കാമ്പസിനുള്ളില്‍ ബൈക്കപകടം; വിദ്യാര്‍ഥിനി ഗുരുതരാവസ്ഥയില്‍

കൊല്ലം: കാമ്പസിനുള്ളില്‍ വീണ്ടും വാഹനാപകടം. ശാസ്താംകോട്ട ഡി.ബി കോളേജില്‍ കാമ്പസില്‍വെച്ച് ബൈക്കിടിച്ച് ഗുരുതരമായി പരിക്കേറ്റ വിദ്യാര്‍ഥിനിയെ സ്വകാര്യ ആശുപത്രിയില്‍ പ്രവേശിപ്പിച്ചു. കോളേജിലെ രണ്ടാം വര്‍ഷ ഹിന്ദി ബിരുദ വിദ്യാര്‍ത്ഥിനി സൈന(19) ആണ് അപകടത്തില്‍പ്പെട്ടത്. ശാസ്താംകോട്ട പോരുവഴി സ്വദേശി പുത്തന്‍വിളതെക്കവില്‍ സിദ്ദിഖിന്റെ ഭാര്യയാണ് സൈന.

കാമ്പസിനുള്ളില്‍വെച്ച് വിദ്യാര്‍ഥി അലക്ഷ്യമായി വാഹനമോടിച്ചതാണ് അപകടത്തിനിടയാക്കിയെന്നാണ് വിവരം. കോളേജ് ക്യാമ്പസിന്റെ രണ്ട് ഗേറ്റുകള്‍ക്കിടയിലുള്ള പാര്‍ക്കിങ് ഏരിയയില്‍ നിന്ന് ബൈക്കുമായി പുറത്തേക്ക് വന്ന വിദ്യാര്‍ത്ഥി സൈനയെ ഇടിക്കുകയായിരുന്നു. ഇടിയുടെ ആഘാതത്തില്‍ തെറിച്ചുവീണ പെണ്‍കുട്ടിയെ ഉടന്‍ ആശുപത്രിയില്‍ പ്രവേശിപ്പിക്കുകയായിരുന്നു.

വിദ്യാര്‍ഥി കാമ്പസിനകത്ത് അമിതവേഗതയിലാണ് ബൈക്കോടിച്ചിരുന്നതെന്നാണ് റിപ്പോര്‍ട്ട്. ശക്തമായ ഇടിയില്‍ തെറിച്ചുവീണ പെണ്‍കുട്ടിയുടെ തലയ്ക്കാണ് ഗുരുതര പരിക്കേറ്റത്. വൈകിട്ട് നാലുമണിയോടെയാണ് സംഭവം. സംഭവത്തില്‍ ശാസ്താംകോട്ട പോലീസ് അന്വേഷണം ആരംഭിച്ചു.

നേരത്തെ തിരുവനന്തപുരം സിഇടി എഞ്ചിനീയറിങ് കോളേജിലെ ഓണാഘോഷത്തിനിടയില്‍ ജീപ്പിടിച്ച് വിദ്യാര്‍ഥിനി മരിച്ചത് ഏറെ വിവാദത്തിനിടയാക്കിയിരുന്നു. ഇതിനുശേഷം വിദ്യാര്‍ഥികള്‍ കാമ്പസിനകത്ത് വാഹനം കയറ്റുന്നതുമായി കര്‍ശന നിര്‍ദ്ദേശമുണ്ടെങ്കിലും മിക്ക കാമ്പസുകളിലും അത് പാലിക്കാറില്ലെന്ന് പറയപ്പെടുന്നു.

English summary

Student hit by bike on db college sasthamcotta kollam, condition critical