ഒരു വട വരുത്തിവച്ച പൊല്ലാപ്പ്..ലോകമെമ്പാടുനിന്നും തെറിയഭിഷേകം, വൈറലായ ആ വീഡിയോയ്ക്ക് പിന്നില്‍

Published: Monday, April 20, 2020, 13:43 [IST]

മലയാളികളുടെ എണ്ണപ്പലഹാരങ്ങളില്‍ ഏറ്റവും പ്രിയപ്പെട്ട വിഭവങ്ങളിലൊന്നാണ് ഉഴുന്നു വട. നല എരിവുള്ള ചമ്മന്തിയും കൂടെയുണ്ടെങ്കില്‍ കഴിക്കുന്ന വടയുടെ എണ്ണം ഒര്‍മ്മ പോലും കാണില്ല. മാത്രമല്ല, വട കഴിക്കാത്ത മലയാളികളും കാണില്ല. എന്നാല്‍ ലോക്ക് ഡൗണ്‍കാലത്ത് സോഷ്യല്‍ മീഡിയയില്‍ പ്രചരിച്ച ഒരു വട വീഡിയോ കണ്ട് ചിലരെങ്കിലും ഒന്ന് തലയ്ക്ക് കൈവച്ചിട്ടുണ്ടാവും. ഉഴുന്നു വടയെ അത്ഭുതത്തോടെയും നോക്കുന്നതും കഴിക്കുന്നതുമാണ് ആ വീഡിയോ. സോഷ്യല്‍ മീഡിയയില്‍ വ്യാപകമായി പ്രചരിക്കുന്ന ഈ വീഡിയോയ്ക്ക് താഴെ തെറി അഭിഷേകമാണ്, എന്നാല്‍ ഈ വീഡിയോയ്ക്ക് പിന്നിലെ യാഥാര്‍ത്ഥ കഥ ആര്‍ക്കും ഇതുവരെ അറിയില്ല. എന്താണെന്ന് ശരിക്കും സംഭവിച്ചതെന്ന് പരശോധിക്കാം.

ജോസേട്ടന്‍...

ആലുവ സ്വദേശി ജോസ് എന്നയാളാണ് വടയും കൈയില്‍ പിടിച്ച് ഗൗരവത്തില്‍ വീഡിയോയില്‍ സംസാരിക്കുന്നത്. വിദേശത്ത് താമസിക്കുന്ന ഇദ്ദേഹം വളരെ അത്ഭുതത്തോടെയാണ് വടയെ കുറിച്ച് സംസാരിക്കുന്നത്. യൂട്യൂബില്‍ കണ്ടതിന് ശേഷം ഉണ്ടാക്കിയതാണെന്നും വളരെ രുചിയുള്ള സാധമാണെന്നും ഇദ്ദേഹം വീഡിയോയില്‍ പറയുന്നു. എങ്ങനെയാണ് ഇതുണ്ടാക്കുന്നതെന്നും അദ്ദേഹം വീഡിയോയില്‍ വിശദീകരിക്കുന്നുണ്ട്. താന്‍ ആദ്യമായാണ് ഇത് കാണുന്നതെന്നും കഴിക്കുന്നതെന്നും അദ്ദേഹം വീഡിയോയില്‍ പറഞ്ഞു.

പാവങ്ങളുടെ പലഹാരം

ഈ പലഹാരത്തിന്റെ ഏറ്റവും വലിയ പ്രത്യേകത എന്തെന്നുവച്ചാല്‍ ഇതിന്റെ നടുവിലൂടെ തുളയുള്ളതാണ്. ഇതിലൂടെ നോക്കിയാല്‍ അപ്പുറത്തുള്ള ആളെയും കാണും. ഗൂഗിളില്‍ നോക്കിയപ്പോള്‍ ഞാനിത് കണ്ടു. പാവങ്ങളുടെ ഭക്ഷണം എന്നാണ് ഇത് അറിയപ്പെടുന്നതെന്നും ചില ആള്‍ക്കാര്‍ ഇതുണ്ടാക്കി കടകളില്‍ എത്തിക്കുമെന്നും ജോസ് വീഡിയോയില്‍ പറയുന്നു.

കാത്തിരുന്നത്

എന്നാല്‍ വിഡിയോ സോഷ്യല്‍ മീഡിയയില്‍ വ്യാപകമായി പ്രചരിച്ചതോടെ ജോസിനെ തേടിയെത്തിത് ട്രോളുകളും തെറിയഭിഷേകവുമായിരുന്നു. മലയാളിള്‍ക്ക് നാണക്കേടുണ്ടാക്കുന്നതാണിതെന്നും പറഞ്ഞുവരെ ആള്‍ക്കാര്‍ കമന്റുമായി എത്തി. എന്നാല്‍ ഇതിനെ കുറിച്ചുള്ള സത്യാവസ്ഥ ആരും മനസിലാക്കിയില്ല. എന്തിനാണ് ഇങ്ങനെയൊരു വീഡിയോ ഉണ്ടാക്കി പോസ്റ്റ് ചെയ്തതതിന് പിന്നിലെ കാരണം ജോസ് മറ്റൊരു വീഡിയോയിലൂടെ വ്യക്തമാക്കുന്നുണ്ട്.

കൗതുകം അന്വേഷിച്ച്

സംഭവത്തിലെ കൗതുകം അന്വേഷിച്ച് ജോസിനെ വിളിച്ചയാളുടെ ഫോണ്‍ സംഭാഷണത്തിലാണ് വീഡിയോയുടെ സത്യാവസ്ഥ പുറത്തുവന്നത്. കൂട്ടുകാര്‍ക്ക് വേണ്ടി ഒരു തമാശയ്ക്ക് എടുത്ത വീഡിയോ ആണത്. ഞാനിഷ്ടം പോലെ വടയൊക്കെ ഉണ്ടാക്കിക്കൊണ്ടിരിക്കുന്ന ആളാണ്. കൂറേ നാളുകള്‍ക്ക് ശേഷം വടയുണ്ടാക്കി വിജയിച്ചപ്പോള്‍ സന്തോഷത്തിന് പോസ്റ്റ് ചെയ്ത വീഡിയോ ആണത്.

തെറിവിളി

ലോകത്തിന്റെ വിവിധ ഭാഗത്ത് നിന്നുള്ളവരുടെ തറിവിളികള്‍ കേട്ടുകഴിഞ്ഞു. ഇനി അന്റാര്‍ട്ടിക്കയില്‍ നിന്ന് മാത്രമേ തെറിവിളി വരാനുള്ളൂ. എനിക്ക് ശരിക്കും വടയുണ്ടാക്കാന്‍ അറിയാമെന്ന് അന്വേഷിക്കുന്നവരോടെ പറയണമെന്നും ഫോണ്‍ വിളിച്ചയാളോട് ജോസ് പറയുന്നു. ജോസിന്റെ വീഡിയോ കണ്ട് അത്ഭുതപ്പെട്ടാണ് ഇദ്ദേഹം ഫോണില്‍ ബന്ധപ്പെട്ടത്. എന്തായാലും ഇതോടെ സത്യാവസ്ഥ സോഷ്യല്‍ മീഡിയയ്ക്ക് ബോധ്യമായി.

Published On April 20, 2020