ജീവനു വേണ്ടി പിടഞ്ഞ് 10 മിനിറ്റ്; നെടുമ്പാശേരി വിമാനത്താവളത്തിലെ ഓടയില്‍ വീണ് മൂന്നു വയസുകാരന്‍ മരിച്ചു

കൊച്ചി: നെടുമ്പാശേരി വിമാനത്താവളത്തില്‍ മൂന്ന് വയസുകാരന്റെ ജീവനെടുത്ത് മാലിന്യക്കുഴി. കേരളത്തിലേക്ക് വിനോദ യാത്രയ്ക്കു വന്ന രാജസ്ഥാന്‍ സ്വദേശികളുടെ മകന്‍ റിഥാന്‍ ജാജുവിനാണ് ദാരുണാന്ത്യമുണ്ടായത്. ഇന്ന് ഉച്ചയോടെയാണ് അപകടമുണ്ടായത്.

തുറന്നുകിടന്ന നാലടി താഴ്ചയുള്ള കുഴിയിലേക്കാണ് കുട്ടി വീണത്. പത്ത് മിനിറ്റോളം കുട്ടി കുഴിയില്‍ കിടന്നെങ്കിലും ആരും കണ്ടില്ല. പുറത്തെടുത്ത് പ്രാഥമിക ചികിത്സ നല്‍കി സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

സഹോദരനൊപ്പം കളിക്കുന്നതിനിടെയാണ് അപകടമുണ്ടായത്. ആഭ്യന്തര ടെര്‍മിനലിന് മുന്നിലെ കഫേയുടെ സമീപം മൂടാതെ കിടന്ന ഓടയിലാണ് കുട്ടി വീണത്. കുട്ടി കുഴിയില്‍ വീണത് ആരും കണ്ടില്ല. കുട്ടിയെ കാണാനില്ലെന്ന് മാതാപിതാക്കള്‍ സിയാല്‍ അധികൃതരെ അറിയിച്ചു. തുടര്‍ന്ന് വിമാനത്താവളത്തിലെ സിസിടിവി പരിശോധിച്ചപ്പോള്‍ കുട്ടി മാലിന്യകുഴിയില്‍ വീണതായി കണ്ടെത്തുകയായിരുന്നു. പുറത്തെടുത്ത കുട്ടിയുടെ വായിലും മൂക്കിലും നിറയെ മാലിന്യമായിരുന്നു. വെള്ളിയാഴ്ച കുടുംബം തിരിച്ചുപോകാനിരിക്കെയാണ് ദാരുണമായ അപകടമുണ്ടായത്.

രാജസ്ഥാന്‍ സ്വദേശിയായ സൗരഭിന്റെ മകനാണ് റിഥാന്‍ ജാജു. പൊതുജനങ്ങള്‍ക്ക് പ്രവേശനമില്ലാതിരുന്ന സ്ഥലത്താണ് സംഭവം നടന്നതെന്നാണ് സിയാല്‍ അധികൃതരുടെ വിശദീകരണം. തുടര്‍നടപടികള്‍ക്ക് കുടുംബത്തിന് എല്ലാവിധ പിന്തുണയും അധികൃതര്‍ അറിയിച്ചിട്ടുണ്ട്. അപകടത്തിന് ശേഷം ഓട പ്ലാസ്റ്റിക് കൊണ്ട് മൂടി. അതേസമയം കുട്ടികയുടെ മരണത്തിനിടയാക്കിയ ഗുരുതര വീഴ്ച സംബന്ധിച്ച് സിയാല്‍ അധികൃതര്‍ പ്രതികരിച്ചിട്ടില്ല.