വടക്കാഞ്ചേരി പീഡനം; യുവതിയെ നുണ പരിശോധനയ്ക്ക് വിധേയയാക്കണമെന്ന് ജയന്തന്‍

ജയന്തന് പുറമെ കേസില്‍ ആരോപണവിധേയരായ ജിനീഷ്, ബിനീഷ്, കെ.ആര്‍ ഷിബു എന്നിവരും ചേര്‍ന്നാണ് മുഖ്യമന്ത്രിക്ക് പരാതി നല്‍കിയിരിക്കുന്നത്.

തൃശൂര്‍: സിപിഎം നേതാവ് ഉള്‍പ്പെട്ട വടക്കാഞ്ചേരി പീഡനക്കേസില്‍ പരാതിക്കാരിയെ നുണ പരിശോധനയ്ക്ക് വിധേയയാക്കണമെന്ന് ആവശ്യം. ആരോപണ വിധേയനായ ജയന്തനാണ് ഇക്കാര്യം വ്യക്തമാക്കി മുഖ്യമന്ത്രിക്ക് പരാതി നല്‍കിയത്. തങ്ങള്‍ക്കെതിരെ യുവതി നല്‍കിയ പരാതി വ്യാജമാണെന്ന് ജയന്തന്‍ ആരോപിക്കുന്നു.

ജയന്തന് പുറമെ കേസില്‍ ആരോപണവിധേയരായ ജിനീഷ്, ബിനീഷ്, കെ.ആര്‍ ഷിബു എന്നിവരും ചേര്‍ന്നാണ് മുഖ്യമന്ത്രിക്ക് പരാതി നല്‍കിയിരിക്കുന്നത്. സ്ത്രീയുടെയും ഭര്‍ത്താവിന്റെയും മൊഴി കളവാണെന്ന് ഇവര്‍ പരാതിയില്‍ പറയുന്നു. പോലീസിലും മറ്റ് അധികാര കേന്ദ്രങ്ങളിലും സ്ഥിരമായി തെറ്റായ പരാതി നല്‍കുന്നവരാണ് ഇവരെന്നും ആരോപിക്കുന്നുണ്ട്.

നേരത്തെയും യുവതി ഇതേ രീതിയില്‍ പരാതി നല്‍കിയിരുന്നു. ഏതാനും മാസങ്ങള്‍ക്ക് രാജേഷ് എന്നയാള്‍ക്കെതിരെയായിരുന്നു പരാതി. ഈ പരാതി പണം നല്‍കി ഒത്തുതീര്‍പ്പാക്കുകയായിരുന്നു. പണത്തിനുവേണ്ടിയാണ് തങ്ങള്‍ക്കെതിരെയും പരാതി ഉന്നയിച്ചിരിക്കുന്നത്. പണത്തിനായി ഏതറ്റം വരെയും പോകുന്നതിന്റെ ഭാഗമായാണ് തങ്ങള്‍ക്കെതിരെ പത്രസമ്മേളനം നടത്തിയതെന്നും ജയന്തന്‍ പറഞ്ഞു.

തന്റെ കയ്യില്‍ നിന്ന് പരാതിക്കാരിയും ഭര്‍ത്താവും പണം വാങ്ങിയിരുന്നതായി ജയന്തന്‍ ആവര്‍ത്തിച്ചു. അത് തിരിച്ചു ചോദിച്ചതാണ് കേസിനാധാരം. സ്ത്രീയുടെ മൊഴി കള്ളമാണെന്ന് തെളിയിക്കാന്‍ അവരെ നുണ പരിശോധനയ്ക്ക് വിധേയമാക്കണം. ഏതുതരത്തിലുള്ള അന്വേഷണത്തിനും തങ്ങള്‍ക്ക് വിരോധമില്ലെന്നും ഇവര്‍ വ്യക്തമാക്കിയിട്ടുണ്ട്.

English summary

Vadakkanchery Rape case; cpm leader seeks lie detector test