ഹോസ്റ്റല്‍ കുളിമുറിയില്‍ ഒളിച്ച കീഴ്ശാന്തി പിടിയിലായി

ചെങ്ങന്നൂര്‍: ആശുപത്രിയിലെ വനിതാ ഹോസ്റ്റല്‍ കുളിമുറിയില്‍ ഒളിച്ച കീഴ്ശാന്തിയെ നാട്ടുകാരും ആശുപത്രി ജീവിനക്കാരും ഓടിച്ചിട്ട് പിടികൂടി. ഇക്കഴിഞ്ഞ ഞായറാഴ്ച രാത്രി മുളക്കുഴയിലെ സ്വകാര്യ ആശുപത്രിയിലാണ് സംഭവം അരങ്ങേറിയത്. ആശുപത്രിയുടെ കാന്റീനിനു മുകളിലുള്ള ഹോസ്റ്റല്‍ കുളിമുറിയില്‍ ഒളിച്ചിരുന്ന യുവാവിനെ കണ്ട് ഒരു യുവതി ബഹളം വച്ചതോടെ ഇയാള്‍ ഇറങ്ങി ഓടുകയായിരുന്നു.

ബഹളം കേട്ട് ഓടിയെത്തിയ സെക്യൂരിറ്റി ജീവനക്കാര്‍ യുവാവിനെ പിന്തുടര്‍ന്ന് എം.സി റോഡിനടുത്തുവച്ച് പിടികൂടി. എന്നാല്‍ സമീപത്തുള്ള ചില രാഷ്ട്രീയ നേതാക്കള്‍ ഇടപെട്ട് പോലീസെത്തും മുന്‍പ് യുവാവിനെ മോചിപ്പിച്ചതായി ആക്ഷേപമുണ്ട്. എന്നാല്‍, ആശുപത്രിയുടെ സമീപത്ത് ഉപേക്ഷിച്ച ഇയാളുടെ ബൈക്ക് കൊണ്ടുപോകാന്‍ നേതാക്കളെത്തിയെങ്കിലും ജീവനക്കാര്‍ അനുവദിച്ചില്ല.

കീഴ്ശാന്തിയും ആശുപത്രിയിലെ ഒരു നഴ്‌സും തമ്മിലുള്ള ബന്ധമാണ് യുവാവിനെ കുളിമുറിയിലെത്തിച്ചതെന്നാണ് വിവരം. സംഭവദിവസം സെക്യൂരിറ്റി ജീവനക്കാര്‍ കുറവാണെന്ന വിവരം അറിഞ്ഞ് വൈകിട്ട് ആറുമണിയോടെ ആശുപത്രി പരിസരത്തെത്തിയ യുവാവ് കാന്റീനിനു മുകളിലുള്ള ഹോസ്റ്റല്‍ കുളിമുറിയില്‍ കയറി ഒളിച്ചിരിക്കുകയായിരുന്നു.

രാത്രി എട്ടുമണിയോടെ കുളിമുറിയില്‍ കയറിയ ജീവനക്കാരിയാണ് കാമുകിയെ കാത്ത് കുളിമുറിയില്‍ ഒളിച്ച കീഴ്ശാന്തിയെ കണ്ട് ബഹളം വച്ചത്. ഇതോടെ നില്‍ക്കക്കള്ളിയില്ലായെ ബൈക്കും ഉപേക്ഷിച്ച് യുവാവ് ഓടിരക്ഷപ്പെടാന്‍ ശ്രമിക്കുകയായിരുന്നു. നഴ്‌സുമായുള്ള ബന്ധമാണ് ഒളിച്ചിരിക്കലിന് കാരണമെന്ന് വ്യക്തമായതോടെ സ്ഥലത്തെ ചില രാഷ്ട്രീയ നേതാക്കള്‍ ഇടപെട്ട് സംഭവം ഒതുക്കി തീര്‍ക്കാന്‍ ശ്രമിക്കുകയാണെന്നാണ് റിപ്പോര്‍ട്ട്.

English summary

temple priest caught from women's hostel bathroom in Chengannur