ദേശസാത്കൃത ബാങ്കാണെങ്കിലും നിക്ഷേപത്തിന് സുരക്ഷയില്ല
തൃശൂര്: രാജ്യത്തെ ഏറ്റവും വലിയ ദേശസാത്കൃത ബാങ്കിലും നിക്ഷേപത്തിന് സുരക്ഷിതത്വമില്ല. ഓണ്ലൈന് തട്ടിപ്പിലൂടെയാണ് ബാങ്കിലെ നിഷേപകരുടെ പണം കവര്ന്നത്. എസ്ബിഐ. തൃപ്രയാര് ജങ്ഷന് ബ്രാഞ്ചിലാണ് തട്ടിപ്പ് അരങ്ങേറിയത്. തളിക്കുളം തമ്പാന് കടവ് അറക്കവീട്ടില് ഷീബ ദില്ഷാദ്, നാട്ടിക ഫിഷറീസ് ഹൈസ്കൂളിനു സമീപം റിട്ട. സി.ആര്.പി.എഫ്. ഉദ്യോഗസ്ഥന് വേതോട്ടില് ശങ്കരനാരായണന് എന്നിവരാണ് പരാതിയുമായി രംഗത്തെത്തിയത്. കൂടുതല് പേരുടെ പണം നഷ്ടപ്പെട്ടിട്ടുണ്ടെന്നും അഭ്യൂഹമുണ്ട്. ഓണ്ലൈന് പര്ച്ചേസിലൂടെയാണ് ഇരുവരുടെയും നിക്ഷേപം തട്ടിപ്പുകാര് ചോര്ത്തിയെടുത്തത്.
ഷീബയുടെ ഭര്ത്താവ് ദില്ഷാദ് ഗള്ഫില് നിന്നയച്ച സംഖ്യയില്നിന്ന് കഴിഞ്ഞ 13, 14, 15 തിയതികളിലായി 25,464 രൂപയാണ് ഓണ്ലൈനിലൂടെ തട്ടിയെടുത്തത്. ശങ്കരനാരായണന്റെ 13,000 രൂപയും നഷ്ടപ്പെട്ടു. പണം പിന് വലിച്ചതിന്റെ എസ്.എം.എസുകള് മൊബൈല് ഫോണില് വന്നെങ്കിലും ഇരുവരും ശ്രദ്ധിച്ചില്ല. എസ്.എം.എസുകള് കൂടിയതോടെയാണ് ഇവര് തട്ടിപ്പ് മനസിലാക്കിയത്. അപ്പോഴേക്കും ഏറെ വൈകിയിരുന്നു.