ജോര്‍ജ്ജിന്റെ അഭിപ്രായം കണക്കിലെടുക്കാന്‍ പറ്റില്ലെന്ന് മുഖ്യമന്ത്രി

തിരുവനന്തപുരം: മാവോയിസ്റ്റ് വേട്ട സര്‍ക്കാര്‍ അവസാനിപ്പിക്കണമെന്ന് പി സി ജോര്‍ജ്ജ് പറഞ്ഞതിനെതിരെ മുഖ്യമന്ത്രി ഉമ്മന്‍ചാണ്ടിയും പ്രതികരിച്ചു. മാവോയിസ്റ്റ് വിഷയത്തില്‍ പിസി ജോര്‍ജ്ജിനെ തള്ളി കൊണ്ടാണ് മുഖ്യമന്ത്രി രംഗത്ത് എത്തിയത്. ജോര്‍ജ്ജിന്റെ പ്രസ്താവന അദ്ദേഹത്തിന്റെ വ്യക്തിപരമായ അഭിപ്രായം മാത്രമാണ്. അത് കേള്‍ക്കേണ്ട കാര്യമില്ലെന്നാണ് മുഖ്യമന്ത്രിയുടെ നിലപാട്.

അഭിപ്രായ വ്യത്യാസമുള്ളവര്‍ക്ക് വിയോജിക്കാമെന്നും അല്ലാത്തവര്‍ക്ക് പിസി ജോര്‍ജ്ജിന്റെ അനുകൂലത്തോട് യോജിക്കാമെന്നും ഉമ്മന്‍ചാണ്ടി പറഞ്ഞു. ആരൊക്കെ എന്തൊക്കെ പറഞ്ഞാലും സര്‍ക്കാരിന്റെ തീരുമാനത്തില്‍ മാറ്റമില്ല.

രാജ്യസുരക്ഷയാണ് പ്രധാനമെന്നും ഉമ്മന്‍ചാണ്ടി വ്യക്തമാക്കി. ക്രമസമാധാനം തകര്‍ക്കുന്നവരെ അടിച്ചമര്‍ത്തുകയല്ലാതെ കൈകെട്ടി നോക്കി നില്‍ക്കാനാവില്ലെന്നും മുഖ്യമന്ത്രി പറഞ്ഞു. മാവോയിസ്റ്റുകളെ പിടികൂടാന്‍ ശക്തമായ നടപടികളുമായി സര്‍ക്കാര്‍ മുന്നോട്ടു പോകുമെന്നും അദ്ദേഹം പറഞ്ഞു.

സര്‍ക്കാര്‍ കോടികള്‍ മുടക്കി മാവോയിസ്റ്റ് വേട്ട നടത്തുന്നത് അവസാനിപ്പിക്കണമെന്നാണ് പി സി ജോര്‍ജ്ജ് പറഞ്ഞത്. ഇതിനെ വിമര്‍ശിച്ചുകൊണ്ട് കെ മുരളീധരനും, രമേശ് ചെന്നിത്തലയും രംഗത്തു വന്നിരുന്നു. ഇതിനു പിന്നാലെയാണ് മുഖ്യമന്ത്രിയുടെ പ്രതികരണം.

English summary

CM Ummanchandy says pc George was wrong demanded an end to maoist hunt