പറമ്പ് വൃത്തിയാക്കുകയായിരുന്ന തൊഴിലാളികള് കണ്ടത്, പിന്നെ ഒന്നും നോക്കിയില്ല: പോലീസിനെ വിളിച്ചു
ഇരിട്ടിയില് പറമ്പ് വൃത്തിയാക്കുന്നതിനിടെ ബോംബ് കണ്ടെത്തി. ഇരിട്ടി വള്ളിയാട്ടാണ് സംഭവം. ഉഗ്രശേഷിയുള്ള ഏഴ് ബോംബുകളാണ് കണ്ടെത്തിയത്. ഉടന് തന്നെ തൊഴിലാളികള് സംഭവം പോലീസില് അറിയിക്കുകയായിരുന്നു.
ഇരിട്ടി: ഇരിട്ടിയില് പറമ്പ് വൃത്തിയാക്കുന്നതിനിടെ ബോംബ് കണ്ടെത്തി. ഇരിട്ടി വള്ളിയാട്ടാണ് സംഭവം. ഉഗ്രശേഷിയുള്ള ഏഴ് ബോംബുകളാണ് കണ്ടെത്തിയത്. ഉടന് തന്നെ തൊഴിലാളികള് സംഭവം പോലീസില് അറിയിക്കുകയായിരുന്നു.
ആളൊഴിഞ്ഞ പറമ്പിലെ കാട് വെട്ടിത്തെളിക്കുന്നതിനിടെയായിരുന്നു സംഭവം. പറമ്പില് പ്ലാസ്റ്റിക് ബക്കറ്റിനകത്തെ പൊതിക്കെട്ട് ശ്രദ്ധയില്പ്പെട്ട തൊഴിലാളികള് സംശയം തോന്നിയതിനെ തുടര്ന്ന് പോലീസിനെ വിളിക്കുകയായിരുന്നു. പെയിന്റിന്റെ പ്ലാസ്റ്റിക് ബക്കറ്റിനകത്താണ് ബോംബുകള് സൂക്ഷിച്ചിരുന്നത്.
വ്യാഴാഴ്ച വൈകിട്ടാണ് ബോംബുകള് കണ്ടെത്തിയത്. ആറ് സ്റ്റീല് ബോംബുകളും ഒരു പ്ലാസ്റ്റിക് കണ്ടെയ്നര് ബോംബുമാണ് കണ്ടെത്തിയത്. ഇവയെല്ലാം തന്നെ ഉഗ്രശേഷിയുളള ബോംബുകളാണ്.
ഇരിട്ടി എസ്ഐ സഞ്ജയ്കുമാറിന്റെയും എഎസ്ഐ കെകെ രാജേഷിന്റെയും നേതൃത്വത്തില് പോലീസും കണ്ണരില് നിന്നെത്തിയ ബോംബ് സ്ക്വാഡും ചേര്ന്ന് പരിശോധിച്ചു. അടുത്തുള്ള ക്വാറിയില് എത്തിച്ച് ബോംബ് നിര്വീര്യമാക്കിയിട്ടുണ്ട്. ബോംബുകള് അടുത്തിടെ നിര്മ്മിച്ചവയാണെന്നാണ് പോലീസ് പറുന്നത്. സംഭവത്തില് അന്വേഷണം ആരംഭിച്ചു.