ഇസ്മയിലിന് തുണയായി കേന്ദ്രമുണ്ട്... തോമസ് ചാണ്ടി വിവാദത്തില്‍ ഒരു നടപടിയും ഇല്ല; അടഞ്ഞ അധ്യായം

ദില്ലി: കേരളത്തില്‍ തോമസ് ചാണ്ടി വിവാദം എല്‍ഡിഎഫിനുള്ളില്‍ വലിയ വിള്ളലുകളായിരുന്നു സൃഷ്ടിച്ചത്. പിന്നീടത് സിപിഐയ്ക്കുള്ളില്‍ പോലും പ്രതിസന്ധി സൃഷ്ടിച്ചു. പാര്‍ട്ടി നിലപാടിന് വിരുദ്ധമായി മുന്‍ മന്ത്രി കൂടിയായ കെഇ ഇസ്മയില്‍ രംഗത്തെത്തിയതായിരുന്നു പ്രശ്‌നങ്ങള്‍ കൂടുതല്‍ രൂക്ഷമാക്കിയത്.

കെഇ ഇസ്മയിലിനോട് എല്‍ഡിഎഫ് യോഗങ്ങളില്‍ തുടര്‍ന്ന് പങ്കെടുക്കേണ്ടതില്ലെന്ന് പോലും സിപിഐ നേതൃത്വം വ്യക്തമാക്കിയിരുന്നു. എന്നാല്‍, സംസ്ഥാന നേതൃതവത്തെ പോലെ അല്ല കേന്ദ്ര നേതൃത്വം. ഇസ്മയിലിനെതിരെ നടപടിയൊന്നും വേണ്ടെന്നാണ് കേന്ദ്ര നേതൃത്വത്വത്തിന്റെ തീരുമാനം.

ദില്ലിയില്‍ ചേര്‍ന്ന സിപിഐ കേന്ദ്ര എക്‌സിക്യൂട്ടീവ് ആണ് കെഇ ഇസ്മയിലിന് അനുകൂലമായ നിലപാട് സ്വീകരിച്ചത്. ഇസ്മയില്‍ വിവാദം അടഞ്ഞ അധ്യായമാണ് എന്നായിരുന്നു ദേശീയ ജനറല്‍ സെക്രട്ടറി സുധാകര്‍ റെഡ്ഡിയുടെ പ്രതികരണം.

സിപിഐ ദേശീയ എക്‌സിക്യൂട്ടീവ് അംഗം കൂടിയാണ് ഇസ്മയില്‍. തനിക്ക് തെറ്റ് പറ്റിയതായി യോഗത്തില്‍ അദ്ദേഹം തന്നെ സമ്മതിച്ചു എന്നാണ് റിപ്പോര്‍ട്ടുകള്‍. ഈ സഹചര്യത്തിലാണ് നടപടി വേണ്ടെന്ന നിലപാട് എക്‌സിക്യൂട്ടീവ് സ്വീകരിച്ചത്. ആവശ്യമെങ്കില്‍ ഇസ്മയില്‍ വിവാദം അടുത്ത ദേശീയ സെക്രട്ടേറിയറ്റ് യോഗം പരിശോധിക്കുമെന്നും ദേശീയ ജനറല്‍ സെക്രട്ടറി വ്യക്തമാക്കിയിട്ടുണ്ട്.

English summary

Thomas Chandy issue: No disciplinary action against KE Ismail.