തൃപ്പുണ്ണിത്തുറ തിരഞ്ഞെടുപ്പ് കേസ്; ബാബുവിന് തിരിച്ചടി, കേസ് നിലനില്‍ക്കുമെന്ന് സുപ്രീംകോടതി

Updated: Tuesday, September 12, 2023, 17:00 [IST]

കൊച്ചി: തൃപ്പൂണിത്തുറ തിരഞ്ഞെടുപ്പ് കേസില്‍ കോണ്‍ഗ്രസ് എം എല്‍ എയും മുന്‍ മന്ത്രിയുമായ കെ ബാബുവിന് തിരിച്ചടി. മുന്‍ എം എല്‍ എയും 2021 ലെ നിയമസഭാ തിരഞ്ഞെടുപ്പില്‍ ബാബുവിന്റെ എതിര്‍ സ്ഥാനാര്‍ത്ഥിയുമായിരുന്ന എം സ്വരാജ് തിരഞ്ഞെടുപ്പ് വിജയം ചോദ്യം ചെയ്ത് നല്‍കിയ ഹര്‍ജി നിലനില്‍ക്കുമെന്ന് സുപ്രീം കോടതി വ്യക്തമാക്കി. നേരത്തെ ഹൈക്കോടിതയും സമാന നിലപാടാണ് സ്വീകരിച്ചിരുന്നത്.

ഹൈക്കോടതി ഉത്തരവ് സ്റ്റേ ചെയ്യണം എന്നാവശ്യപ്പെട്ടാണ് കെ ബാബു സുപ്രീംകോടതിയെ സമീപിച്ചത്. ഈ ആവശ്യമാണ് സുപ്രീംകോടതി നിരസിച്ചത്. അക്കാര്യത്തില്‍ ഇപ്പോള്‍ ഒന്നും പറയുന്നില്ലെന്നാണ് സുപ്രീംകോടതി പറഞ്ഞത്. അതേസമയം ഹൈക്കോടതിയിലെ നടപടി ക്രമങ്ങള്‍ തുടരാമെന്നും സുപ്രീംകോടതി അറിയിച്ചു. സുപ്രീംകോടതി സ്റ്റേ അനുവദിക്കാത്തതിനാല്‍ കേസില്‍ വാദം തുടരാം

ബാബുവിന്റെ ഹര്‍ജിയില്‍ സുപ്രീംകോടതി പിന്നീട് വിശദമായ വാദം കേള്‍ക്കും എന്നും അറിയിച്ചിട്ടുണ്ട്. തിരഞ്ഞെടുപ്പില്‍ മതചിഹ്നങ്ങള്‍ ഉപയോഗിച്ച് വോട്ട് പിടിച്ചെന്ന് ചൂണ്ടിക്കാട്ടിയാണ് സ്വരാജ് കോടതിയെ സമീപിച്ചത്. നേരത്തെ ഹര്‍ജിക്കാരനായ കെ ബാബു അനന്തമായി കേസ് നീട്ടുന്നുവെന്ന് എം സ്വരാജ് സുപ്രീംകോടതിയെ അറിയിച്ചിരുന്നു. ജനപ്രാതിനിധ്യ നിയമം അനുസരിച്ച് തെരഞ്ഞെടുപ്പ് കേസ് ആറ് മാസത്തിനകം കേസ് തീര്‍പ്പാക്കണമെന്നാണ് സ്വരാജിന്റെ ആവശ്യം.

ബാബു, ശബരിമല അയ്യപ്പന്റെ ചിത്രം ഉപയോഗിച്ച് വോട്ടേഴ്‌സ് സ്ലിപ്പ് വിതരണം ചെയതു എന്നാണ് സ്വരാജ് ഹര്‍ജിയില്‍ പറയുന്നത്. സ്വരാജ് വിജയിക്കുകയാണെങ്കില്‍ അയ്യപ്പന്റെ തോല്‍വി ആണെന്ന് ബാബു പ്രചരണം നടത്തിയെന്നും ചുവരെഴുത്തിലും അയ്യപ്പന്റെ പേര് ഉപയോഗിച്ചു എന്നുമാണ് ഹര്‍ജിയില്‍ പറയുന്നു. 2021 ലെ തിരഞ്ഞെടുപ്പില്‍ തൃപ്പൂണിത്തുറയില്‍ 992 വോട്ടുകള്‍ക്കാണ് സ്വരാജിനെ കെ ബാബു പരാജയപ്പെടുത്തിയത്.

ഫലം വന്നതിന് പിന്നാലെ മതചിഹ്നങ്ങള്‍ ഉപയോഗിച്ച് ബാബു പ്രചരണം നടത്തുകയായിരുന്നു എന്ന് സ്വരാജ് ആരോപിച്ചിരുന്നു. പിന്നാലെ ഹൈക്കോടതിയില്‍ ഹര്‍ജി ഫയല്‍ ചെയ്യുകയും ചെയ്തു. മതത്തെ ഉപയോഗിച്ച് പ്രചാരണം നടത്തിയത് ജനപ്രാതിനിധ്യ നിയമത്തിന്റെ ലംഘനമാണെന്ന് വാദിച്ച സ്വരാജ് പ്രചാരണ സാമഗ്രികളുടെ ചിത്രങ്ങളടക്കം തെളിവായി കോടതിയില്‍ സമര്‍പ്പിക്കുകയും ചെയ്തിരുന്നു.

എന്നാല്‍ കേസ് നിലനില്‍ക്കില്ലെന്ന് ചൂണ്ടിക്കാട്ടി കെ ബാബുവും കോടതിയെ സമീപിച്ചു. എന്നാല്‍ ബാബുവിന്റെ തടസവാദം ഹൈക്കോടതി തള്ളുകയായിരുന്നു. കേസ് നിലനില്‍ക്കുന്നതാണെന്നും ഹൈക്കോടതി വ്യക്തമാക്കുകയായിരുന്നു. ബാബു തെരഞ്ഞെടുപ്പ് ചട്ടം ലംഘിച്ചതിനാല്‍ തന്നെ വിജയിയായി പ്രഖ്യാപിക്കണമെന്നാണ് സ്വരാജ് ഹര്‍ജിയില്‍ ആവശ്യപ്പെടുന്നത്.