തൃശൂർ ദുരന്തം: മരിച്ചവരുടെ കുടുംബങ്ങള്ക്ക് സഹായവുമായി ലുലുവും കല്യാണും, 14 ലക്ഷം പ്രഖ്യാപിച്ച് സർക്കാർ
മുണ്ടത്തിക്കോട് ദുരന്തത്തില് മരണപ്പെട്ടവരുടെ കുടുംബങ്ങള്ക്കും പരിക്കേറ്റവര്ക്കും ധനസഹായം പ്രഖ്യാപിച്ച് കല്യാണ് ജ്വല്ലേഴ്സും ലുലു ഗ്രൂപ്പും. വെടിക്കെട്ട് അപകടത്തില് മരണപ്പെട്ടവരുടെ കുടുംബങ്ങള്ക്ക് 5 ലക്ഷം രൂപ നല്കുമെന്ന് കല്യാണ് ജ്വല്ലേഴ്സ് എംഡിയായ ടിഎസ് കല്യാണരാമന് അറിയിച്ചു.
അതേസമയം മരണപ്പെട്ടവരുടെ കുടുംബങ്ങള്ക്ക് ഒരു ലക്ഷം രൂപയും പരിക്കേറ്റവര്ക്ക് അന്പതിനായിരം രൂപയും നല്കുമെന്ന് ലുലു ഗ്രൂപ്പ് ചെയര്മാന് എംഎ യൂസഫലിയും വ്യക്തമാക്കി.
മുണ്ടത്തിക്കോട് ദുരന്തത്തിന്റെ ഇരകള്ക്ക് സംസ്ഥാന സര്ക്കാരും നഷ്ടപരിഹാരം പ്രഖ്യാപിച്ചിരുന്നു. മരിച്ചവരുടെ ആശ്രിതര്ക്ക് 14 ലക്ഷം രൂപ അനുവദിക്കാനാണ് ഇന്ന് ചേർന്ന മന്ത്രിസഭായോഗത്തിന്റെ തീരുമാനം. സംസ്ഥാന ദുരന്ത പ്രതികരണ നിധിയില് നിന്നും 4 ലക്ഷം രൂപയും മുഖ്യമന്ത്രിയുടെ ദുരിതാശ്വാസ നിധിയില് നിന്നും 10 ലക്ഷം രൂപയും ഉള്പ്പെടെയാണ് 14 ലക്ഷം രൂപ അടിയന്തിര ധനസഹായം അനുവദിക്കുക.
പരിക്കേറ്റവര്ക്ക് ദുരന്തപ്രതികരണ നിധി പ്രകാരം അനുവദനീയമായ തുകയും അതിനു പുറമെ മുഖ്യമന്ത്രിയുടെ ദുരിതാശ്വാസനിധിയില് നിന്നും 2 ലക്ഷം രൂപ അടിയന്തിര ധനസഹായമായി അനുവദിക്കും. പരിക്കേറ്റവര്ക്ക് 6 മാസത്തേക്കുള്ള സര്ക്കാര്/സ്വകാര്യ ആശുപത്രികളിലെ ചികിത്സാചെലവ് സര്ക്കാര് ഏറ്റെടുക്കും. ഇതിനാവശ്യമായ തുക ജില്ലാ കളക്ടറുടെ ശിപര്ശയുടെ അടിസ്ഥാനത്തില് മുഖ്യമന്ത്രിയുടെ ദുരിതാശ്വാസ നിധിയില് നിന്നും അനുവദിക്കാവുന്നതാണ്. ഇതിനു പുറമെ ദുരന്ത പ്രതികരണ നിധിയില് നിന്നും അനുവദിനീയമായ തുക ചികിത്സാ ധനസഹായമായി നല്കും.
ആറുമാസത്തിലധികമായി ചികിത്സ വേണ്ടിവന്നാല് മെഡിക്കല് ബോര്ഡിന്റെ തീരുമാനത്തിന്റെ അടിസ്ഥാനത്തില് ശിപാര്ശ ചെയ്യപ്പെട്ട സ്വകാര്യ ആശുപത്രികളില് ചികിത്സ ചെലവ് മുഖ്യമന്ത്രിയുടെ ദുരിതാശ്വാസ നിധിയില് നിന്നും അനുവദിക്കും.
തിരച്ചിലും രക്ഷാപ്രവര്ത്തനവും സുഗമമാക്കുന്നതിനുവേണ്ടി പ്രദേശത്തെ സ്വകാര്യ വ്യക്തികളുടെ മതില് പൊളിക്കുകയും വയല് നികത്തുകയും ചെയതിട്ടുണ്ട്. അവ പൂര്വ്വ സ്ഥിതിയില് ആക്കുന്നതിന് ചെലവാകുന്ന യഥാര്ത്ഥ തുക ജില്ലാ കളക്ടറുടെ ശിപാര്ശയുടെ അടിസ്ഥാനത്തില് ദുരന്തപ്രതികരണ നിധിയില് നിന്നും അനുവദിക്കും.
ദുരന്തവുമായി ബന്ധപ്പെട്ട് മൃതദേഹങ്ങള് മറവു ചെയ്യുന്നതിനും, ഡി എന് എ മാച്ചിംഗിനായി സാമ്പിളുകള് ശേഖരിക്കുന്നതിനുമായി സ്റ്റാന്ഡേര്ഡ് ഓപ്പറേറ്റിംഗ് പ്രൊസീജ്യര് (SOP) പുറപ്പെടുവിക്കുന്നതിന് ആവശ്യമായ നിര്ദ്ദേശം സംസ്ഥാന ദുരന്ത നിവാരണ അതോറിറ്റിയുടെ സ്റ്റേറ്റ് എക്സിക്യൂട്ടിവ് കമ്മിറ്റിക്ക് നല്കി. അടിയന്തര പ്രതികരണത്തിനായി 50 ലക്ഷം രൂപ ദുരന്ത പ്രതികരണ നിധിയില് നിന്നും ഇന്നലെ അനുവദിച്ച നടപടി സാധൂകരിച്ചു. ദുരന്ത പ്രതികരണവുമായി ബന്ധപ്പെട്ട് ഉണ്ടായിട്ടുള്ള ചെലവുകള് ഈ തുകയില് നിന്നും ചെലവഴിക്കാന് ജില്ലാ കലക്ടര്ക്ക് അനുമതി നല്കി. സ്ഫോടനം കാരണം സമീപ വീടുകള്ക്കുണ്ടായ നാശനഷ്ടത്തിന്റെ തോത് കണക്കാക്കി അടിയന്തിരമായി റിപ്പോര്ട്ട് സമര്പ്പിച്ച് എസ് ഡി ആര് എഫില് നിന്നും തുക ലഭ്യമാക്കാന് ജില്ലാ കളക്ടറെ ചുമതലപ്പെടുത്തി.
തൃശ്ശൂര് മുണ്ടത്തിക്കോട് വെടിക്കെട്ടുപുര സ്ഫോടനത്തെ സവിശേഷ ദുരന്തമായി പ്രഖ്യാപിക്കുന്നതിന് സംസ്ഥാന ദുരന്ത നിവാരണ അതോറിറ്റിയുടെ സ്റ്റേറ്റ് എക്സിക്യൂട്ടിവ് കമ്മിറ്റിക്ക് മന്ത്രിസഭായോഗം നിര്ദ്ദേശം നല്കി. സ്ഫോടനം സംബന്ധിച്ച് ജുഡീഷ്യല് അന്വേഷണം പ്രഖ്യാപിച്ചു. ജസ്റ്റിസ് സി.എന് രാമചന്ദ്രന് നായര് ഏകാംഗ ജുഡീഷ്യല് കമ്മീഷനാണ് അന്വേഷണത്തിന്റെ ചുമതല.
Click it and Unblock the Notifications
Sign in with Google