ഇരട്ടകളായ മലയാളി യുവതികള്‍ക്ക് രണ്ട് രാജ്യങ്ങളില്‍ ഒരേ സമയം സുഖ പ്രസവം

എറണാകുളം: ഇരട്ടകളായ മലയാളി യുവതികള്‍ക്ക് രണ്ട് രാജ്യങ്ങളില്‍ വച്ച് ഒരേ ദിവസം സുഖ പ്രസവം. 10 മിനിട്ടിന്റെ വ്യത്യാസത്തിലാണ് യുവതികള്‍ പ്രസവിച്ചത്. മഞ്ഞപ്ര മേനാച്ചേരി പൗലോസിന്റേയും സാറാമ്മയുടേയും മക്കളായ വിയയും ലിമിയുമാണ് ബഹ്‌റിനിലേയും പെരുമ്പാവൂരിലേയും ആശുപത്രികളില്‍ പ്രസവിച്ചത്. ഏപ്രില്‍ 23നാണ് ഇവര്‍ പ്രസവിച്ചത്.

ഇരട്ടകളുടെ മനസമ്മതം ഒരേ ദിവസമായിരുന്നെങ്കിലും വിവാഹം രണ്ടു ദിവസമായിരുന്നു. ലിയയെ മുക്കന്നൂര്‍ സ്വദേശി ബ്‌ളസനും ലിമിയയെ കൊട്ടാരക്കര സ്വദേശി നിധിനുമാണ് വിവാഹം കഴിച്ചത്. ലിയയുടെ വിവാഹത്തിന് ശേഷം മൂന്ന് ദിവസം കഴിഞ്ഞായിരുന്നു ലിമിയയുടെ വിവാഹം.

ലിയയ്ക്ക് ഏപ്രില്‍ 17നായിരുന്നു ഡോക്ടര്‍മാര്‍ പറഞ്ഞിരുന്ന പ്രസവ തീയതി. ലിമിയയ്ക്ക് മെയ് അഞ്ചിനും. ബഹ്‌റിനില്‍ അമേരിക്കന്‍ മിഷന്‍ ആശുപത്രിയില്‍ ജോലി ചെയ്യുന്ന ലിയ അതേ ആശുപത്രിയിലാണ് പെണ്‍കുഞ്ഞിന് ജന്മം നല്‍കിയത്. കുടുംബ സമേതം കുവൈത്തിലായിരുന്ന ലിമിയ പ്രസവത്തിനായാണ് നാട്ടിലേയ്ക്ക് എത്തിയത്. പെരുമ്പാവൂരിലെ എംവിജെഎം ആശുപത്രിയിലായിരുന്നു പ്രസവം.

English summary

Twins give birth at the same time in Kochi