പ്രവാസികളില്‍ കൊവിഡ് ടെസ്റ്റിന് പണം ഈടാക്കുന്നത് അവസാനിപ്പിക്കണം: എംഎം ഹസ്സന്‍

തിരുവനന്തപുരം: ഗള്‍ഫില്‍ നിന്നും നാട്ടിലെത്തുന്ന പ്രവാസികളില്‍ നിന്നും കോവിഡ് പരിശോധനയ്ക്ക് പണം ഈടാക്കുന്ന നടപടി അവസാനിപ്പിക്കണമെന്ന് മുഖ്യമന്ത്രിയോട് യുഡിഎഫ് കണ്‍വീനര്‍ എംഎം ഹസ്സന്‍ ആവശ്യപ്പെട്ടു.

ഗള്‍ഫില്‍ നിന്നും സ്വന്തം കയ്യില്‍ നിന്നും പണം മുടക്കി ആര്‍ടിപിസിആര്‍ പരിശോധന നടത്തിയ ശേഷമാണ് പ്രവാസികള്‍ നാട്ടിലെത്തുന്നത്. കേരളത്തിലെത്തുമ്പോള്‍ വിമാനത്താവളത്തില്‍ വെച്ച് വീണ്ടും 1800 രൂപ മുടക്കി ആര്‍ടിപിസിആര്‍ ടെസ്റ്റ് നടത്തണമെന്ന നിലപാട് പ്രവാസികള്‍ക്ക് സാമ്പത്തിക ബുദ്ധിമുട്ട് ഉണ്ടാക്കുന്നതാണ്.

കുടുംബസമേതം മടങ്ങിയെത്തുന്ന പ്രവാസിക്ക് കോവിഡ് പരിശോധനയുടെ പേരില്‍ ഗള്‍ഫിലും കേരളത്തിലുമായി വലിയ തുക ചെലവാക്കേണ്ടി വരും.കേരളത്തിലെത്തുന്ന പ്രവാസികളുടെ ആര്‍ടിപിസിആര്‍ ടെസ്റ്റിനുള്ള ചെലവ് നോര്‍ക്കയില്‍ നിന്നും നല്‍കാന്‍ സര്‍ക്കാര്‍ തയ്യാറാകണം. ഇത് പ്രവാസികള്‍ക്ക് വളരെയധികം ആശ്വാസം നല്‍കുമെന്നും ഹസ്സന്‍ മുഖ്യമന്ത്രിയോട് ആവശ്യപ്പെട്ടു.