയത്തോടെ സീനിയര് വിഭാഗം 100 മീറ്ററില് പാലക്കാട് ഇരട്ട സ്വര്ണ്ണം നേടി.
100 മീറ്റര് ജൂനിയര് ആണ്കുട്ടികളുടെ വിഭാഗത്തില് തിരുവനന്തപുരം സായിയിലെ സി അഭിനവും,ജൂനിയര് പെണ്കുട്ടികളുടെ 100 മീറ്ററില് സോഫിയ സണ്ണിയും ഒന്നാമതെത്തി. സബ്ജൂനിയര് ആണ്കുട്ടികളുടെ 100 മീറ്ററില് മലപ്പുറം കടകശേരി സ്കൂളിലെ ശ്രീരാഗും, സബ്ജൂനിയര് പെണ്കുട്ടികളുടെ 100 മീറ്ററില് കോഴിക്കോട് ഉഷ സ്കൂളിലെ എല്ഗയും ഒന്നാമതായി ഫിനിഷ് ചെയ്തു.
100 മീറ്ററില് വടക്കന് ജില്ലകളിലെ സ്കൂളുകളുടെ ആധിപത്യമാണ് കാണാന് കഴിഞ്ഞത്.കലിക്കറ്റ് സര്വകലാശാല സ്റ്റേഡിയത്തില് പുരോഗമിക്കുന്ന സംസ്ഥാന സ്കൂള് കായികോത്സവത്തില് എറണാകുളം ജില്ല മുന്നേറ്റം തുടരുന്നു.