അരുവിക്കരയില് നികേഷ് കുമാറിന് നേരെ കൈയ്യേറ്റ ശ്രമം, ബ്യൂറോയ്ക്ക് നേരേ പടക്കമേറ്
അരുവിക്കര: റിപ്പോര്ട്ടര് ചാനല് മേധാവി നികേഷ് കുമാറിനും ലേഖകന് രതീഷിനും നേരെ കോണ്ഗ്രസ് പ്രവര്ത്തകരുടെ കൈയ്യേറ്റ ശ്രമം. അരുവിക്കരയിലെ വോട്ടുകള് എണ്ണുന്ന തിരുവനന്തപുരത്തെ സ്വാതി തിരുനാള് സംഗീത കൊളെജില് നിന്നും പുറത്തേയ്ക്ക് വരുമ്പോഴായിരുന്നു സംഭവം. ഇരുവരേയും കണ്ട കോണ്ഗ്രസ് പ്രവര്ത്തകര് കൈയ്യേറ്റം ചെയ്യാന് ശ്രമിയ്ക്കുകയും അധിക്ഷേപിയ്ക്കുകയുമായിരുന്നു.
റിപ്പോര്ട്ടറിന്റെ കോഴിക്കോട് ബ്യൂറോയ്ക്ക് നേരേ പടക്കമെറിഞ്ഞതായും റിപ്പോര്ട്ടുണ്ട്. തിരഞ്ഞെടുപ്പ് ഫലം പുറത്ത് വന്നതിന് തൊട്ടുപിന്നാലെയാണ് ബ്യൂറോയ്ക്ക് നേരെ പടക്കമെറിഞ്ഞത്. ബാര്കോഴ, സോളാര് കേസ് എന്നിവയില് റിപ്പോര്ട്ടര് ചാനല് സ്വീകരിച്ച നടപടികളാണ് കോണ്ഗ്രസ് അനുകൂലികളുടെ ശത്രുതയ്ക്ക് ഇടയാക്കിയത്.
അരുവിക്കര ഉപതിരഞ്ഞെടുപ്പിന് മുന്പ് ബാര് കോഴ, സോളാര് കേസ് എന്നിവയില് നിര്ണായക വെളിപ്പെടുത്തലുകള് ചാനല് പുറത്ത് വിട്ടിരുന്നു. സരിത എസ് നായരുമായി മാധ്യമ പ്രവര്ത്തക സുനിത ദേവദാസ് നടത്തിയ അഭിമുഖം ചാനല് പുറത്ത് വിട്ടത് യുഡിഎഫിനെ പ്രതിസന്ധിയിലാക്കിയിരുന്നു.
വാര്ത്തകള് നല്കിയതിന് പിന്നാലെ ചാനല് മേധാവി നികേഷ് കുമാറിനേയും സരിത എസ് നായരേയും ചേര്ത്ത് അപവാദ പ്രചരണത്തിനും ചിലര് ശ്രമിച്ചിരുന്നു. നികേഷ് കുമാര് വിവാഹമോചനത്തിന് ഒരുങ്ങുന്നുവെന്ന തരത്തില് അദ്ദേഹത്തിന്റെയും കുടുംബത്തിന്റേയും ചിത്രങ്ങളുള്പ്പടെ വ്യാജ വാര്ത്തയും ഇക്കൂട്ടര് പ്രചരിപ്പിച്ചിരുന്നു.