സുരേഷ് ഗോപിക്ക് അഭിനന്ദനവുമായി മമ്മൂക്കയും ലാലേട്ടനും; താരങ്ങളുടെ വാക്കുകൾ ഇങ്ങനെ

Updated: Wednesday, June 5, 2024, 1:37 [IST]

തൃശൂർ: സുരേഷ് ഗോപിയുടെ വിജയത്തിലൂടെ സംസ്ഥാനത്ത് ബി ജെ പി അക്കൗണ്ട് തുറന്നിരിക്കുകയാണ്. സുരേഷ് ഗോപിയുടെ വിജയത്തിൽ പാർട്ടി നോക്കാതെയാണ് ആളുകൾ ആശംസയും അഭിനന്ദനവും അറിയിക്കുന്നത്. സോഷ്യൽ മീഡിയ നിറയെ സുരേഷ് ഗോപിക്കുള്ള അഭിനന്ദനം കൊണ്ട് നിറയുകയാണ്. ഇപ്പോൾ മോഹൻലാലും മമ്മൂട്ടിയും സുരേഷ് ഗോപിക്ക് അഭിനന്ദനം അറിയിച്ചിരിക്കുകയാണ്.

സോഷ്യൽ മീഡിയയിൽ സുരേഷ് ഗോപിയുടെ ചിത്രം പങ്കുവെച്ചുകൊണ്ടാണ് മോഹൻലാൽ ആശംസ അറിയിച്ചിരിക്കുന്നത്. അഭിനന്ദനങ്ങൾ പ്രിയ സുരേഷ് എന്നാണ് മോഹൻലാൽ കുറിച്ചത്. നിങ്ങളുടെ വിജയത്തിന് പ്രിയ സുരേഷ് ഹൃദയം നിറഞ്ഞ അഭിനന്ദനങ്ങൾ എന്നാണ് മമ്മൂട്ടി കുറിച്ചത്. രണ്ട് പോസ്റ്റിനും സുരേഷ് ഗോപി നന്ദി അറിയച്ച് കമന്റും ഇട്ടിരുന്നു.

'നിങ്ങളുടെ വിജയത്തിന് പ്രിയ സുരേഷ് ഹൃദയം നിറഞ്ഞ അഭിനന്ദനങ്ങൾ', എന്നായിരുന്നു മമ്മൂട്ടിയുടെ കുറിപ്പ്. സലീം കുമാറും സുരേഷ് ഗോപിക്ക് അഭിനന്ദനം അറിയച്ചു. രാഷ്ട്രീയമായി വ്യത്യസ്ത ചേരിയിലാണെങ്കിലും വ്യക്തി പരമായി അങ്ങയുടെ വിജയത്തിൽ സന്തോഷിക്കുന്നു അഭിനന്ദനങ്ങൾ സുരേഷേട്ടാ, എന്നാണ് അദ്ദേഹം കുറിച്ചത്.

നേരത്തെ സിനിമാ താരങ്ങളായ അനുശ്രീ, ഭാമ, ബീന ആന്റണി, മുക്ത, കൃഷ്ണ കുമാർ തുടങ്ങിയ താരങ്ങൾ സുരേഷ് ഗോപിക്ക് ആശംസയുമായി എത്തിയിരുന്നു. ഹൃദയം കീഴടക്കി സുരേഷ് ഗോപി. തൃശൂർ അങ്ങെടുത്തു, നിറഞ്ഞ സ്നേഹം എന്നാണ് നടി സോഷ്യൽ മീഡിയിയിൽ പങ്കുവെച്ചത്. ഞങ്ങൾ ആഗ്രഹിച്ച വിജയം, ഞങ്ങൾ പ്രതീക്ഷിച്ച വിജയം, ഞങ്ങളെല്ലാവരും കൂടെയുണ്ട് സുരേഷേട്ടാ എന്നാണ് ബീനാ ആന്റണി കുറിച്ചത്.

സുരേഷ് ഗോപിക്കൊപ്പമുള്ള ചിത്രമാണ് അനുശ്രീ പങ്കുവെച്ചത്. ബിഗ് ബ്രദർ അഭിനന്ദനങ്ങൾ തൃശൂർ അങ്ങെടുത്തൂ എന്നാണ് മുക്ത കുറിച്ചത്. അതേ സമയം കൃഷ്ണകുമാറും ഭാര്യ സിന്ധുവും സുരേഷ് ഗോപിയുടെ വീട്ടിലെത്തിയാണ് അഭിനന്ദനം നേർന്നത്. താമര വിരിയില്ല, വിരിയില്ല എന്ന് പറഞ്ഞിട്ട് ഇപ്പോൾ ഇന്ത്യയൊന്നാകെ തൃശൂരിലേക്ക് നോക്കുകയാണ് എന്നും കൃഷ്ണ കുമാർ പറഞ്ഞു. ഇന്ത്യൻ രാഷ്ട്രീയത്തിലെ ഹീറോയായി സുരേഷ് ഗോപി മാറിയെന്നും കൃഷ്ണ കുമാർ പറഞ്ഞിരുന്നു.

സുരേഷ് ഗോപിക്ക് മധുരം നൽകിയാണ് ഭാര്യ രാധിക തിരഞ്ഞെടുപ്പ വിജയം ആഘോഷിച്ചത്. വിജയം അറിഞ്ഞ് വീട്ടിലെത്തിയ എല്ലാവർക്കും മധുരം വിതരണം ചെയ്യുകയും ചെയ്തു. വിജയത്തിൽ ലൂർദ് മാതാവിന് സുരേഷ് ഗോപി നന്ദി പറഞ്ഞു. ഒഴുക്കിന് എതിരെയാണ് നീന്തി കയറിയതെന്നും വ്യക്തിപരമായി ഒരുപാട് ദ്രോഹങ്ങൾ നേരിട്ടുവെന്നും അദ്ദേഹം പറഞ്ഞിരുന്നു.. സത്യം തൃശൂരിലെ ജനങ്ങൾ തിരിച്ചറിഞ്ഞുവെന്നും സുരേഷ് ഗോപി പറഞ്ഞു.