തുടക്കത്തിലേ കാലിടറി ട്വന്റി 20, പെരുമ്പാവൂര്‍ സ്ഥാനാർത്ഥി ലക്ഷ്മി പ്രിയയുടെ പേര് വോട്ടർ പട്ടികയിലില്ല

കൊച്ചി: നിയമസഭാ തിരഞ്ഞെടുപ്പ് തയ്യാറെടുപ്പുകളുടെ തുടക്കത്തില്‍ തന്നെ പാളി ട്വന്റി 20. കഴിഞ്ഞ ദിവസം പെരുമ്പാവൂര്‍ മണ്ഡലം സ്ഥാനാര്‍ത്ഥിയായി ട്വന്റി 20 പ്രഖ്യാപിച്ച നടി ലക്ഷ്മി പ്രിയയുടെ പേര് വോട്ടര്‍ പട്ടികയില്‍ ഇല്ലെന്ന് റിപ്പോര്‍ട്ട്. ഇതോടെ പെരുമ്പാവൂര്‍ മണ്ഡലത്തില്‍ ട്വന്റി 20 പുതിയ സ്ഥാനാര്‍ത്ഥിയെ തേടുകയാണ്.

ലക്ഷ്മി പ്രിയയ്ക്ക് മത്സരിക്കാന്‍ സാധിച്ചേക്കില്ലെന്ന് വന്നതോടെ ഇന്ന് പെരുമ്പാവൂരില്‍ നടത്താനിരുന്ന സ്ഥാനാര്‍ത്ഥിയുടെ റോഡ് ഷോ റദ്ദാക്കി. പെരുമ്പാവൂര്‍ തിരഞ്ഞെടുപ്പ് കമ്മിറ്റി ഓഫീസ് കേന്ദ്രമന്ത്രി ഭൂപതി രാജു ഉദ്ഘാടനം ചെയ്യേണ്ടതായിരുന്നു. ഈ പരിപാടിയും മാറ്റി വെച്ചു. തദ്ദേശ തിരഞ്ഞെടുപ്പില്‍ ലക്ഷ്മി പ്രിയ വോട്ട് ചെയ്തിരുന്നുവെന്നാണ് വിവരം. മാര്‍ച്ച് 23 വരെ വോട്ടര്‍ പട്ടികയില്‍ പേര് ചേര്‍ക്കാവുന്നതാണ്.

എന്നാല്‍ ലക്ഷ്മി പ്രിയയെ മാറ്റി മറ്റൊരു സ്ഥാനാര്‍ത്ഥിയെ പ്രഖ്യാപിക്കാനുളള തിരക്കിട്ട ചര്‍ച്ചകളാണ് ട്വന്റി 20യില്‍ നടക്കുന്നത് എന്നാണ് വിവരം. യാക്കോബായ സഭയിലെ ഒരു വൈദികന്റെ പേരടക്കം പെരുമ്പാവൂരില്‍ സ്ഥാനാര്‍ത്ഥിയായി ഉയര്‍ന്ന് കേള്‍ക്കുന്നുണ്ട്.

കഴിഞ്ഞ ദിവസമാണ് ലക്ഷ്മി പ്രിയ, അഞ്ജലി നായര്‍, വീണാ നായര്‍ എന്നീ സിനിമാ താരങ്ങളെ ട്വന്റി 20 നിയമസഭാ തിരഞ്ഞെടുപ്പില്‍ സ്ഥാനാര്‍ത്ഥികളായി പ്രഖ്യാപിച്ചത്. നടിയും സിനിമാ താരങ്ങളുടെ സംഘടനയായ അമ്മയുടെ വൈസ് പ്രസിഡണ്ടുമാണ് ലക്ഷ്മി പ്രിയ. വര്‍ഷങ്ങളായി ലക്ഷ്മി പ്രിയ സംഘപരിവാര്‍ സംഘടനകളുമായി സഹകരിച്ച് പ്രവര്‍ത്തിക്കുന്നുണ്ട്.

പെരുമ്പാവൂരില്‍ നൂറ് ശതമാനവും വിജയിക്കും എന്ന ആത്മവിശ്വാസം കഴിഞ്ഞ ദിവസം ലക്ഷ്മി പ്രിയ മാധ്യമങ്ങളോട് പങ്കുവെച്ചിരുന്നു. പെരുമ്പാവൂരിലെ വിഷയങ്ങളെല്ലാം തനിക്ക് അറിയാം. ബിജെപി തന്നെ സ്ഥാനാര്‍ത്ഥിയാക്കാന്‍ വിളിച്ചപ്പോള്‍ മകള്‍ ചെറുതായിരുന്നത് കൊണ്ടാണ് മത്സരിക്കാന്‍ സാധിക്കാതിരുന്നത്. വെറുതെ ചാടിയിറങ്ങി ചെയ്യാവുന്ന കാര്യമല്ല സ്ഥാനാര്‍ത്ഥിത്വം. ട്വന്റി 20 വികസനത്തിന്റെ ഒരു പാത തുറന്ന് വെച്ചിട്ടുണ്ട്. അത് മുന്നോട്ട് കൊണ്ട് പോയാല്‍ മതി എന്ന തോന്നലിലാണ് സ്ഥാനാര്‍ത്ഥിത്വം ഏറ്റെടുത്തത് എന്നും ലക്ഷ്മി പ്രിയ പറഞ്ഞു.