ജയ് ഗണേഷും മിത്ത് വിവാദവും തമ്മിലെന്ത് ബന്ധം? ഉണ്ണി മുകുന്ദന്‍ വന്നത് എങ്ങനെയെന്നും രഞ്ജിത് ശങ്കർ

Updated: Wednesday, August 23, 2023, 17:11 [IST]

തിരുവനന്തപുരം: മിത്ത് വിവാദത്തില്‍ സ്പീക്കർ എഎന്‍ ഷംസീറിനെതിരെ പരോക്ഷ വിമർശനവുമായി നടന്‍ ഉണ്ണി മുകുന്ദന്‍ അടക്കമുള്ള സിനിമ താരങ്ങളും രംഗത്ത് വന്നിരുന്നു. "ഇന്ന് ഗണപതി മിത്താണെന്ന് പറഞ്ഞു. ഇന്നലെ അയ്യപ്പൻ, നാളെ കൃഷ്ണൻ, മറ്റന്നാൾ ശിവൻ. ഇതെല്ലാം കഴിഞ്ഞ് നിങ്ങളും മിത്താണെന്ന് പറയും" എന്നായിരുന്നു കൊട്ടരക്കര മഹാഗണപതി ക്ഷേത്രത്തിൽ വിനായക ചതുർഥി ആഘോഷത്തിൽ പങ്കെടുത്തുകൊണ്ട് ഉണ്ണി മുകുന്ദന്‍ പറഞ്ഞ്.

ഇതിന് പിന്നാലെയാണ് ഉണ്ണി മുകുന്ദനെ നായകനാക്കി സംവിധാനം ചെയ്യുന്ന "ജയ് ഗണേഷ്" എന്ന പുതിയ ചിത്രത്തിന്റെ പ്രഖ്യാപനവുമായി രഞ്ജിത് ശങ്കർ രംഗത്ത് വരുന്നത്. ഉണ്ണി മുകുന്ദന്‍ ഫിലിംസാണ് നിർമ്മാണം. മിത്ത് വിവാദത്തോടെ ചേർത്ത് നിർത്തി തന്നെയാണ് പുതിയ ചിത്രത്തിന്റെ പ്രഖ്യാപനത്തെയും കണ്ടത്. എന്നാല്‍ വിവാദവുമായി ചിത്രത്തിന് യാതൊരു ബന്ധവും ഇല്ലെന്നാണ് സംവിധായകന്‍ രഞ്ജിത് ശങ്കറിന്റെ അവകാശ വാദം. മനോരമ ഓണ്‍ലൈനോടായിരുന്നു അദ്ദേഹത്തിന്റെ പ്രതികരണം.

'ജയ് ഗണേഷ്' എന്ന പേര് സിനിമയ്ക്ക് ഏറ്റവും അനുയോജ്യമായതുകൊണ്ടാണ് നൽകിയതെന്നും ഇതിന് വിവാദവുമായി യാതൊരു ബന്ധവുമില്ലെന്നാണ് സംവിധായകന്‍ വ്യക്തമാക്കുന്നത്. 'നമ്മുടെ ശ്രമം പ്രേക്ഷകരെ വിനോദിപ്പിക്കുന്ന ഒരു സിനിമ ഉണ്ടാക്കുക എന്നുള്ളതാണ്. എന്റെ സിനിമയ്ക്ക് ഏറ്റവും ഉചിതമായ പേര് ജയ് ഗണേഷ് എന്നത് തന്നെയാണ്', മനോരമയ്ക്ക് നല്‍കിയ അഭിമുഖത്തില്‍ രഞ്ജിത് ശങ്കർ പറയുന്നു.

സിനിമയ്ക്ക് ഈ പേര് നല്‍കണം എന്നത് എത്രയോ മാസം മുന്‍പ് തീരുമാനിച്ച കാര്യമാണ്. ഇതേ പേരില്‍ ഫിലിം ചേംബറില്‍ സിനിമയുടെ ടൈറ്റില്‍ രജിസ്ട്രേഷന്‍ പൂർത്തിയാക്കുന്നത് കഴിഞ്ഞ ജൂണ്‍ മാസമാണ്. അതിനും എത്രോയോ നാളുകള്‍ക്ക് മുമ്പ് തന്നെ അപേക്ഷ നല്‍കിയിട്ടുണ്ട്. എന്തുകൊണ്ട് ഇത്തരമൊരു പേര് ചിത്രത്തിന് നല്‍കി എന്നുള്ളത് തിയേറ്ററില്‍ വരുമ്പോള്‍ പ്രേക്ഷകർക്ക് മനസ്സിലാവുമെന്നും രഞ്ജിത് ശങ്കർ വ്യക്തമാക്കി.

സിനിമയുടെ പേര് ചിങ്ങത്തില്‍ പ്രഖ്യാപിക്കാനായിരുന്നു തീരുമാനം. അതുകൊണ്ടാണ് ഇപ്പോഴത്തെ പ്രഖ്യാപനം. ചിത്രീകരണവും ഉടന്‍ തന്നെ ആരംഭിക്കും. സിനിമ ഒരു കമേഴ്‌സ്യൽ പ്രോഡക്റ്റ് ആണ്. അതുകൊണ്ട് തന്നെ അത് അാരും അറിയാതെ ചിത്രീകരിച്ച് റിലാസ് ചെയ്യാന്‍ സാധിക്കുന്ന കാര്യമല്ല. ഇതോടൊപ്പം തന്നെ നല്ല രീതിയിലുള്ള മാർക്കറ്റിങും ആവശ്യമാണ്.

സിനിമയുടെ ചിത്രീകരണം ആരംഭിക്കുന്നത് രണ്ട് മാസങ്ങള്‍ക്ക് മുമ്പൊക്കെ സാധാരണ രീതിയില്‍ പേര് പ്രഖ്യാപിക്കാറുണ്ട്. എന്റെ മുന്‍ ചിത്രങ്ങള്‍ പരിശോധിച്ചാല്‍ ഇത് വ്യക്തമാവും. സിനിമയ്ക്ക് ഈ പേര് ആവശ്യമാണ്. അതുകൊണ്ടാണ് ജയ് ഗണേഷ് എന്ന പേര് നല്‍കിയിരിക്കുന്നത്. അല്ലാതെ ഇപ്പോഴത്തെ വിവാദവുമായി ഇതിന് ബന്ധമൊന്നില്ലെന്നും രഞ്ജിത് ശങ്കർ കൂട്ടിച്ചേർക്കുന്നു.

ചിത്രത്തിന്റെ തിരക്കഥ നേരത്തെ തന്നെ പൂർത്തിയാക്കിയതാണ്. ഒരു നടന് വേണ്ടിയുള്ള കാത്തിരിപ്പിലായിരുന്നു ഞാന്‍. മാളികപ്പുറത്തിന് ശേഷം ഒരു മികച്ച സിനിമ ഉണ്ണി മുകുന്ദനും നോക്കുകയായിരുന്നു. ആവേശകരവും വെല്ലുവിളി നിറഞ്ഞതുമായ യാത്രയായിരിക്കും ഇത്. ഈ യാത്രയുടെ ഓരോ ഘട്ടവും ആസ്വാദകമാകുമെന്ന് പ്രതീക്ഷിക്കുന്നുവെന്നും രഞ്ജിത് ശങ്കർ അഭിപ്രായപ്പെട്ടു.