പുതിയ വീട്ടിലേയ്ക്ക് എത്തുന്നത് പ്രവാസിയുടെ കുടുംബത്തിന്റെയും മൃതദേഹങ്ങള്,നോന്പ് തുറയ്ക്ക് പോയവര്
മലപ്പുറം: ബന്ധുവീട്ടില് നോമ്പ് തുറയ്ക്ക് പോയി മടങ്ങിയ കുടുംബം സഞ്ചരിച്ച ബൈക്കിന് പിന്നില് ലോറിയിടിച്ച് മൂന്ന് മരണം . ദേശീയപാതയില് വട്ടപ്പാറ അടിയിലാണ് സംഭവം. കാവുംപുറം കാളിയാല ചോലയ്ക്കല് സ്വദേശി ഉസ്മാന് (33) , ഭാര്യ ഫൗസിയ (30) , മകള് നിഹാല (12) എന്നിവരാണ് മരിച്ചത്. കഞ്ഞിപ്പുരയിലുള്ള ഉസ്മാന്റെ സഹോദരിയുടെ വീട്ടില് നിന്നും നോമ്പ് തുറ കഴിഞ്ഞ് മടങ്ങുമ്പോള് ഞായറാഴ്ച രാത്രി പത്തിനായിരുന്നു അപകടം .
കഞ്ഞിപ്പുരയില് നിന്നും കാളിയാലയിലെ വീട്ടിലേയ്ക്ക് വരികയായിരുന്നു ഉസ്മാന്റെ ബൈക്ക് കാവുംപുറം പാലത്തിന് സമീപമുള്ള വേഗനിയന്ത്രണം വരമ്പുകളില് കയറി ഇറങ്ങുന്നതിനിടെയാണ് പിന്നില് നിന്ന് വന്ന ലോറി ഇടിച്ചത് . നിയന്ത്രണം വിട്ട് ലോറി എതിര്സ ദിശയില് വന്ന മറ്റൊരു ലോറിയിലും ഇടിച്ചു.
ലോറിക്കടിയില്പ്പെട്ട ഉസ്മാനെയും കുടുംബത്തേയും നാട്ടുകാര് ആശുപത്രിയില് എത്തിച്ചെങ്കിലും ജീവന് രക്ഷിയ്ക്കാനായില്ല. ദേശീയ പാതയില് ഒരു മണിയ്ക്കൂറോളം ഗതാഗതം തടസപ്പെട്ടു . നോമ്പ് തുറയ്ക്ക് ഇവരോടൊപ്പം പോയ മൂത്തമകന് ഉസ്മാന്റെ സഹോദരിയുടെ വീട്ടില് തങ്ങുകയായിരുന്നു . ദുബായില് നിന്ന് ഉസ്മാന് നാട്ടിലെത്തിയിട്ട് നാല് ദിവസമേ ആയിട്ടുള്ളൂ . പുതുതായി നിര്മ്മിച്ച വീടിന്റെ ഗൃഹപ്രവേശം പെരുന്നാളിന് ശേഷം നടത്താനിരിയ്ക്കുകയായിരുന്നു.