ബിജെപി ബെഞ്ചിൽ എംപുരാനിലെ മുന്നയുണ്ടെന്ന് ബ്രിട്ടാസ്; ടിപി 51 ഉം വഖഫും മുനമ്പവും പറഞ്ഞ് സുരേഷ് ഗോപി

വഖഫ് ഭേദഗതി ബില്ലിൻ മേൽ നടന്ന ചർച്ചക്കിടെ രാജ്യസഭയിൽ വാക്ക്പോരുമായി കേരളത്തിൽ നിന്നുള്ള എംപിമാരായ സുരേഷ് ഗോപിയും ജോൺ ബ്രിട്ടാസും. സഭയിൽ സംസാരിക്കവെ എമ്പുരാൻ വിഷയും ക്രിസ്ത്യാനികൾക്കെതിരായ അതിക്രമവും ഉൾപ്പെടെയുള്ള വിഷയങ്ങൾ ഉയർത്തി കേന്ദ്രത്തിനെതിരെ ബ്രിട്ടാസ് ആഞ്ഞടിച്ചു. ബിജെപി ബെഞ്ചിൽ എംപുരാനിലെ മുന്നയുണ്ടെന്നും തൃശൂരിൽ പറ്റിയ തെറ്റ് കേരളം തിരുത്തുമെന്നും ബ്രിട്ടാസ് പറഞ്ഞു.

'ക്രിസ്ത്യാനികളുടെ പേരിൽ മുതലക്കണ്ണീർ ഒഴുക്കുന്നവരുണ്ട്. എന്നാൽ ക്രിസ്ത്യാനികൾക്കെതിരെ രാജ്യത്ത് നിരന്തരം ആക്രമണം നടക്കുന്നുണ്ട്. 600 ഓളം ആക്രമണമാണ് കഴിഞ്ഞ വർഷം ക്രിസ്ത്യാനികൾക്കെതിരെ നടന്നത്. മണിപ്പൂരിൽ 200 ഓളം പള്ളികൾ കത്തിച്ചു.

എമ്പുരാനിൽ പറയുന്ന മുന്ന എന്ന കഥാപാത്രമുണ്ട്, ആ മുന്നയെ ഇവിടെ കാണാം. ഈ ബിജെപി ബെഞ്ചുകളിൽ ഒരു മുന്നയുണ്ട്. ഈ മുന്നയെ മലയാളികൾ തിരിച്ചറിയും, കേരളം തിരിച്ചറിയും. അതാണ് നമ്മുടെ ചരിത്രം. തൃശൂരിലെ അക്കൗണ്ട് നേമത്തേത് പോലെ ഞങ്ങൾ പൂട്ടിക്കും. മലയാളികൾക്ക് പറ്റിയ തെറ്റ് ഞങ്ങൾ തിരുത്തും. മുനമ്പത്ത് ആർക്കും വീട് നഷ്ടമാവില്ല. ഇത് ഞങ്ങളുടെ സർക്കാരിന്റെ വാഗ്ദാനമാണ്. വീട് കൊടുക്കാനുള്ള കരുത്തും ആർജവും ഞങ്ങൾക്ക് ഉണ്ട്. മസ്ജിദ് മറച്ചുവെച്ച് കഴിയുന്നത് പോലെ കേരളത്തിൽ ഒരു മതത്തിനും കഴിയേണ്ടി വരില്ല. ഏവരും സാഹോദര്യത്തോടെ അവിടെ ജീവിക്കും', ബ്രിട്ടാസ് തുറന്നടിച്ചു.

എംപുരാൻ സിനിമയെ കുറിച്ച് പറഞ്ഞുകൊണ്ടായിരുന്നു സുരേഷ് ഗോപിയുടെ മറുപടി. 'എമ്പുരാൻ സിനിമയെ കുറിച്ച് അദ്ദേഹം ഇന്നലെ പറഞ്ഞു. ടിപി ചന്ദ്രശേഖരനെ കുറിച്ചുള്ള സിനിമ റീ റിലീസ് ചെയ്യാൻ സിപിഎമ്മിന് സാധിക്കുമോ? ലെഫ്റ്റ് റൈറ്റ് ലെഫ്റ്റ് റി റിലീസ് ചെയ്യുമോ? ബ്രിട്ടാസിനോ, മുഖ്യമന്ത്രിക്കോ സിപിഎമ്മിനോ ധൈര്യമുണ്ടോ? ധൈര്യം ഉണ്ടെങ്കിൽ എമ്പുരാനെ കുറിച്ച് മിണ്ടാം. നിർമ്മാതാക്കളുടേയും സിനിമയിലെ പ്രധാന നടന്റേയും സംവിധായകന്റേയും തീരുമാനം ആയിരുന്നു 17 ഭാഗങ്ങൾ നീക്കാം എന്നത്. എമ്പുരാന്റെ പേരിൽ കേരളത്തിൽ എന്തൊക്കെ രാഷ്ട്രീയ വിവാദങ്ങളാണ് നടക്കുന്നത്. എന്റെ പാർട്ടിയെ അപകീർത്തിപ്പെടുത്തുകയാണ്.

മുനമ്പം വിഷയത്തിൽ നിങ്ങൾക്ക് രാഷ്ട്രീയത്തിന്റെ കൈ മാത്രമല്ല പൊള്ളിയിട്ടുള്ളത്. ഇനിയും പൊള്ളും, 800 ന് മുകളിൽ പേരെയാണ് സിപിഎം എന്ന രാഷ്ട്രീയ പാർട്ടി കൊന്നൊടുക്കിയത്. മുനമ്പത്ത് 600 ഓളം കുടുംബങ്ങളെയാണ് ചതിയിൽ പെടുത്തിയത്. ഇവരുടെ പ്രമേയം അറബിക്കടലിൽ ചവിട്ടിത്താഴ്ത്തും അവിടുത്തെ ജനങ്ങൾ', സുരേഷ് ഗോപി പറഞ്ഞു.