ബത്തേരിയില് ലോഡ്ജില് കണ്ടെത്തിയ മൃതദേഹം കര്ണാടക സ്വദേശിയുടേത്
സുല്ത്താന്ബത്തേരി: സുല്ത്താന്ബത്തേരിയിലെ പൊലീസ് സ്റ്റേഷന് റോഡില് മാസങ്ങള്ക്ക് മുമ്പ് അടച്ചുപൂട്ടിപോയ ആരാധന ടൂറിസ്റ്റ് ഹോമില് കഴിഞ്ഞ ദിവസം കണ്ടെത്തിയ മൃതദേഹം കര്ണാടക സ്വദേശിയുടേത്. മൈസൂര് നഞ്ചന്ഗോഡ് സ്വദേശി ശിവകുമാര് (26) ആണ് മരിച്ചത്. മൃതദേഹത്തിന് സമീപം നിന്ന് കിട്ടിയ മൊബൈല് ഫോണും മാസങ്ങള്ക്ക് മുമ്പ് കാണാതായ വ്യക്തിയെ കുറിച്ച് പൊലീസ് നടത്തിയ അന്വേഷണവുമാണ് ആളെ തിരിച്ചറിയാന് സഹായിച്ചത്.
പൂട്ടികിടന്ന ലോഡ്ജില് നിന്നും സാധനങ്ങളെടുക്കാനെത്തിയവരാണ് ശനിയാഴ്ച വൈകിട്ടോടെ മൃതദേഹത്തിന്റെ അവശിഷ്ടം കണ്ടെത്തിയത്. മൃതദേഹത്തിന്റെ സമീപത്ത് നിന്നും ലഭിച്ച മൊബൈല് ഫോണാണ് നിര്ണായക തെളിവായത്. ഫോണില് നിന്നും ലഭിച്ച ഒരു നമ്പറില് ബന്ധപ്പെട്ടപ്പോഴാണ് ഉടമ ശിവകുമാറാണെന്ന് കണ്ടെത്തുന്നത്. മാസങ്ങള്ക്ക് മുമ്പ് ശിവകുമാറിനെ നഞ്ചന്ഗോഡ് വെച്ച് കാണാതായിരുന്നു. ഇയാളുടെ തിരോധാനവുമായി ബന്ധപ്പെട്ട് ഒരു കേസും നഞ്ചന്ഗോഡ് പൊലീസ് രജിസ്റ്റര് ചെയ്തിരുന്നു. അതേസമയം, നഞ്ചന്ഗോഡ് നിന്നും വയനാട്ടിലെത്തിയ ശിവകുമാര് ബത്തേരിയിലും പരിസരപ്രദേശങ്ങളിലുമായി കൂലിപ്പണിയെടുത്തായിരുന്നു ജീവിച്ചിരുന്നത്.
കഴിഞ്ഞ വര്ഷം അടച്ചുപൂട്ടി ലോഡ്ജിന്റെ വിവിധ ഭാഗങ്ങള് തകര്ന്ന അവസ്ഥയിലാണ്. ഇതിലെ എതിലെയെങ്കിലും അകത്തുകയറിയ ശിവകുമാര് ഗോവണിപ്പടിയില് തൂങ്ങിമരിച്ചതാകാമെന്നാണ് പ്രാഥമിക നിഗമനം. തൂങ്ങിമരിച്ചതാണെന്ന് സംശയിക്കുന്ന രീതിയില് മൃതദേഹത്തിന്റെ സമീപത്ത് നിന്നും തുണിയുടെ അവശിഷ്ടങ്ങളും ലഭിച്ചിട്ടുണ്ട്. ബത്തേരി സി ഐ എം ഡി സുനില്, എസ് ഐ അജേഷ് എന്നിവരുടെ നേതൃത്വത്തില് ഇന്ക്വസ്റ്റ് അടക്കമുള്ള നടപടികള് പൂര്ത്തിയാക്കി.