ഓഖി ദുരന്തം മറക്കാതെ ധനമന്ത്രി, തീരദേശ വികസനത്തിന് 2000 കോടി
മത്സ്യബന്ധന തുറമുഖ വികസനത്തിന് 584 കോടി വായ്പയെടുക്കുമെന്ന ധനമന്ത്രി പറഞ്ഞു
തിരുവനന്തപുരം: 2018-19 സാമ്പത്തിക വര്ഷത്തെ സംസ്ഥാന ബജറ്റ് ധനമന്ത്രി നിയമസഭയില് അവതരിപ്പിച്ചു. പിണറായി സര്ക്കാരിന്റെ മൂന്നാമത്തെ ബജറ്റാണ് ഇത്. സാമ്പത്തിക പ്രതിസന്ധിയിലാണെങ്കിലും സാമൂഹ്യ സുരക്ഷ്യക്ക് തീരദേശ വികസനത്തിനും പ്രാധാന്യം നല്കുന്നതായിരിക്കും സംസ്ഥാന ബജറ്റെന്ന് ധനമന്ത്രി പറഞ്ഞിരുന്നു.
ഓഖി ദുരന്തത്തില് വന്ന പാളിച്ചകള് പരിഹരിക്കുന്നതിനുള്ള പദ്ധതികളാണ് ഐസക്ക് പ്രധാനമായും പ്രഖ്യാപിച്ചത്. തീരദേശ വികസനത്തിനായി 2000 കോടിയുടെ പ്രത്യേക പാക്കേജ് ബജറ്റില് പ്രഖ്യാപിച്ചിട്ടുണ്ട്. തീരദേശ ഹരിതവല്ക്കരണത്തിന് 150 കോടിയും വകയിരുത്തിയിട്ടുണ്ട്.
തീരദേശത്തെ വികസന പദ്ധതികള്ക്ക് ഡിപിആര് തയ്യാറാക്കാന് 10 കോടിയും മത്സ്യമേഖലയുടെ മൊത്തം അടങ്കലിന് 600 കോടിയും കിഫ്ബിയില് നിന്ന് 900 കോടിയുടെ നിക്ഷേപവും വകയിരുത്തിയിട്ടുണ്ട്. മത്സ്യബന്ധന തുറമുഖ വികസനത്തിന് 584 കോടി വായ്പയെടുക്കുമെന്ന ധനമന്ത്രി പറഞ്ഞു. തീരദേശഗ്രാമങ്ങളില് സൗജന്യ വൈ-ഫൈ സംവിധാനവും ഏര്പ്പെടുത്തും.മത്സ്യബന്ധന യാനങ്ങളെയും തീരദേശ ഗ്രാമങ്ങളെയും ബന്ധിപ്പിക്കുന്ന തൊഴിലാളി വിവര വിനിമയ സംവിധാനത്തിന് ദുരന്ത നിവാരണ അതോറിറ്റി രൂപം നല്കിയിട്ടുണ്ടെന്നും ധനമന്ത്രി കൂട്ടിച്ചേര്ത്തു.