കുട്ടികളെ പുറത്താക്കി വീട് പൂട്ടി രണ്ടാനമ്മ സ്ഥലം വിട്ടു; പെരുവഴിയില്‍ കിടന്നത് രണ്ട് ദിവസം...

മലപ്പുറം: രണ്ടാനമ്മമാര്‍ മക്കളോട് കാണിക്കുന്ന ക്രൂരതകള്‍ വാര്‍ത്തകളാകാറുണ്ട്. മലപ്പുറത്ത് രണ്ടാനമ്മ മൂന്ന് ചെറിയ കുട്ടികളോട് കാണിച്ച ക്രൂരത കണ്ട് ഞെട്ടിയിരിക്കുകയാണ് ബന്ധുക്കളും നാട്ടുകാരും. മൂന്ന് വയസ് മുതല്‍ പതിനാല് വയസ് വരെ പ്രായമുള്ള കുട്ടികളെ വീടിന് പുറത്താക്കി വാതില്‍ പൂട്ടി രണ്ടാനമ്മ സ്ഥലം വിട്ടു. ഒടുവില്‍ പട്ടിണികിടന്ന് അവശരായ കുട്ടികള്‍ക്ക് തുണയായത് ബന്ധുക്കളാണ്.

രണ്ട് ദിവസമാണ് കുട്ടികള്‍ പട്ടിണി കിടന്ന് പെരുവഴിയില്‍ കിടന്നത്. തിരൂര്‍ കൂട്ടായിലാണ് രണ്ടാനമ്മയുടെ ക്രൂരത നടന്നത്. കുട്ടികളുടെ പിതാവ് വിദേശത്തേക്ക് പോയതോടെ നാല് ആണ്‍കുട്ടികളെ വീടിന് പുറത്താക്കി വാതിലടച്ച് രണ്ടാനമ്മ സ്വന്തം വീട്ടിലേക്ക് പോവുകയായിരുന്നു. കരഞ്ഞ് പറഞ്ഞിട്ട് പോലും അവര്‍ വാതില്‍ തുറന്ന് കൊടുത്തില്ല.

കുട്ടികളെ പുറത്തിറക്കി വിട്ട് പുസ്തകങ്ങളും ബാഗും പുറത്തേക്കെറിഞതിന് ശേഷം വീടും ഗേറ്റും പൂട്ടി രണ്ടാനമ്മ പോയി. ഇതോടെ മൂന്ന് വയസുകാരനടക്കം പെരുവഴിയിലായി. രണ്ട് ദിവസത്തോളം വീടിന് പുറത്ത് നിന്ന കുട്ടികളെ രാത്രിയില്‍ ബന്ധുക്കള്‍ വീട്ടിലേക്ക് കൊണ്ടുപോയി. ബന്ധുക്കളാണ് ഭക്ഷണവും വെള്ളവും നല്‍കിയത്. അപ്പോഴേക്കും കുട്ടികളുടെ ആരോഗ്യനില വഷളായിരുന്നു.

ബന്ധുക്കല്‍ അറിയിച്ചതിനെ തുടര്‍ന്ന് ചൈല്‍ഡ് ലൈന്‍ പ്രവര്‍ത്തകര്‍ എത്തി കുട്ടികളെ ആശുപത്രിയിലാക്കി. ഇതോടെയാണ് സംഭവം പുറത്തറിഞ്ഞത്. രണ്ടാനമ്മ ക്രൂരമായി പീഡിപ്പിച്ചിരുന്നെന്നാണ് കുട്ടകള്‍ ചൈല്‍ഡ് ലൈന്‍ പ്രവര്‍ത്തകരോട് പറഞ്ഞത്. ചൈല്‍ഡ് ലൈന്‍ പ്രവര്‍ത്തകര്‍ ഇടപെട്ടതോടെ കുട്ടികളുടെ സംരക്ഷണം ബന്ധുക്കള്‍ ഏറ്റെടുത്തു. രണ്ടാനമ്മയ്ക്കതെിരെ കേസെടുത്തിട്ടുണ്ട്. അവരെ ഇന്ന് അറസ്റ്റ് ചെയ്‌തേക്കും. ചൈല്‍ഡ് ലൈന്‍ പ്രവര്‍ത്തകരും ബന്ധുക്കളും ഗള്‍ഫിലുള്ള പിതാവിനെ വിവരമറിയിച്ചിട്ടുണ്ട്.

വണ്‍ഇന്ത്യയിലേക്ക് നിങ്ങള്‍ക്കും വാര്‍ത്തകളും ഫോട്ടോകളും അയയ്ക്കാം. ഉചിതമായവ പ്രസിദ്ധീകരിക്കും. അയയ്‌ക്കേണ്ട വിലാസം [email protected]

English summary

Step mothers cruelty to children in Malappuram.