കക്കൂസ് പണി ഇനിയും തീർന്നില്ലേ? പെട്രോൾ വില 80 തൊട്ടു! കേരളത്തിന്റെ ചരിത്രത്തിലെ ഏറ്റവും ഉയർന്ന വില!
സംസ്ഥാന ചരിത്രത്തിലാദ്യമായി ഒരു ലിറ്റർ പെട്രോളിന്റെ വില 80 രൂപ കടന്നു.
തിരുവനന്തപുരം: കർണാടക നിയമസഭ തിരഞ്ഞെടുപ്പിന് പിന്നാലെ കുതിച്ചുയർന്ന പെട്രോൾ, ഡീസൽ വിലയിൽ ശനിയാഴ്ചയും വർദ്ധനവ്. മെയ് 19 ശനിയാഴ്ച പെട്രോളിന് 32 പൈസയും ഡീസലിന് 26 പൈസയും വർദ്ധിച്ചു. ഇതോടെ സംസ്ഥാന ചരിത്രത്തിലാദ്യമായി ഒരു ലിറ്റർ പെട്രോളിന്റെ വില 80 രൂപ കടന്നു.
തിരുവനന്തപുരത്താണ് പെട്രോൾ എക്കാലത്തെയും ഉയർന്ന വിലയിലെത്തിയിരിക്കുന്നത്. 80.10 രൂപയാണ് തിരുവനന്തപുരത്തെ പെട്രോൾ വില. ഡീസലിന് 73.60 രൂപയാണ് വില. കൊച്ചിയിൽ പെട്രോളിനും ഡീസലിനും യഥാക്രമം 78.72 രൂപ, 71.85 രൂപ എന്നിങ്ങനെയാണ് വില. കോഴിക്കോട് പെട്രോൾ വില 78.97 രൂപയിലെത്തി. ഡീസലിന് 72.12 രൂപയാണ് കോഴിക്കോട്ടെ വില.
കർണാടക നിയമസഭ തിരഞ്ഞെടുപ്പ് പ്രമാണിച്ച് കഴിഞ്ഞയാഴ്ച പെട്രോൾ, ഡീസൽ വിലയിൽ വർദ്ധനവുണ്ടായിരുന്നില്ല. തിരഞ്ഞെടുപ്പ് കണക്കിലെടുത്ത് ഇന്ധനവില വർദ്ധിപ്പിക്കരുതെന്ന കേന്ദ്രസർക്കാർ നിർദേശത്തെ തുടർന്നാണ് എണ്ണക്കമ്പനികൾ വില കൂട്ടാതിരുന്നത്. എന്നാൽ കർണാടക തിരഞ്ഞെടുപ്പ് കഴിഞ്ഞതോടെ ഇന്ധനവില കുതിച്ചുയർന്നു. ഓരോ ദിവസവും പത്ത് മുതൽ മുപ്പത് പൈസ വരെയാണ് പെട്രോളിന് വില വർദ്ധിച്ചത്.