വീക്ഷണം മുഖപ്രസംഗം; ജെഡിയുവിന്റെ മുന്നണിമാറ്റം വേഗത്തിലാക്കി

By Anwar Sadath

Updated: Friday, May 15, 2015, 9:23 [IST]

തിരുവനന്തപുരം: യുഡിഎഫ് മുന്നണിയിലുള്ള അസംതൃപ്തി പരസ്യമായി പുറത്തു പ്രകടിപ്പിച്ച ജെഡിയു, വീക്ഷണം പത്രത്തില്‍ മുഖപ്രസംഗം വന്നതോടെ ഇടതുമുന്നണിയിലേക്ക് മാറാനുള്ള നീക്കം വേഗത്തിലാക്കി. ജെഡിയു സംസ്ഥാന പ്രസിഡന്റ് വീരേന്ദ്ര കുമാറിനെയും ജെഡിയുവിനെയും കണക്കറ്റ് പരിഹസിച്ചും വിമര്‍ശിച്ചുമായിരുന്നു കോണ്‍ഗ്രസ് മുഖപത്രത്തിലെ മുഖപ്രസംഗം.

നേരത്തെ ബാലകൃഷ്ണ പിള്ള മുന്നണിവിട്ടേക്കുമെന്ന ഘട്ടത്തിലും സമാനമായ രീതിയിലുള്ള മുഖപ്രസംഗം വീക്ഷണത്തില്‍ പ്രസിദ്ധീകരിച്ചിരുന്നു. കോണ്‍ഗ്രസ് നിലപാടുമായി മുഖപ്രസംഗത്തിന് ബന്ധമില്ലെന്ന് കെപിസിസി അധ്യക്ഷന്‍ വിഎം സുധീരനും മുഖ്യമന്ത്രി ഉമ്മന്‍ചാണ്ടിയും ആവര്‍ത്തിക്കുമ്പോഴും മുതിര്‍ന്ന കോണ്‍ഗ്രസ് നേതാക്കളുടെ അനുമതിയോടുകൂടിത്തന്നെയാണ് മുഖപ്രസംഗമെന്ന് വ്യക്തമാണ്.

സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനുമായി ചര്‍ച്ച നടത്തുകയും സിപിഎം ജെഡിയുവിനെ ഇടതുപക്ഷത്തേക്ക് ക്ഷണിക്കുകയും ചെയ്തതിന്റെ പിന്നാലെയായിരുന്നു വഞ്ചകരെന്നും നന്ദിയില്ലാത്തവരെന്നും പറഞ്ഞ് പത്രം ജെഡിയുവിനെ അധിക്ഷേപിച്ചത്. പാലക്കാട് വീരേന്ദ്രകുമാറിന്റെ തോല്‍വിക്ക് കാരണക്കാരായ കോണ്‍ഗ്രസ് നേതാക്കള്‍ക്കെതിരെ നടപടിയെടുക്കണമെന്ന വീരേന്ദ്രകുമാറിന്റെ നിലപാടിനുള്ള മറുപടികൂടിയായി പാര്‍ട്ടി പത്രത്തിലെ എഡിറ്റോറിയല്‍.

ഇതോടെ കോണ്‍ഗ്രസുമായും യുഡിഎഫുമായും അകല്‍ച്ച വര്‍ദ്ധിച്ചെന്ന് ജെഡിയും നേതാക്കളും വ്യക്തമാക്കിക്കഴിഞ്ഞു. എല്‍ഡിഎഫിലേക്ക് പാര്‍ട്ടി പോകുമെന്നുതന്നെയാണ് ഇവര്‍ നല്‍കുന്ന സൂചന. വരുന്ന പഞ്ചായത്ത് തെരഞ്ഞെടുപ്പുന് മുന്‍പ് മുന്നണി വിട്ടില്ലെങ്കില്‍ അഴിമതി ആരോപണത്തില്‍ മുങ്ങിയ യുഡിഎഫില്‍ നിന്നും കനത്ത തിരിച്ചടി നേരിടേണ്ടിവരുന്ന് പാര്‍ട്ടി അണികളും നേതൃത്വത്തിന് മുന്നറിയിപ്പു നല്‍കിയിട്ടുണ്ട്.