മുഖ്യമന്ത്രിയുടെ ഉറപ്പ്! നഴ്സുമാരുടെ കൂട്ട അവധി സമരം പിൻവലിച്ചു... ശമ്പള പരിഷ്കരണം ഈ മാസം...

നഴ്സുമാരുടെ പ്രശ്നത്തിൽ മാർച്ച് 31നകം പരിഹാരമുണ്ടാക്കാമെന്നും, ശമ്പള പരിഷ്കരണ ഉത്തരവ് 31നകം പുറത്തിറക്കാമെന്നും മുഖ്യമന്ത്രി ഉറപ്പ് നൽകിയതായി യുഎൻഎ വ്യക്തമാക്കി.

തിരുവനന്തപുരം: സംസ്ഥാനത്ത് സ്വകാര്യ ആശുപത്രി നഴ്സുമാർ പ്രഖ്യാപിച്ച അനിശ്ചിതകാല കൂട്ട അവധി സമരം പിൻവലിച്ചു. ശമ്പള പരിഷ്കരണവുമായി ബന്ധപ്പെട്ട് ഈ മാസം തന്നെ ഉത്തരവിറക്കാമെന്ന മുഖ്യമന്ത്രിയുടെ ഉറപ്പിനെ തുടർന്നാണ് നഴ്സുമാർ സമരം പിൻവലിച്ചത്.

നഴ്സുമാരുടെ പ്രശ്നത്തിൽ മാർച്ച് 31നകം പരിഹാരമുണ്ടാക്കാമെന്നും, ശമ്പള പരിഷ്കരണ ഉത്തരവ് 31നകം പുറത്തിറക്കാമെന്നും മുഖ്യമന്ത്രി ഉറപ്പ് നൽകിയതായി യുഎൻഎ വ്യക്തമാക്കി. മുഖ്യമന്ത്രിയുടെ ഈ ഉറപ്പിനെ തുടർന്നാണ് സമരം പിൻവലിച്ചതെന്നും, സമരം പിൻവലിക്കാൻ അദ്ദേഹം ആവശ്യപ്പെട്ടിരുന്നതായും യുഎൻഎ അറിയിച്ചു.

മുഖ്യമന്ത്രിയുടെ ഓഫീസിൽ നിന്നാണ് നഴ്സുമാർക്ക് ശമ്പള പരിഷ്കരണം സംബന്ധിച്ച ഉറപ്പ് കിട്ടിയത്. ഇതിന്റെ ഭാഗമായി ചൊവ്വാഴ്ച യുഎൻഎ ഭാരവാഹികളുമായി മുഖ്യമന്ത്രി പിണറായി വിജയൻ കൂടിക്കാഴ്ച നടത്തും. അതേസമയം, ചേർത്തല കെവിഎം ആശുപത്രിയിലെ സമരം തുടരാനാണ് യുഎൻഎയുടെ തീരുമാനം.

നഴ്സുമാരുടെ സമരം ഒത്തുതീർപ്പാക്കാനായി ശനിയാഴ്ച ലേബർ കമ്മീഷണർ ചർച്ച നടത്തിയിരുന്നെങ്കിലും ഫലം കണ്ടിരുന്നില്ല. ഇതിനെ തുടർന്നാണ് മുഖ്യമന്ത്രി വിഷയത്തിൽ ഇടപെട്ടത്. ശമ്പള പരിഷ്കരണം നടപ്പാക്കാത്തതിലും, മാനേജ്മെന്റുകളുടെ കൂട്ട നടപടികൾക്കെതിരെയുമാണ് യുഎൻഎ നേതൃത്വത്തിൽ നഴ്സുമാർ അനിശ്ചതകാലം സമരം പ്രഖ്യാപിച്ചിരുന്നത്. എന്നാൽ ഹൈക്കോടതി നഴ്സുമാരുടെ സമരം വിലക്കികൊണ്ട് ഉത്തരവിട്ടു. ഇതോടെയാണ് മാർച്ച് രണ്ടാം തീയതി മുതൽ കൂട്ട അവധിയെടുത്ത് പ്രതിഷേധിക്കാൻ നഴ്സുമാർ തീരുമാനിച്ചത്.

English summary

una called off nurses strike in kerala.