നിസാം മയക്കുമരുന്ന് കടത്തുകാരന്‍, സംരക്ഷിക്കുന്നത് ഉന്നതര്‍: ബിജെപി

തിരുവനന്തപുരം: ശോഭ സിറ്റിയിലെ സെക്യൂരിറ്റി ജീവനക്കാരന്‍ ആയിരുന്ന ചന്ദ്രബോസിനെ കാറിടിച്ച് കൊന്ന കേസിലെ പ്രതി നിസാമിനെ സംരക്ഷിക്കുന്നത് സംസ്ഥാന സര്‍ക്കാരിലെ ഉന്നതരാണെന്ന് ബിജെപി. നിരവധി കേസുകള്‍ ഉണ്ടായിട്ടും നിസാം ശിക്ഷിക്കപ്പെടാതിരിക്കന്നതിന്റെ കാരണം ഇതാണെന്ന് ബിജെപി സംസ്ഥാന അധ്യക്ഷന്‍ വി മുരളീധരന്‍ പറഞ്ഞു.

നിസാമിന്റെ മയക്കുമരുന്ന് കടത്തടക്കം ഉള്ള നിയമവിരുദ്ധ പ്രവര്‍ത്തനങ്ങള്‍ക്ക് സഹായം നല്‍കുന്നത് സംസ്ഥാനത്തെ ഉന്നതരാണെന്ന് മുരളീധരന്‍ ആരോപിച്ചു. നിമയവിരുദ്ധ പ്രവര്‍ത്തനങ്ങളിലൂടേയും മാഫിയ പ്രവര്‍ത്തനങ്ങളിലൂടേയും ആണ് നിസാം പണം സമ്പാദിച്ചതെന്നും അദ്ദേഹം ആരോപിക്കുന്നു.

സര്‍ക്കാരിലെ മാത്രമല്ല, പ്രതിപക്ഷത്തെ ഉന്നതരും നിസാമിനെ സഹായിക്കുന്നുണ്ടെന്നാണ് ബിജെപിയുടെ ആക്ഷേപം. മാറിമാറി വരുന്ന സര്‍ക്കാരുകളില്‍ ഇയാള്‍ക്ക് സ്വാധാനമുണ്ടായിരുന്നുവെന്നും അത് മറയാക്കിയായിരുന്നു എല്ലാ പ്രവര്‍ത്തനങ്ങളെന്ും മുരളീധരന്‍ പറഞ്ഞു.

നിസാമില്‍ നിന്ന് പണം പറ്റുന്നവരാണ് സര്‍ക്കാരിലെ ചിലര്‍. മയക്കുമരുന്ന് കച്ചവടത്തിലൂടെയാണ് ഇയാള്‍ പണം സമ്പാദിക്കുന്നതെന്നും അദ്ദേഹം ആരോപിച്ചു. ചന്ദ്രബോസിന്റെ കുടുംബത്തെ സര്‍ക്കാര്‍ സംരക്ഷിക്കണം. കുട്ടികളുടെ വിദ്യാഭ്യാസം സര്‍ക്കാര്‍ ഏറ്റെടുക്കണം എന്നും അദ്ദേഹം ആവശ്യപ്പെട്ടു.

English summary

V Muraleedharan's allegations against government in Nizam case.