കുരിശില്ലാതെ ജീവിതമില്ല...! പറഞ്ഞത് മാണിസാര്‍

പാല: ഒരു മനുഷ്യായുസ്സ് നീണ്ട രാഷ്ട്രീയ ജീവിതത്തില്‍ കെഎം മാണി ഇത്രയധികം പ്രതിസന്ധികള്‍ ഇതുവരെ നേരിട്ടിട്ടുണ്ടാവില്ല. ബാര്‍ കോഴ ആരോപണം, ബജറ്റ് ചോര്‍ത്തിയെന്ന ആരോപണം, ഇതിന്റെയൊക്കെ ഒപ്പമാണ് കൂടെ നിന്ന പിസി ജോര്‍ജ്ജിന്റെ വകയുള്ള ആക്രമണങ്ങള്‍.

ഈ സാഹചര്യത്തില്‍ കെഎം മാണി പറഞ്ഞ ഡയലോഗ് ആയിരിക്കുമോ ഇത്- കുരിശ് ജീവിതത്തിന്റെ അവിഭാജ്യ ഘടകമാണ് എന്ന്.

എന്നാല്‍ സംഭവം അങ്ങനെയല്ല. കുരുത്തോല പെരുന്നാളിന്റെ ചടങ്ങുകളില്‍ പങ്കെടുത്ത ശേഷം അദ്ദേഹം പറഞ്ഞതായിരുന്നു ഇത്. എങ്കിലും മാണിയുടെ ഇപ്പോഴത്തെ ജീവിതവുമായി ഇത് ചേര്‍ത്ത് വായിക്കാവുന്നതും ആണ്.

പാല സെന്റ് തോമസ് കത്തീഡ്രലില്‍ ആണ് മാണിയും കുടുംബവും കുരുത്തോല പെരുന്നാള്‍ ആഘോഷിക്കാന്‍ എത്തിയത്. കുരിശില്ലാതെ യേശു ക്രിസ്തു ഇല്ലെന്നും അദ്ദേഹം പറഞ്ഞു.

ജീവിതമാകുമ്പോള്‍ സന്തോഷവും ദു:ഖവും ഒക്കെ ഉണ്ടാകും. നിരാശയില്ലാതെ ജീവിച്ചാല്‍ ദു:ഖം മാറി സന്തോഷം തിരിച്ചെത്തുമെന്നും അദ്ദേഹം പറഞ്ഞു. പിസി ജോര്‍ജ്ജിനെ ചീഫ് വിപ്പ് സ്ഥാനത്ത് നിന്ന് പുറത്താക്കണം എന്ന ആവശ്യത്തില്‍ കെഎം മാണി ഉറച്ച് നില്‍ക്കുകയാണ് ഇപ്പോഴും. അടുത്ത കാലത്തൊന്നും അദ്ദേഹം ഇത്രയും കടുത്ത നിലപാടുകള്‍ സ്വീകരിച്ചിട്ടില്ല.

English summary

There is no life without Cross, says KM Mani