അങ്കണവാടിയിലെ ഫാന്‍ തലയില്‍ വീണ് ബാലികയ്ക്ക് പരിക്ക്, സംഭവം കാക്കനാട്

കാക്കനാട്: എറണാകുളം കാക്കനാട് അങ്കണവാടിയിലെ ഫാന്‍ തകര്‍ന്ന് വീണ് ബാലികയ്ക്ക് പരിക്ക്. എന്‍ജിഒ ക്വാര്‍ട്ടേഴ്‌സ് ജംഗ്ഷന് സമീപം രാജീവ് ദശലക്ഷം പാര്‍പ്പിട കോളനിയിലെ മനോജിന്റെ മകള്‍ അബിതയ്ക്കാണ് പരിക്കേറ്റത്. സീലിംഗ് ഫാന്‍ തകര്‍ന്ന് വീണ് അബിതയുടെ തലയ്ക്കും മൂക്കിനും പരിക്കേറ്റു.

തൃക്കാക്കര നഗരസഭയുടെ 33ാം നമ്പര്‍ അങ്കണവാടിയിലാണ് സംഭവം നടന്നത്. അങ്കണവാടിയ്ക്കകത്ത് പ്രാര്‍ത്ഥനയ്ക്ക് ശേഷം കസേരയിലിരുന്ന കളിയ്ക്കുകയായിരുന്ന അബിതയുടെ തലയിലേയ്ക്ക് കറങ്ങിക്കൊണ്ടിരുന്ന ഫാന്‍ അടര്‍ന്ന് വീഴുകയായിരുന്നു. അബിത കസേരയോടെ മറിഞ്ഞു വീണു. സംഭവ സമയം അബിത മാത്രമേ അങ്കണവാടിയില്‍ ഉണ്ടായിരുന്നുള്ളൂ. ആകെ അഞ്ചു കുട്ടികളാണ് ഇവിടെയുള്ളത്. കുട്ടികള്‍ എത്തി തുടങ്ങുന്ന സമയത്തായിരുന്നു അപകടം.

ഹോട്ടല്‍ ജീവനക്കാരായ മനോജിന്റേയും സബിതയുടേയും ഇളയ മകളാണ് അബിത. കുട്ടിയുടെ ചികിത്സ ചെലവ് നഗരസഭ വഹിയ്ക്കുമെന്ന് ആസുപത്രിയിലെത്തിയ നഗരസഭ അധ്യക്ഷ കെകെ നീനുവും വൈസ് ചെയര്‍മാന്‍ സാബു ഫ്രാന്‍സിസും പറഞ്ഞു.

English summary

Student injures as fan collapse in day care