വന്ദേഭാരത്; കേന്ദ്രമന്ത്രിയുടെ പ്രതികരണം കേരളത്തോട് കാണിക്കുന്ന അവഗണനയുടെ തുടർച്ച; വി എൻ വാസവൻ

Updated: Friday, March 31, 2023, 15:08 [IST]

തിരുവനന്തപുരം: കേരളത്തിലേക്ക് വന്ദേഭാരത്‌ ട്രെയിൻ സർവീസുകൾ അനുവദിക്കുന്ന കാര്യം പരിഗണനയിലില്ലെന്ന കേന്ദ്രമന്ത്രി അശ്വനി വൈഷ്ണവിന്റെ പ്രസ്താവന കേരളത്തോടു കാണിക്കുന്ന അവഗണനയുടെ തുടർച്ചയാണെന്ന് വി എൻ വാസവൻ. കേരളത്തിൻറെ സ്വപ്ന പദ്ധതിയായ കെ റെയിലിനെ അട്ടിമറിക്കുവാൻ വന്ദേ ഭാരതിനെ ഉയർത്തിക്കാട്ടിയാണ് യു ഡി എഫും ബി ജെ പിയും ശ്രമിച്ചത്. കേരളത്തിന്റെ റെയിൽവേ വികസനത്തിന് യാതൊരു പരിഗണനയും ഇല്ലായെന്നുള്ള യാഥാർത്ഥ്യം കേന്ദ്രമന്ത്രി പാർലമെന്റിൽ നൽകിയ മറുപടിയിലൂടെ വ്യക്തമായിരിക്കുകയാണെന്നും വിഎൻ വാസവൻ കുറ്റപ്പെടുത്തി.

അർഹമായ റെയിൽവേ വികസനം കേരളത്തിന് നിഷേധിക്കപ്പെടുമ്പോഴും യു ഡി എഫും ബി ജെ പിയും പ്രതികരിക്കാൻ പോലും തയ്യാറാകാതെ കുറ്റകരമായ മൗനമാണ് സ്വീകരിക്കുന്നത്. ജനസാന്ദ്രത വളരെയധികം കൂടുതലുള്ള കേരളം നേരിടുന്ന പ്രധാന പ്രശ്നങ്ങളിലൊന്നാണ് യാത്രാ സൗകര്യമില്ലായ്മ. കാസർകോട് മുതൽ കന്യാകുമാരി വരെയുള്ള അറുനൂറ്റി ഇരുപതോളം കിലോമീറ്റർ പിന്നിടാൻ പതിമൂന്ന് മണിക്കൂർ വരെയാണ് ശരാശരി വേണ്ടി വരുന്നത്.

സാധാരണ ജനങ്ങൾ അനുഭവിക്കുന്ന ബുദ്ധിമുട്ടിനൊപ്പം, നമ്മുടെ സംസ്ഥാനം കാലാനുസൃതമായി കൈവരിക്കേണ്ട പല വികസന പദ്ധതികളും ഇതുമൂലം തടസ്സങ്ങൾ നേരിടുകയാണ്. നിലവിലെ ഈ സാഹചര്യത്തെ മറികടക്കുന്നതിന് റെയിൽ വികസനം അത്യന്താപേക്ഷികമാണ്. കാര്യക്ഷമമായ ഇടപെടലാണ് സംസ്‌ഥാന സർക്കാർ റെയിൽ വികസനത്തിനായി നടത്തുന്നത്. കേരളത്തിലെ ജനങ്ങളുടെ താൽപര്യങ്ങൾക്ക് വിരുദ്ധമായി കൈക്കൊള്ളുന്ന ഏതൊരു നടപടിയും എതിർക്കപ്പെടേണ്ടതുണ്ട്. കേരളത്തിലേക്ക് വന്ദേഭാരത്‌ ട്രെയിനുകൾ അനുവദിക്കുന്ന കാര്യം പരിഗണനയിൽ ഇല്ലെന്ന കേന്ദ്ര സർക്കാർ നിലപാട് പുനപരിശോധിക്കണമെന്നും അദ്ദേഹം പറഞ്ഞു.

നിലവിൽ കേരളത്തിന് വന്ദേ ഭാരത് എക്സ്പ്രസ് പരിഗണിക്കുന്നില്ല എന്നായിരുന്നു കേന്ദ്ര റെയിൽവേ മന്ത്രി അശ്വിനി വൈഷ്ണവ് പാർലമെന്റിൽ വ്യക്തമാക്കിയത്.കൊടിക്കുന്നിൽ സുരേഷ് എംപിയുടെ ചോദ്യത്തിന് മറുപടിയായിട്ടായിരുന്നു മന്ത്രി വ്യക്തമാക്കിയത്. സർവീസിന്റെ സാധ്യതയും റെയിൽ ട്രാഫിക്കും കോച്ചുകളുടെ ലഭ്യതയും അനുസരിച്ചാവും പുതിയ സർവീസുകൾ ആരംഭിക്കുക. ഓരോ സംസ്ഥാനത്തിനായല്ല വന്ദേഭാരത് അനുവദിക്കുന്നതെന്നും മന്ത്രി പറഞ്ഞിരുന്നു.

അതേസമയം കേരളത്തിന്റെ റെയിൽവേ വികസന സ്വപ്നങ്ങൾക്ക് വീണ്ടും ചുവപ്പുകൊടി കാട്ടുന്നതാണ് ഇതുസംബന്ധിച്ച് കേന്ദ്രമന്ത്രി പാർലമെന്റിൽ നൽകിയ മറുപടിയെന്നായിരുന്നു മുഖ്യമന്ത്രി പിണറായി വിജയൻ പരിഗണിച്ചത്. രാജ്യത്തിന്റെ റെയിൽ ഭൂപടത്തിൽ നിന്ന് കേരളത്തെ അപ്രസക്തമാക്കാനുള്ള നിരന്തര നടപടികളിൽ ഏറ്റവും അവസാനത്തേതാണിതെന്നും മുഖ്യമന്ത്രി പറഞ്ഞു.