സ്വപ്‌ന തന്നെ വിളിച്ചിരുന്നു, സ്വർണ്ണത്തിനല്ല; മറ്റൊരു കാര്യത്തിന്; വെളിപ്പെടുത്തലുമായി ബിജു രമേശ്

Updated: Monday, November 23, 2020, 20:38 [IST]

തിരുവനന്തപുരം: പിണറായി വിജയന്‍ സര്‍ക്കാരിന് കനത്ത തിരിച്ചടി സൃഷ്ടിച്ചാണ് ബാറുടമ ബിജു രമേശിന്റെ പുതിയ വെളിപ്പെടുത്തലുകള്‍ നേരത്തെ പുറത്തുവന്നത്. ബാര്‍ കോഴക്കേസില്‍ കെ എം മാണിയുമായി പിണറായി വിജയന്‍ ഒത്തുകളിച്ചെന്നാണ് ബിജു രമേശ് ആരോപിച്ചത്. തന്നോട് ഉറച്ച് നില്‍ക്കുമോ എന്ന് ചോദിച്ച പിണറായി വിജയന്‍ വാക്ക് മാറിയെന്ന് ബിജു രമേശ് ആരോപിച്ചിരുന്നു. ഇതോടൊപ്പം സ്വര്‍ണക്കടത്ത് കേസ് പ്രതി സ്വപ്‌ന സുരേഷുമായി ബന്ധപ്പെട്ട ചില കാര്യങ്ങളും ബിജു രമേശ് വെളിപ്പെടുത്തിയിരിക്കുകയാണ്. വിശദാംശങ്ങളിലേക്ക്...

സ്വപ്‌നയുമായി ബന്ധമുണ്ട്

സ്വപ്‌ന സുരേഷുമായി ബന്ധമുണ്ടെന്നാണ് ബിജു രമേശ് പറയുന്നത്. അച്ഛന്റെ സെക്കന്റ് കസിന്റെ മകളാണ് സ്വപ്‌നയെന്ന് ബിജു രമേശ് പറഞ്ഞു. എന്നാല്‍ സുകേശനുമായി തനിക്ക് ബന്ധമില്ലെന്നും ബിജു രമേശ് വ്യക്തമാക്കുന്നു.

സ്വപ്‌ന വിളിച്ചിട്ടുണ്ട്

സ്വപ്‌ന സുരേഷ് എന്നെയും ഞാന്‍ സ്വപ്‌നയെയും വിളിച്ചിട്ടുണ്ട്. എന്നാല്‍ അത് സ്വര്‍ണക്കടത്തുമായി ബന്ധപ്പെട്ടൊന്നുമല്ല, തിരുനന്തപുരത്തെ യുഎഇ കോണ്‍സുലേറ്റില്‍ ഉദ്യോഗസ്ഥര്‍ക്ക് കുറച്ച് മദ്യം വേണമെന്നും അത് കിട്ടുമോ എന്ന് ചോദിച്ചാണ് വിളിക്കുന്നതെന്നും ബിജു രമേശ് പറഞ്ഞു.

തിരിച്ച് വിളിച്ചു

പിന്നീട് നോക്കിയതിന് ശേഷം മദ്യം ഉണ്ടെന്ന് പറഞ്ഞ് തിരിച്ചുവിളിച്ചു. അതിന്റെ വില എത്രയാണെന്ന് പറയാനും വിളിച്ചിരുന്നു. അതിന് ശേഷം സ്വപ്‌ന പറഞ്ഞതനുസരിച്ച് പിആര്‍ഒ വന്ന് പണവും നല്‍കി മദ്യം വാങ്ങിക്കൊണ്ടു പോയെന്നും ബിജു രമേശ് പറഞ്ഞു. മാധ്യമപ്രവര്‍ത്തകുടെ ചോദ്യത്തിന് പ്രതികരിക്കുകയായിരുന്നു അദ്ദേഹം.

അച്ഛന്റെ മരണവാര്‍ത്ത

പിന്നീട് അച്ഛന്റെ മരണ വാര്‍ത്ത അറിയിച്ചു, അച്ഛന്റെ മരണാനന്തര ചടങ്ങുകള്‍ക്ക് മദ്യം വേണമെന്നും ഉണ്ടാകുമോ എന്നും ചോദിച്ച് വിളിച്ചിരുന്നെന്ന് ബിജു രമേശ് പറഞ്ഞു.