സുല്‍ത്താന്‍ ബത്തേരിയില്‍ കോടികളുടെ കുഴല്‍പ്പണവേട്ട... കാറിലെ രഹസ്യ അറയില്‍ തോക്ക് !!!

വയനാട്: സുല്‍ത്താന്‍ ബത്തേരിയില്‍ കോടികളുടെ കുഴല്‍പ്പണം പിടികൂടി. സുല്‍ത്താന്‍ ബത്തേരി മുത്തങ്ങയ്ക്കടുത്ത് വച്ചാണ് മതിയായ രേഖകളില്ലാതെ കടത്താന്‍ ശ്രമിച്ച 3 കോടി 20 ലക്ഷം രൂപ പോലീസ് പിടികൂടിയത്. പണം കടത്താന്‍ ശ്രമിച്ച മൂന്ന് പേരെ ബത്തേരി പോലീസ് അറസ്റ്റ് ചെയ്തു.

കുഴല്‍പ്പണം കടത്തുന്നുവെന്ന രഹസ്യ വിവരത്തെ തുടര്‍ന്ന് ബത്തേരി സിഐയുടെ നേതൃത്വത്തില്‍ നടത്തിയ പരിശോധനയിലാണ് കോടികളുടെ കുഴല്‍പ്പണം പിടികൂടിയത്. കാറിലെ രഹസ്യ അറയില്‍ ഒളിപ്പിച്ച നിലയിലായിരുന്നു പണം. രഹസ്യഅറയില്‍ നിന്ന് ഒരു തോക്കും പോലീസ് കണ്ടെടുത്തു. ലൈസന്‍സില്ലാത്ത തോക്കാണിതെന്ന് പോലീസ് പറഞ്ഞു.

ഞായറാഴ്ച രാവിലെ നടത്തിയ പരിശോധനയിലാണ് കുഴല്‍പണം പിടികൂടിയത്. സംഭവത്തില്‍ കൊടുവള്ളി സ്വദേശികളായ അബ്ദുള്‍ റഹ്മാന്‍, റഫീഖ്, ജുനൈസ് എന്നിവരെ പോലീസ് ചോദ്യം ചെയ്തുവരികയാണ്. മൈസൂരില്‍ നിന്ന് കോഴിക്കോടേയ്ക്ക് കൊണ്ടുപോവുകയായിരുന്നു പണമെന്ന് പ്രതികള്‍ പറഞ്ഞു.

സംസ്ഥാനത്ത് കുഴല്‍പ്പണവും കള്ളപ്പണവും വ്യാപകമായി എത്തുന്നുവെന്നാണ് റിപ്പോര്‍ട്ടുകള്‍. കള്ളപ്പണത്തിന്റെ ഒഴുക്കിന് പിന്നില്‍ ഐസിസ് ബന്ധമുണ്ടെന്ന് കേന്ദ്ര രഹസ്യാന്വേഷണ ഏജന്‍സി സംശയിക്കുന്നുണ്ട്. ഈ സാഹചര്യത്തില്‍ പോലീസ് പരിശോധന ശക്തമാക്കിയിരിക്കുകയാണ്. അറസ്റ്റ് ചെയ്തവരുടെ രാഷ്ട്രീയ പശ്ചാത്തലവും മറ്റെന്തെങ്കിലും സംഘടനകളുമായി ബന്ധമുണ്ടോയെന്നും പോലീസ് അന്വേഷിക്കുന്നുണ്ടെന്നാണ് വിവരം.

English summary

Unaccounted money worth Rs 3.2 crore seized from Sulthan Bathery Wayanad.