നരേന്ദ്രമോദി കര്‍ത്താവിന്റെ ദാസനാണെന്ന് സണ്‍ഡേ ശാലോം

കൊച്ചി: രാജ്യത്തിന്റെ നന്മയ്ക്കും നല്ല ഭരണകൂടത്തിനും വേണ്ടി പ്രാര്‍ത്ഥിച്ച ക്രൈസ്തവര്‍ക്ക് ദൈവം തന്ന ഉത്തരമാണ് നരേന്ദ്രമോദിയെന്ന് സണ്‍ഡേ ശാലോം. നരേന്ദ്ര മോദിയുടെ വിജയം പൂര്‍ണമായും ദൈവ നിശ്ചയമാണെന്നാണ് സണ്‍ഡേ ശാലോം സ്ഥാപിച്ചെടുക്കുന്നത്.

എല്ലാ അധികാരങ്ങളും ദൈവത്തില്‍നിന്നാണ് വരുന്നത്. മോദിയിലൂടെ രാജ്യത്തെയും സഭയെയും ദൈവം രക്ഷിക്കും. ഈ തിരഞ്ഞെടുപ്പ് ഫലം ദൈവകരങ്ങളില്‍ നിന്നുള്ളതാണ്. ദൈവദത്തമായ ആധികാരത്തെ മാനിക്കാന്‍ ബൈബ്ള്‍ പഠിപ്പിക്കുന്നു. ദൈവം അറിയാതെയും അനുവദിക്കാതെയും ലോകത്ത് ഒന്നും തന്നെ സംഭവിക്കുന്നില്ല. അതുകൊണ്ട് തന്നെ മോദിയുടെ വിജയം ദൈവം അറിഞ്ഞ് അനുവദിച്ചതാണെന്നാണ് മുഖപ്രസംഗത്തില്‍ പറയുന്നത്.

പഞ്ചായത്ത് തിരഞ്ഞെടുപ്പില്‍ ബി ജെ പിയെ പിന്തുണയ്ക്കാന്‍ സഭ തയ്യാറെടുക്കുന്നു എന്ന വാര്‍ത്തകള്‍ക്ക് പിന്നാലെയാണ് മോദിയെ പ്രകീര്‍ത്തിച്ച് മുഖപ്രസംഗമെന്നത് ശ്രദ്ധേയമാണ്. അതേ സമയം കോണ്‍ഗ്രസിനെ പരോക്ഷമായി വിമര്‍ശിക്കുകയും ചെയ്യുന്നുണ്ട്. അധികാരം എപ്പോഴും ദുഷിപ്പിക്കുന്ന ഒന്നാണ്. ഒരു പാര്‍ട്ടി തന്നെ അധികാരം കൈയ്യാളുമ്പോള്‍ ഭരണം ജീര്‍ണിയ്ക്കും. അതുകൊണ്ട് കോണ്‍ഗ്രസിന്റെ പരാജയം ഇന്ത്യയുടെ ഭാവിയ്ക്ക് നല്ലതാണത്രെ.

രാജ്യത്തിന്റെ നന്മയ്ക്കും നല്ലൊരു സര്‍ക്കാരിനും വേണ്ടിയാണ് നാം പ്രാര്‍ത്ഥിച്ചതെങ്കില്‍, ദൈവം നല്‍കിയത് ഏറ്റവും നല്ലതു തന്നെയാണ് എന്ന് വിശ്വസിച്ചുകൊണ്ട് സ്‌നേഹത്തോടെ തിരഞ്ഞെടുപ്പുഫലത്തെ ദൈവകരങ്ങളില്‍നിന്ന് സ്വീകരിക്കണം. ദൈവം ചെയ്യുന്നതെല്ലാം ശരിയാണ്. അവിടുത്തേക്ക് തെറ്റു പറ്റുകയില്ല. നന്മയെന്താണെന്നും നന്മ എങ്ങനെയാണ് പകരപ്പെടേണ്ടതെന്നും തീരുമാനിക്കുന്നത് ദൈവമാണല്ലോ എന്ന് പറഞ്ഞുകൊണ്ടാണ് സണ്‍ഡേ ശാലോം അവസാനിക്കുന്നത്.

English summary

Sunday shalom praise Narendra Modi