ഒരു മണിക്കൂറിന് 21000, ഒരു ദിവസം ലഭിക്കുന്നത് ഇത്ര! യൂട്യൂബ് സ്ട്രീമിംഗ് വരുമാനം വെളിപ്പെടുത്തി 'തൊപ്പി'

കൊച്ചി: ഗെയിമിംഗ് പ്ലാറ്റ് ഫോമുകളിലൂടെ ശ്രദ്ധ നേടിയ ആളാണ് നിഹാദ്. കണ്ണൂര്‍ സ്വദേശിയായ നിഹാദ് തൊപ്പി എന്ന പേരില്‍ ആണ് അറിയപ്പെടുന്നത്. യൂട്യൂബില്‍ ആറ് ലക്ഷത്തിലേറെ സബ്‌സ്‌ക്രൈബേഴ്‌സ് തൊപ്പിക്കുണ്ട്. 18 വയസിന് താഴെയുള്ള കുട്ടികളാണ് തൊപ്പിയുടെ വീഡിയോകളുടെ സ്ഥിരം കാഴ്ചക്കാര്‍ എന്നാണ് റിപ്പോര്‍ട്ട്. അടുത്തിടെ നിഹാദ് ചില വിവാദങ്ങളില്‍പ്പെട്ടിരുന്നു.

യൂട്യൂബ് വീഡിയോയില്‍ അസഭ്യം പറഞ്ഞതിന് നിഹാദിനെതിരെ കേസെടുക്കുകയും ചെയ്തിരുന്നു. മോശം പദപ്രയോഗങ്ങളും സ്ത്രീകളെ മോശമായി ചിത്രീകരിക്കുന്നതുമുള്‍പ്പെടെ ടോക്‌സിക് മനോഭാവങ്ങളാണ് തൊപ്പിയുടെ പല വീഡിയോയിലേയും ഉള്ളടക്കം. ഇത് കൂടാതെ രാസലഹരി കൈവശം വെച്ചതിന് തൊപ്പിക്കും സുഹൃത്തുക്കള്‍ക്കുമെതിരെ കേസെടുക്കുകയും ചെയ്തിരുന്നു.

കഴിഞ്ഞ വര്‍ഷം പൊതുസ്ഥലത്ത് അശ്ലീല പരാമര്‍ശങ്ങള്‍ നടത്തിയതിനും ഗതാഗതം തസപ്പെടുത്തിയതിനും നിഹാദിനെതിരെ കേസെടുത്തിരുന്നു. എന്നാല്‍ ഇതിനെല്ലാം ശേഷം താന്‍ തൊപ്പി എന്ന കഥാപാത്രത്തെ ഉപേക്ഷിക്കുകയാണ് എന്ന് പറഞ്ഞും വീഡിയോ ചെയ്തിരുന്നു. ഇപ്പോഴിതാ തന്റെ യൂട്യൂബ് വരുമാനം വെളിപ്പെടുത്തി നിഹാദ് വീണ്ടും ചര്‍ച്ചാ വിഷയമായിരിക്കുകയാണ്.

തൊപ്പിക്ക് മയക്കുമരുന്ന് കച്ചവടമുണ്ടോ എന്ന ഒരാളുടെ ചോദ്യത്തിനുള്ള മറുപടിയായാണ് നിഹാദ് തന്റെ വരുമാനം വെളിപ്പെടുത്തിയത്. തന്റെ വരുമാനത്തെക്കുറിച്ച് ബോധ്യമില്ലാഞ്ഞിട്ടാണ് ഇത്തരം ചോദ്യങ്ങള്‍ തന്നോട് ചോദിക്കുന്നത് എന്നാണ് തൊപ്പി പറയുന്നത്. തന്റെ സ്ട്രീമിങ് കോണ്‍ട്രാക്ട് അടക്കം സ്‌ക്രീനില്‍ കാണിച്ചാണ് നിഹാദ് തന്റെ വരുമാനം പരസ്യമാക്കിയിരിക്കുന്നത്.

'ഇതെന്റെ ഒറിജിനല്‍ സ്ട്രീമിംഗ് കോണ്‍ട്രാക്ട് ആണ്. ഒരു മണിക്കൂര്‍ സ്ട്രീമിംഗിന് 250 ഡോളര്‍ ആണ് എനിക്ക് ലഭിക്കുന്നത്. അതായത് ഏകദേശം 21000 ഇന്ത്യന്‍ മണിയാണ് മക്കളേ! അപ്പോള്‍ അഞ്ച് മണിക്കൂറിന് എത്രയായി?, ഒരു ലക്ഷം അല്ലേ. ചിലപ്പോള്‍ ഞാന്‍ 8 മണിക്കൂര്‍ വരെ സ്ട്രീമിങ് ചെയ്യാറുണ്ട്. ഞാന്‍ ഒരു ദിവസം ഒരു ലക്ഷം രൂപ സ്ട്രീമിംഗില്‍ നിന്നുണ്ടാക്കുന്നുണ്ട്.,' തൊപ്പി പറയുന്നു.

അപ്പോള്‍ ഒരുമാസം തനിക്ക് എത്ര വരുമാനം ലഭിക്കും എന്ന് കണക്കുകൂട്ടാനും നിഹാദ് പറയുന്നുണ്ട്. ഇത് സ്ട്രീമിംഗിന് മാത്രമുള്ള വരുമാനമാണ് എന്നും പ്രൊമോഷന്‍സ്, ഇനാഗുറേഷന്‍സ് തുടങ്ങിയവ വഴിയും വരുമാനം ലഭിക്കുന്നുണ്ട് എന്നും നിഹാദ് വ്യക്തമാക്കി. ഇങ്ങനെ ലീഗലായി ഇത്രയും കാശുണ്ടാക്കാന്‍ പറ്റുന്ന താന്‍ എന്തിന് മയക്കുമരുന്ന് കച്ചവടം ചെയ്യണം എന്നും നിഹാദ് ചോദിക്കുന്നു. അതിന് തനിക്ക് തലയ്ക്ക് ഓളമുണ്ടോ?പൊട്ടനാണോ എന്നും നിഹാദി ചോദിക്കുന്നുണ്ട്.

English summary

Thoppi Nihad's Youtube Revenue Revealed, Check How Much He Earns Per Day