പാരഡി ഗാനങ്ങളുടെ അപോസ്തലന് വിഡി രാജപ്പന് അന്തരിച്ചു
കോട്ടയം: ഹാസ്യ കഥാപ്രാസംഗികനും സിനിമ താരവും ആയ വിഡി രാജപ്പന് അന്തരിച്ചു. കോട്ടയത്തെ ആശുപത്രിയില് വച്ചായിരുന്നു അന്ത്യം. ഏറെ നാളായി ശാരീരിക അവശതകള് അനുഭവിയ്ക്കുകയായിരുന്നു അദ്ദേഹം.
എഴുപതുകാരനായ രാജപ്പന് ഏറെ നാളായി ചികിത്സയില് ആയിരുന്നു. അടുത്തിടെ രാജപ്പനെ കുറിച്ച് പല വ്യാജ വാര്ത്തകളും പ്രചരിച്ചിരുന്നു. വീട്ടുകാരും സിനിമ സംഘടനകളും കൈയ്യൊഴിഞ്ഞ വിഡി രാജപ്പന് ദുരിത ജീവിതം നയിക്കുകയാണെന്നായിരുന്നു അത്.
ഹാസ്യ കഥാപ്രസംഗങ്ങളിലൂടെ മലയാളികളെ ഏറെ ചിരിപ്പിച്ച വ്യക്തിയായിരുന്നു അദ്ദേഹം. മലയാള കഥാപ്രസംഗ ചരിത്രത്തില് അദ്ദേഹം ഹാസ്യത്തിലൂടെ സൃഷ്ടിച്ചത് ഒരു പുതുവഴിയായിരുന്നു. ഒരുകാലഘട്ടത്തില് അദ്ദേഹത്തിന്റെ കഥാപ്രസംഗ കാസറ്റുകള് ചൂടപ്പം പോലെയാണ് വിറ്റഴിയ്ക്കപ്പെട്ടിരുന്നത്. വിഡി രാജപ്പന്റെ പാരഡി ഗാനങ്ങള്ക്കായി കേരളം കാത്തിരുന്ന കാലമായിരുന്നു അത്.
നൂറോളം സിനിമകളിലും വിഡി രാജപ്പന് അഭിനയിച്ചിട്ടുണ്ട്. സന്ധ്യയ്ക്ക് വിരിഞ്ഞ പൂവ് ആയിരുന്നു ആദ്യ ചിത്രം. ആലിബാബയും ആറരക്കള്ളന്മാരും എന്ന ചിത്രത്തിലായിരുന്നു അദ്ദേഹം ഒടുവില് അഭിനയിച്ചത്.